فاقد الشيء يعطيه

الجزء 46

#فاقد_الشيء_يعطيه
#شمس
#بقلم_فريال
الجزء 46
كي كمل باش فاق بواش صرا قالي متزيديش تخلي لباب محلول ذوك راهي تهدر مش كيف قبل عسيها _ علاه انا انت الي هجمت عليا ماخليتني ندير والو _ معليش ماصرا والو _ تكون حكات ليماك كلش ذوك وين نحط وجهي انا _ عادي ياعمري ماتحشمي ماوالو اذا سقساتك قوليلها كان يوسع فالطريق لولدو باش يجي _ يااااع والله ماتحشم _ علاه نحشم ياك مع مرتي وكامل يديرو هكا حتى لعجوز كانت دير هكا يبالك جابتني بالصلاة هاي باينة هي وشايب دارو كلش وذوك كي جات في يزيد يحبس ويحشم ومن ليوم اقفلي ر** لباب خليني نخدم في عقلي _ وين علبالي بلي يروحو ذوك انت مزروب رديتو برك يماك مش موالفة تجي ندى الي صدمت ديراكت _ ايه بدات تحرم على باباها الحلوفة. نهار هذاك ماخرجتش من شومبرتي خلاص حشمت مت حتى دخلت عندي لعجوز قالتلي مريضة _ لالا _ علاه مخرجتيش امالا _ هو يعني _ ااا حشمتي متخافيش سرك في بير يابنتي وليدي ونعرفو مايحشمش وياك حلالك عادي باينة بلي ديرو شي هذاك ودليل كرشك الي سابقاتك ماتحشمي مني ماوالو راني يماك انا _ ربي يحفظك يما (ملي حكيتلها بلي امنية حياتي ننطق ونقول كلمة ماما من ثم حلفتني نبقى ديما نعيطلها ماما وهي حاطتني بنتها مع لول كنت نغلط نقولها خالتي بصح ذوك صاي ديما نقولها يما). ولدت وجبت طفل سميناه ضياء الدين يشبه لباباه بزاف وبعدها ب4 شهر زدت حملت غلطة جبت طفل ثاني سميناه بهاء يشبهلي انا بزاف. ضرك عندي 5 سنين زواج عايشة متهنية مع راجلي ووليداتي عندي 3 هوما نور عيوني ندى وضياء وبهاء وصراحة ندى هي اعز وحدة عندي يخلطولي في عينيا ومايقيسوهاش هي (نشوف فيها صورتي كي كنت صغيرة) تضل تحلل فيا تقولي جيبيلي ختي نلعب معاها وحتى انا متمنية نجيب طفلة بصح مزال ولادي صغار نخليهم يكبرو شوي ونزيد واذا جبت طفلة نسميها جمان الاسم هذا نحبو بزاف. بلا ماننسى ماما (عجوزتي ) نعم الام تاع صح واقفة معايا ديما معاونتني فلولاد تحن عليا خير من والديا عطاتني لحنانة الي كنت مشتاقتها ربي يطول في عمرها ويحفظهالنا. يزيد تبدل معايا بزاف رجع حنين ويموت عليا وانا تاني ولا كل عام يطلعنا لبلاد نحوسو الترك تونس فرنسا ورانا معولين نروحو عمرة لاكتب ربي، معيشني في جنة حاجة ماتخصني معاه لمعيشة هذي ماكنتش نحلم بيها اصلا، ربي عوضني على واش عانيت في حياتي بأجمل واحن عائلة بالنسبة لدارنا منين ذاك نروح ليهم سويعة ونخرج على جال لواجب لا اكثر ولا أقل اما لمرا لي جابتني لحد الان ماشفتهاش ومانيش ناوية نشوفها وماعندي ماندير بيها الي رماني وماحوسش عليا انا تاني منحوسش عليه. سهيلة تزوجت بعد عدة محاولات منها باش تدي يزيد مني لدرجة انها تهماتو بلي دار معاها علاقة وكسرها وبغاتو يتزوجها ويسترها بصح هو كشفها وخلاها عتارفت بكلش وبلي مش هو الي كسرها وذوك تزوجت مع لي كسرها وماهيش تجينا للدار اطلاقا. ندى لحد الان ماعلابالهاش بلي انا مانيش يماها عندها قريب 7سنين معولة نديها لطبيب نفسي وهو يمهدلها للموضوع بحكم انو ماتتلاقاش بيماها الحقيقة بزاف تشوفها مرة فالعام هي متزوجة بعيد كي تجي وتقوللها انا ماماك ماتأمنهاش حاطة بلي انا يماها وهي بنتي وصح هي بنتي الي ماجبتهاش من كرشي (الام هي الي تربي مش الي تولد). هذي هي حكايتي حبيت نحكيها نفرغ قلبي برك ونحب نقولك بلي فاقد الشيء يعطيه وبشدة يحاول يعوض النقص الي عاشو ويمدو لغيرو باش يرتاح، نتمنى تكون عجبتكم قصتي وستفدتو منها.
النـــــــهـــــــايـــــــــــــة