#فاقد_الشيء_يعطيه
#شمس
#بقلم_فريال
الجزء 03
المهم الحياة لي عشتها خلاتني ضعيفة الشخصية وحشامة ونخاف حتى من خيالي دمرووووني نفسيا وحطمولي شخصيتي كنت نشوف فلبنات الي قدي كيفاه عايشين يلبسو يدورو يدافعو على حقهم عكسي انا كنت نسكت بزاف صح نقرا بصح حسي ما تسمعوهش وكي نتظلم نهبط راسي ونروح لدار لانو من صغري وانا نتضرب ونتعنف ماعنديش الي يوريلي كيفاه نجيب حقي بيدي ولا الي يداويلي جروحي كبرت وانا مزالني مجروحة ومدمرة من والديا ومرت بابا الي داروه فيا مايديروش العدو في عدو. نشفى في عامي تاع الباك كنا في عطلة الربيع عمتي ختنت لوليدها ودارت عرضة لخاوتها وخياتها وسلافها وسلافاتها، رحت انا مع فضيلة وخاوتي وكامل يعرفوني بلي مولات ذراع وهذا بفضل مرت بابا في كل وليمة تبعثني نخدم تلقاوني مع النساء فالكوزينة نخدم وندمر مكانش كامل لي يرحمني ويقولي اقعدي ترتاحي مزالك صغيرة على شغل هذا روحي تشطحي وتغني مع لبنات الي قدك بلاصتك مش في الكوزينة راكي جاية لدنيتك، هذا كامل من فضيلة وين تروح تقولهم اي شاطرة تخدم اديوها تعاونكم ليه ليه تكملو واي تحب شغل الكوزينة وانا ماعييت فيها تلهى بقرايتها ومتبعش شغل دار بصح متبغيش راسها خشين تقولي نقرا ونخدم نعاونك (منافقة بو زوج وجه الله يرفدها). حنا نطيبو ونشوف في واحد الجان داخل وخارج وعينو مانحاهاش مني انا من شكلو مارتحتلوش وماعجبنيش سقسيت بنت عمي قلتلها هذاك شكون قاتلي كيفاش ماعرفتيهش هذا عبد الله وليد عمتي لكبيرة كان عسكري وقليل وين يجي (انا مانروحش ليهم خلاص لا علاقة بيهم نتلاقاو غير في المناسبات وطبعا يديوني لدمير ولحريث برك عليها ماعرفتوش)، قالتلي بلي عندو 25 سنة وقليل وين يشوفوه وقتو كامل فالخدمة.جا ليا قالي وشراكي شمس لباس هذي غيبة قوتلو الحمد لله وانت _لباس _بصح كيفاش عرفتني بلي انا شمس _ كيفاش مانعرفكش شكون في عايلتنا عندها شعر صفر وعينين زورق منغير شمس بنت خالي مصطفى، ضحكت صحكة صفرة في وجهو وسكت بصح مارتحتلوش خصوصا طريقة هدرتو ونظراتو ليا معجبونيش وخرجو شكوكي في محلهم . فوتنا الختانة ورجعنا للدار فاتو يامات وجاتنا عمتي يمات عبد الله للدار بلاك عندها 10 سنين ماجاتش لينا ومدخلتش لدارنا، متضاربة مع بابا صح يهدرو مع بعض مش متنايفين بصح بيناتهم حساسية واحد مايروح للثاني وكل واحد شاد قدرو ودارو. قعدت مع بابا وفضيلة في الصالو وانا فالكوزينة نوجد فالقهوة ونسمع بحكم ساكنين في لوجمو الصالون قريب للكوزينة قالت لبابا عبد الله بعثني ليوم عليها جيت حاب يخطب شمس تالي اني منجيش خلاص، تحكي من فوق قلبها باين بلي جات بالسيف ومجبورة وباين ولدها ضغط عليها تالي والله ماتجي. انا قريب تغميت أولا مارتحتلوش لعبد الله هذاك عينو زايغة بزاف وباين بلي خلاط وواعر وثانيا مش حابة نتزوج بغيت نقرا ونجيب الباك ونكمل قرايتي ونخدم ونحقق احلامي بصح مش بيدي كلش بيد بابا واذا قالها هيه راني قابل يخلاص كلش تدمر حياتي كثر ماراهي مدمرة وننسى حاجة اسمها قراية وجاميعة.
#فريال
أنت تقرأ
فاقد الشيء يعطيه
General Fictionمعاناة طفلة صغيرة تخلت عنها امها وكانت امنيتها في هذه الحياة انت تقول كلمة ماما ولكن للاسف لم تجد حنان الام ولا الاب وعاشت محرومة منه
