فاقد الشيء يعطيه

الجزء 27

#فاقد_الشيء_يعطيه
#شمس
#بقلم_فريال
الجزء 27
جات لعجوز قعدت معايا تقصر بغات تعاوني مخليتهاش مرا كبيرة وزيد صايمة خص غير تخدم وتعاوني مدامني قادرة على شغل دار خلي نخدم وهي تحكملي ندى كي نكون نخدم،
ومش مدايرة مزية فيها كي راني نخدم ونطيب لا هذا واجبي هي حاطتني زي بنتها الحنان الي كنت محتاجاتو في صغري هي عوضتهولي ربي يحفظهالي ويطول في عمرها لوكان ماكانتش ساكنة معايا في دار كون راني هبلت من الوحدة والبرود تاع يزيد. وجدت كلش وحطيتو بقالي غير لبوراك نقليه انا هكاك ونحس بيدين صغار على رقبتي كي درت لقيتها ندى هازها باباها وهي حابة تجي لعندي مفهمتش كيفاه يقدر يدخل بلا مايدير الحس ونفيقلو هو عكسي تماما مهوش فوضوي ويمشي بعقلو بصح انا كي نخرج ولا نوض من بلاصتي ندير فوضى كبيرة تقول زلزال ضرب ناس كامل نوضهم. غير احكمها عندك حتى نكمل نخاف تتحرق _ ايه عندك الحق، هو بعد شوي عليا وهي حرنت ناضت تبكي مابغات تسكت عيا معاها وهي تلوح في يديها بغات تجي لعندي بقا يحكي معاها يقولها ماما اي تخدم اصبري تكمل وتجي تهزك ياعمري على بنتي ذوك كبرت ماتبكيش. كملت روحت ليها تلاحت لصقت فيا تبوس تقول عندها عام ماشفتني ولوقت هذاك كانت بدات تحكي شوي بصح مش مفهومة هدرتها، يزيد بقا يتفرج فينا مدة من بعد خرج راك يتوضى وانا سخنت لماكلة وجبدت تمر ولبن من لفريجيدار كل واحد حطيت قدامو 3 تمرات، آذن المغرب كسرنا صيامنا وروحنا نصليو كامل مع بعض يزيد من لقدام وانا وعجوزتي من وراه ندى حطيتها فلرض تلعب وتلاغي هو مابغاش يروح للجامع لانو بعيد ومور لفطور يروح هو ويماه يصليو صلاة التراويح انا مصلحتليش نروح مكانش وين نحط ندى تالي نروح معاهم. فطرنا مع بعض اول رمضان يفوت عليا وانا هانية وفرحانة لا مشاكل لا عياط لا ذل لا والو الحمدلله كي تهنيت منهم هي صح توحشتهم مهما دارو يبقاو اهلي عشت عمري كامل معاهم مش بالساهل باش ننساهم. لميت لماعن هذوك تقول يولدو ماجيت نكملهم حتى تكسر ظهري يما ويزيد خرجو راحو يصليو وانا بقيت فزرت كلش وروحت نلعب مع ندى شوي نسيتها اليوم وحتى هي تقول حست بلي أهملتها، بقيت معاها حتى رقدت توضيت وصليت وقريت شوي في المصحف ماروحتش لتراويح قولت نختم المصحف في شهر هذا. دخلت يما ويزيد ومعاهم مرت عمو وبنتها ايواك ربحت ثاني هذي المخلوقة شاجابها لعندي منحملهاش انا من عند ربي عبد كي منرتاحلوش تخرج من وراه حاجة.
#فريال