فاقد الشيء يعطيه

الجزء 40

#فاقد_الشيء_يعطيه
#شمس
#بقلم_فريال
الجزء 40
ايه ياراجلي انا بديت نفياق ونقعد في داري ونسكت وانت روح وصل القحبة لدارهم مليحة هذي ربحت عليا. هو خرج راح لعندهم لصالو يستنى فيهم يلبسو وانا قعدت نغلي وحدي، بلاك تقولو حاجة تافهة بصح انا خلاص غاضتني بزاف وصلت لنقطة لخرا صاي رايحة نطرطق لحق لموس لعظم ماقدرتش نزيد نحمل كثر عايشة مع راجل مابنت متزوجة مابنت خدامة نربيلو في بنتو متهليتلو في دارو ويماه وهو كلمة صحيتي مايقولهاليش يعرفني غير وقت لفراش انا قولت صاي تسڨن وتعدل شوي بصح هيهات والو الي معوج يبقى معوج عمرو يتعدل، علاه انا مانيش عبد مانحسش لهذي الدرجة ماعنديش الحق نتقلق نتعب نعيط نرتاح مكانش كنت صابرة ونقول معليش او هو هكا عقليتو عادي كلش يفوت هاني لباس بيا يما وندى معوضيني على كلش بصح ضرك صاي كي شفت بنت عمو في شومبرة شكيت فيه انو عندو علاقة بيها والي زاد كمل عليا كلامها. خرجو هوما هبطو لتحت ركبو معاه باش يوصلهم جيس ديمارا انا لبست حجابي ودرت خمار ورفدت دراهم قيس طرونسبور برك خليت كلش مارفدت لا تيليفون لا لقش لا والو مانسحق من عندو والو نحتاج كرامتي برك لي مسح بيها الارض طيلت شهور الي فاتو ومرمدها تمرميدة لكلاب. خرجت بالتخبية على يما علابالي لوكات تشوفني ماتخلينيش نخرج وتحاول تهديني وتفهمني بلي مكان والو وناس كامل يتناشعو وخلي يجي نحكي معاه ونفهمو وهو ولدها مايسمعش راسو خشين هو ولحيط كيف كيف. حكمت بيس ورحت للدار خلي نرجع لمعيشة الذل والسب ولمعايرات ولا التجاهل تاعو الي يحرقلي اعصابي نبقى عند فضيلة ولا نقابلو هو يخليني نهبل. وصلت لدار وياريتني ماجيت لعندهم طبطبت فتحتلي فضيلة قالتلي خير ماجابك (ناس تقول اهلا وش راكي لباس هي ديراكت عطاتهالي فلوجه) قولتلها جيت نقعد يامات عندي بزاف ماجيتش، تخنزرت فيا وراحت دخلت لشومبرة خاوتي نحيت حجابي ولبس جبة من تاوعي لقدم وبديت بالشغل طبعا اكيد كي تشوفني تقعد مادير والو مغرف ماتهزها وانا الي ندير كلش وهكاك منيش مليحة، بديت سيقت ديار كامل ومسحت لغبرة وفت للكوزينة حطيت ندير لعشا (الي موالف بالشقا عمرو يرتاح وانا هكذا وين نروح لازم نخدم من صغري وانا نهنبر ولوكان غير يقبلوهالي معليش)، انا واقفة نخدم حتى عيطتلي فضيلة رحت لعندها عطاتلي تيليفون تاعها قالتلي احكمي عجوزتك حابة تحكي معاك رفدتو وخرجت مستحيل نحكي قدامها نعرفها تشعلها بالخف وتقول لبابا اي صدت ومنقبلهاش هنا وترجع منين جات وتبدا بالمشاكل تاعها حتى تكرهلي حياتي.
#فريال