فاقد الشيء يعطيه

الجزء 12

#فاقد_الشيء_يعطيه
#شمس
#بقلم_فريال
الجزء 12
فاتو ليام ووصل يوم الاربعاء اليوم حنتي الناس فرحانة وانا دمعتي على خدي تفكرت كامل وش جوزت في حياتي بلاك مكانش نهار فرحت فيه في حياتي من غير مرة وحدة هي نهار ديت الباك برك، راح تسقسيوني على خاوتي من بابا ولاد فضيلة وين راحو وعلاش منحكيش عليهم لانو بكل صراحة خاطيني صح ربيتهم وكنت نقريهم ونحن عليهم بصح ديما يماهم تضربهم كي تشوفهم يحضنوني ولا يبوسوني عليها رجعو يخافوها ( منار عندها 12سنة واحمد 11سنة). رحت للحفافة درت كواف سامبل ولبست القفطان لي جابوهولي هو الحاجة لمليحة الي عندي روحت لدار مع لعشية جاو لافامي ماشي بزاف عماتي وعمومي ونساهم وبناتهم ويمات فضيلة وجات عجوزتي وعمتو حناولي على محزمة تاع ذهب وجابولي زوج فاليزات معمرين بالقش ربي شاف فيا يتيمة مع انو والديا حيين عليها بعثلي لعجوز هذي ماخلات في قلبي والو، وهذوك لافامي تاعي زعما يشوفو غير بالعين ومستخسرين فيا لحوايج الي جابوهملي مشافوش وش عانيت وتعبت وعشت شافو غير وش عندي ذوك ولبست، فاتت اللمة على خير شطحنا وغنينا وزغرتنا لعجوز وعمتو روحو وحنا تفرق سوق. رحت حكمت بلاصتي رايحة نرقد ورجعت لعوايدي كيف لعادة بديت نخمم الراجل هذا ماعيط ماسقسى عليا حتى العرس هو لي حدد لادات لي لازم نحددوها انا وياها حسيت كاينة حاجة مش نورمال ومبعد قلت ضركا مابقى والو طفرت حتى وتكون كاش حاجة مانقدرش نتراجع العرس راه غدوا نتوكل على ربي وخلاص وراني مصلية من قبل صلاة الاستخارة ومرتاحة من هاذ الزواج. فطنت غدواعلى 7 توضيت صليت دعيت ربي يسهلي عرسي وحياتي جديدة، رحت للحفافة مع جارتنا هذا وش عندي غير هي لي تمشي معايا لا بنت عم ولا عمة ولا اخت توقف معايا بكيت حتى كرهت وسكتت وحدي باش تبدا  تخدملي لانو راحل لحال، خرجتني نهبل مع شعري لونو طبيعي خليتو كيما راه مانحبش ليماش والسبايغ هذوك. جا بابا داني ماشافش فيا اصلا وصلت للدار لبست لاغوب بلونش الي جابتهالي عجوزتي البارح وحتى دراهم الحفافة حطتهملي في يدي ربي يحفظها الشي الي قدرت عليه دارتهولي.خرجت بوبية انا وحسدت روحي قريت المعوذتين بداو يجو لافامي لي رايحين معايا وعمتي هذيك لي خطبني وليدها من ذاك النهار مازادتش جات لعندنا ذاك الوقت كامل داهم النيف عليها ومنبعد رجعو نورمال يجيو لعندنا.
#فريال