فاقد الشيء يعطيه

الجزء 22

#فاقد_الشيء_يعطيه
#شمس
#بقلم_فريال
الجزء 22
فاتو ليام وانا على نفس الحالة ندير كيما حاب هو الصباح نوض قبلو نوجدلو فطورو وكي يخرج تقولي يما ارجعي ترقدي على 10 نوض نقضي شغالاتي هو مايرجعش حتى للمغرب نحطو نتعشاو نغسل لماعن هو يقصر مع يماه وبنتو ويجي ليا يدي حقة ونرقدو مابيناتنا حتى تواصل من غير لفراش كلمة مايقولهالي واذا نطق يطلق سمو عليا نحسو يكرهني وحاقد عليا وانا مادرتلو والو ماسبيتو ماطيحتلو ماغلطت معاه من نهار جيت عندو وهو يذل فيا وهكاك وساكتة ومتحملة، الحاجة لمليحة الي صراتلي هي اني تهنيت في معيشتي معنديش مشاكل كبار كيما كي كنت في دارنا  يما دايرتني كي بنتها حنينة عليا تساعفني وتحبني من قلبها مش مجاملة وندى الي منسيتني في هموم دنيا كي نشوف ضحكتها ننسى حزني وهمي نقول معليش انا تمرمدت وعشت بلا ام وشتقت حضنها بصح هي بربي ان شاء الله منخليهاش تحتاج حاجة تعلقت بيها وهي تعلقت بيا، الحمدلله تهنيت شوي وعلى الأقل عايشة في هدوء عكس ما كنت عايشة في دارنا غير لعياط والضرب والسب ورخس وذل صح هنا يزيد يعاملني معاملة لخديمة فالنهار وفليل جارية بصح تبقى اهون من معاملة بابا ومرتو لحد الان هو مرفدش يدو عليا ومنقولش بلي تعاملو معايا جاني عادي لا بالعكس مقلقني تعاملو وبزاف ثاني قد ماحاولت نفسرو ماقدرتش نفهم علاه يعاملني هاك نجي نسقسي يما نقول بلاك هي حتماتو يتزوجني بصح نحشم هي دايرا في بالها بلي رانا عايشين كيما اي متزوجين عادي ومعندناش مشاكل حتى هو مايبينش قدامها. فات شهر ونص على عرسي طول لفترة هذي ماكانش الي سقسى عليا لا بابا لا مرتو وانا ماعنديش تيليفون باش نعيطلهم كان عندي حطبة قبل مانتزوج وداتو فضيلة بصح كانو قادرين يعيطو عند عجوزتي ولا عند يزيد على الاقل يسقسو عليا ذوك وش يقولو عليا اهلك رماوك ماسقساوش عليك تقول يتيمة وهي هذيك هي لحقيقة اهلي رماوني وتهناو مني ماسقساو ماجاو ياك لعروس في اليوم السابع تروح زيارة لدار باباها وهوما يديرولها لغدا ويكبرو بيها وبأهل راجلها بصح انا للاسف ماروحت ماعرضوني اخر مرة شفت بابا هي نهار خرجت من دارو وفضيلة شفتها في صبوحي تاعي فرات مازدتش لمحتهم عندهم الحق مايسقسوش عليا اذا ماما الي ولدتني ورماتني بدم بارد ماحوست ماسقسات ماوالو وش يجيني من لبرانية فضيلة مهما دارت وعملت فيا تبقى برانية العيب في بابا ويما خلاوني اما بنت ناس باينة متحنش فيا وتزيد تكرهني وتحاول تتخلص مني.
#فريال