فاقد الشيء يعطيه

الجزء 31

#فاقد_الشيء_يعطيه
#شمس
#بقلم_فريال
الجزء 31
كملت القاطو كامل تهنيت بقالي الميناج للعيد ونرتاح ( يدخل رمضان لازم ميناج كبير كلش يتحط يخرج لازم ميناج يجيوك ضياف لازم ميناج وللعلم الدار تكون نظيفة تشعل بصح لازم ميناج)، كي بقاو يومين للعيد جا بزيد وجابلي صاشيات حطهملي فوق سرير وخرج بلا مايحكي ولا يقولي وش فيهم، فتحتهم نلقاه جايبلي كسوة العيد شحال فرحت كي تفكرني قبل مانشوف لحوايج المهم جابلي يالوكان حاجة تافهة منعرف كيفاه راح نشرحلكم شعوري في الحظة هذيك انو عبد يجيبلك حاجة ويتفكرك وانت طول عمرك منبوذة ومكانش الي عطاك كلمة مليحة وينك يا كادو. لقيتو جابلي غوب ميدي ذرعيها فولار فالنوار مع صابو نلبسهم فالدار واونصومبل كلاسيك فاست للركبة وسروال وخيمار فالبلو وصباط طالون نوار هذو تاع خرجة وجابلي باغيغ سامبل تاع ذهب فرحت بيه اول مرة في حياتي ندير سلسلة تاع ذهب في رقبتي لي درتها في شورتي تاع بلاكيور برك وبابا عمرو ولا شرالي حاجة وينك يا الذهب كان الراي راي مرتو وهي تمشيه كيف مابغات .نهار العيد نضت بكري لقيت يزيد خرج راح للجامع باش يصلي صلاة العيد وجدت سنيوة تاع القهوة حطيتها فالصالو كنت ديجا شريت سارفيس قولت المرة هذي لازم كلش يكون جديد ستفت القاطوات عسلت المقرود وقريوش وحطيتهم تاني، كملت روحت دوشت علبالي ليوم يجيو يغافرو يما ومجاياش نقابلهم بالحالة هذي، لبست حوايجي ليسيت شعري وطلقتو ماكييت شارجي (تعلمت من اليوتيوب فيه فايدة لناس الي تحب تتعلم كلش موجود الانترنت نعمة ونقمة حسب وش تحوسي انت اذا بغيتي تستفادي وتتعلمي راكي تهزي بالخف واذا بغيتي تلعبي وتتمسخري تاني تلقاي وش تبغي)، لبست لندى ومشطتلها جات تهبل تهبل كليتها بالبوس هزيتها وروحت غاقرت على يما وقعدنا مجمعين حتى جا يزيد غافر يماه ونضت انا غافرتو سلمت عليه متت بالحشمة تقول مش راجلي من تسلام العرس مازادش سلم عليا ههههه (وفليل يبات معريني ويدير رايو فيا)، عينيه مانحاهمش مني صراحة جيت نقتل نهبل (شكون يشكر لعروس فمها ولا مها وانا عندي فمي يكفي ويوفي، لوكان جات دنيا دنيا راهو راجلي ذوك يتغزل ويشكر فيا بصح الله غالب عندي حيط مايحكي مايشكر) حتى لاغوب كلات مني النص جاتني سيرطاي ومع لخير الي هازاتو لكم ان تتخيلو المنظر. قعد يلعب مع ندى حتى جاو ولاد عمومو وعماتو يغافرو ليما قالي مانوصيكش بلاك تخرجي ليهم ويشوفوك تعرفي العقلية كيفاه، انا ديجا من ضربة ولد خالتو وليت نخاف وحشمت اصلا لانو حرام نخرج قدامهم مايعنيولي والو كانو يجيو في رمضان فليل يسهرو عندنا كنت نوجدلهم ونعيطلو يهز السنيوة وانا نبقى في الكوزينة مانجمع مانقصر.
#فريال