فاقد الشيء يعطيه

الجزء 43

#فاقد_الشيء_يعطيه
#شمس
#بقلم_فريال
الجزء 43
وصلنا لدار انا نزلت وخليتو ماحكيت معاه ماشفت فيه (وش من وجه نقابل بيه الناس انا ذوك بابا بسلامتو علالي شاني بزاف)، طلعت لفوق مع دخلت جاتني ندى تجري تحضن فيا وتبكي وانا نبكي معاها سبة ولقيتها اصلا كانت غايضتني عمري بعد واش دارو فيا بابا ومرتو وكيفاه حاوزوني وطيحو بيا قدام يزيد. سلمت على عجوزتي قالتلي مزية درتي عقلك في راسك ورجعتي حاجة تافهة كيف هذي ماتستاهلش تخربي دارك على جالها يابنتي اذا بقيتي كل ماتناشعتو تروحي وتخرجي من دار راح يوالف بعدك وتفزد علاقتكم حابة تزعفي ازعفي هنا في دار قدامو ارواحي ارقدي عندي وخليه بصح متزيديش تخرجي من دار اذا مش على جالك على جال الملايكة هذي الي والفاتك وراهي تعيطلك ماما (قولتلها في قلبي حتى ويقتلني ذوك ماعندي وين نروح تحاوزت وواحد ماهو قابلني). فت لشومبرتي بدلت قشي وفت للكوزينة نوجد لعشا، يزيد ملي وصلني راح مادخلش خلاص مع لمغرب عيطلي وقالي وجدي روحك نجي نديك وخلي ندى عند يما، انا حرت علاه عيطلي من وكتاه يخرجني معاه وين راح يديني مثلا. وجدت روحي قولت ليما بلي راني خارجة معاه كي جا عيطلي هبطت لتحت لقيتو يستنى ركبت معاه نفس شي حرف ماقالو طول الطريق ساكتين حتى وصلنا عند ريسطورون جاية في بلاصة خالية غير شجر قدامها، دخلنا دوموندا لعشا ونفس الشي بقا ساكت شفتو كي شغل حاب يحكي ومتردد بقى على الحالة هذي حتى جابولنا لعشا كي بدينا ناكلو نطق واخيرا وحل فمو وياريتو مانطق ولا حكا وبقا ساكت ومخليني على نيتي ومانعرف عليه والو. علبالك انا تيتمت كي كنت صغير ويما تمرمدت حتى كبرتني وقراتني ورجعتني راجل قريت وخدمت ودرت طوموبيل وزوجت كيما كان لحال بلمرا الي خطبتهالي يما مكنتش حاب ندخل في اي علاقة ونجرجر بنت ناس معايا ونضيعلها وقتها من بعد نخليها ونربح دعوة شر كنت لاتي بخدمتي باش نوسعها ونوفر كلش ليما لانو تمرمدت باش كبرتني وانا اقل شي كان لازم عليا نرفعلها راسها، تزوجت كيما كان لحال درتلها عرس بالطبع وشان كنت نعاملها مليح اي حاجة تطلبها تحضر ماخليت والو في خاطرها كانت عايشة مع يما وانا كنت مينذاك نغيب على دار يامات بحكم خدمتي ونخليها معاها، واحد لمرة كنت خدام وعندي بزاف مروحتش لدار جاتني فرصة باش نروح توحشتهم ومكنتش مخبر اي واحد بلي راني جاي دخلت لدار وياريتني مادخلت لقيت مرتي مع عشيقها فوق سريري في وضع مقرف  يما ماكانتش في دار راحت لختها مريضة وانا لقيت مرتي تخون فيا في داري وانا نظل هامل برا ندمر، ماضربتها ماقستها مابغيت نوسخ يديا بيها متستاهلش رميت عليها طلاق وقولتلها نرجع منلقاكش في داري والراجل الي كان معاها هرب وخلاها.
#فريال