فاقد الشيء يعطيه

الجزء 16

#فاقد_الشيء_يعطيه
#شمس
#بقلم_فريال
الجزء 16
سقسيت لعجوز اذا نقدر نرقدها عندي في الشومبرة ضحكت وقالتلي وش فيها عادي دير وش تحبي ضرك راهي راقدة ومن غدوة عودي رقديها عندك، اخت لعجوز جا وليدها داها روحت بقيت نشايخ انا وياها قالتلي من اليوم عيطيلي يما شحال فرحت بهاذ الكلمة جامي قلتها وكانت حلم من احلامي لكبيرة (لبعض تجيه الكلمة هذي عادي ومش حاجة كبيرة بصح بالنسبة ليا حاجة عظيمة لانو جامي قولتها عليها يقولو مايحس بالجمرة غير بي كواتو ومايقدر الشي غير الي فقدو). رحت لشومبرتي قعدت نستنى في راجلي لعزيز الي مشفتوش من صباح ماعيط ماسقسى بصح الظاهر مطول بزاف حرت فيه عريس جديد ومخلي مرتو في ليلتها الثانية وحدها لدرجة هذي مش حاملني ومقدرش يقعد معايا، نعست عيت نزيد نسهر ونستناه رقدت من تعب ولعيا مافقتش غير مع الوحدة نشوف فيه دخل بدل حوايجو ورقد ماشافش حتى فيا ومعبرنيش مهتميتش بزاف غطيت على راسي وخبطتها برقدة. الصباح فطنت على يزيد يعيط عليا صوتو يخلع _ششششمس انا ماعرفتش وش صرا ولا وين راني نضت نرجف من الخلعة بابا ومرتو ركبو فيا الخلعة من صغر وكبرت معايا، خرجت من شومبرة نلقاه هو ويما واقفين قدام لباب تاع لكوزينة  نشوف في عينيه حومر من القلقة تخنزر فيا وقالي اسمعي انا ماجبتكش باش تصبحي راقدة ويما تنوض ديرلي لفطور وتوجدهولي من اليوم تنوضي قبلي وتوجديلي فطوري وتتهلاي في بنتي ويما ماتمس والو فهاذ الدار انا تزوجتك باش تربيلي بنتي لانو يما كبرت وماتقدر دير ولوكان نزيد ندخل ونلقاها تخدم وانت راقدة نتفاهم معاك لهذا اتقي شري خير ليك وليا مكلاه تخليني نتصرف معاك تصرف اخر نهار خطبتك كانو شرطي تقومي بيما وببنتي وانتوما قبلتو وانا قبلت بكل شروطكم لهذا مكلاه تعيني فهمتي قالتلو يما الله يهديك الطفلة مازال حنتها في يدها وانت تقوللها فهاذ الهدرة خليها تتعورس وليام الجاية تعود تنوض قبلك وحنا في عاداتنا لعروس سمانة ماتقيس والو وزيد مازالها صغيرة قالها يما ماشي كل دورة تقوليلي مازالت صغيرة علاه جبتيهالي كي عادت صغيرة ومش تاع مسؤولية انا وش ندير بيها، حاب يقولي بلي جاب بونيشة لدارو ومربية لبنتو مش مرا ليها وشريكة لحياتو. خبط الباب تاع الدروج وخرج قالتلي يما ماديرش عليه ارجعي ارقدي مكانش من قبل هكا عصبي ومقلق تبدل بزاف عندو عامين وهو على هاذ الحالة نهار كامل مقلق ويخبط لعجب مايعجبو، هي تحكي معايا وانا مازالني واقفة مانيش مستوعبة كامل وش صرا مزال مافطنت من صدمة هذي توقعت كلش غير انو يبهدلني راجلي مع صباح وقدام يماه.
#فريال