فاقد الشيء يعطيه

الجزء 13

#فاقد_الشيء_يعطيه
#شمس
#بقلم_فريال
الجزء 13
لحق الكورتاج كنت قاعدة فالشومبرة دخلت فضيلة غلقت الباب وقدمت ليا قالتلي شوفي نقولك هدرة مانزيدش نعاودها هاذ الدار راكي تشوفي فيها بلاك في يوم من الايام ترجعي هنا غضبانة ولا محاوزة ولا مطلقة انا منستقبلكش خلي الشارع ياكلك ماترجعيش عندي تجي زيارة مرة فالوقت سويعة ماتفوتيهاش وترجعي لدارك، قالت كلامها وخرجت من قوة الصدمة من الشي الي سمعتو تبكمت حتى الدموع وماطاحوش قلت لعرايس يودعوهم ماليهم بالزغاريت ودموع الفرحة وانا ودعوني بالتهديد بصح عندها الحق هذي تبقى مرت بابا لي جابتني من كرشها وراهي سامحة فيا ماهي عارفتني لا حية ولا ميتة وش نستنى من البرانية ياخذوني بالاحضان. خرجت تحت جناح بابا زعما ماهدرش مامبا مع يزيد وقالو اتهلى فيها كيما يقولو باقي الاباء كنت حابة يقولو يالوكان بالكذب والتمثيل المهم يبينلو بلي عندي اهل في ظهري واقفين معايا بصح للاسف الشديد زادو خيبولي ظني فيهم وهنا بين لناس وليزيد بلي راه راميني وحاب يتهنى مني، خرجنا من لبلوك تاعنا(نسكنو في الباطيمات) نلقى الكارتي مڨلب بالبارود والخيالة دارلي عرس يهبل كأنو رايح يتزوج لأول مرة. ركبت معاه وانا نرعش ميتة بالخلعة كلمة ماهدرهاش معايا زاد كمل عليا من كل جيهة رافضيني ومنيش مرغوبة (نهار هذاك تاع صح حسيت روحي وحدي ويتيمة لا ام تحضني وتوصيني لا اب يوصي راجلي ويوقف معايا وفوقها زوج مش قابل بيا وباين من وجهو، من البداية باينة كيفاه راح تكون بقية حياتي وجهي وجه الهم والعذاب مصيري). وصلنا لاصال لقينا لغاشي بزاف والبارود دغير حالة، جا عاوني نزلت لقيت عجوزتي تستنى فينا قدام لباب بالتمر ولحليب وكلتنا هو راح وهي دخلتني ذيك لاصال بالطبع والشان لبنات لي يسربيو كامل لابسين لبسة وحدة الديجي الكاميرامان (هي مرا مفهمتش علاه يقولولها مان بصح متصلحش كي نرجعوها بالعربية تتكتب ومن نصهم يغلطو فيها هي هكا تتكتب بالانجليزي Camera woman ونتوما اقراوها كيف ماتحبو).بدات تصدر فيا الماشطة تصديرتها تهبل وحدة مور وحدة حتى كملت جاز العرس ولا في الاحلام عشاو لمعاريض وحتى انا تعشيت كليت لقمتين وحبست عيت والخلعة قتلتني حاسة قلبي راح يحبس من جيهة العرس يهبل صح مدارليش بابا بصح عجوزتي مخلات والو فقلبي ومن جيهة خايفة من يزيد الي يسموه راجلي سكوتو مخوفني وباين من وراه حاجة وطلع شكي في محلو سكوتو من وراه اعصار.
#فريال