فاقد الشيء يعطيه

الجزء 08

#فاقد_الشيء_يعطيه
#شمس
#بقلم_فريال
الجزء 08
راحت فضيلة جابتلي قفطان من عند ختها ملبوس بصح متهليا فيه يبان جديد جاي سامبل جاني سير طاي (انا لاطاي تاعي40 هازة لخير بلا فايدة)، خدمنا شوي صابلي ومقروط ستيكينا الحالة بلي نقدرو عليه هذا كامل وفضيلة واقفة على كلش حابة تبين روحها قدام ناس بلي تحبني كي بنتها وباش يقبلو نتزوج وتتهنى مني وتفاضلها الساحة. وصل نهار الجمعة وانا ميتة بالخوف علابالي ولد العجوزة هذيك يطلب يشوفني وانا نحشم مانعرفش حتى نهدر مش موالفة قلت خلي هو يسقسيني وانا نجاوبو برك مانحكي ماندخص اصلا انا طبيعتي هكا الي يحكي معايا نردلو والي يسكت نسكت حتى انا ومنحاولش نجبد مواضيع معاه. جاتني جارتي جبدتلي شعري دارتلي مكياج سامبل لبست القفطان هذاك خرجت نهبل منعرف كعاد مش موالفة نعدل ونزوق عليها جاتني بيزار ولا غير ليوم حابة نكون باهية. بعد الظهر جا الراجل ويماه وعمتو برك جابو معاهم كل خير اصلا مرفهين حاجة ماتخصهم حنا من جيهتنا جات مرت عمي لكبير زعما كي عادت شوفة ماكثرناش قلنا كي تثبت نهار لفيونصاي نعرضو باقي لافامي. راجل قعد مع بابا في صالو ونسا في شومبرة، دخلت نسلم عليهم وهوما يصلو على النبي كي عجبتهم شفت لعجوزة رافدة طفلة صغيرة عندها واحد لعامين هكاك تهبل تقول بوبية بيضا حليب وشعرها كحل وعينيها ثاني كحولة تهبل تهبل. المهم العجوز قالت ذاك المقطع الي ديما يتكرر في كل شوفة جيناكم بالحسب والنسب طالبين راغبين يد بنتكم شمس لوليدنا يزيد عندو 36 سنة عوينة وحدة مات باباه وخلاهلي صغير مولا 10 سنين تمحنت عليه وكبرتو وقريتو ورجعتو راجل، اويلي وشنو هذا كثر مني ب15سنة وهاربي ربي والي كمل عليا كي قالت لعجوز لفضيلة ياك حكيتلك كلش وصارحتك من قبل بلي عندو طفلة وهاهي في حجري وهو مطلق متفاهمش مع مرتو وان شاء الله يتفاهم مع بنتكم هو وطليقتو ماكتبش المكتوب فتارقو كل واحد راح في طريقو هي عاودت الزواج وهو جاب بنتو ماحبش يخليها تتربى عند لغريب وباباها عايش ولباس بيه، حفيدتي عايشة معايا جابها باباها قبل 4شهر وهي عندها عام و9شهر مزالها صغيرة وتحتاج حنان الام وانا كبرت منيش نقدر نقوم بيها ونربيها وحدي وحابة قبل مانموت نتهنى عليها مش حابتها تتمرمد. قاعدة نشوف في شريط حياتي فات بين عينيا تخلطو عليا المشاعر منها جاني كبير عليا بزاف وفوقها مطلق و من جيهة غاضتني الطفلة لي نقولو عليها تيتمت ويماها فالحياة يعني نفس حكايتي ومنها تاني غاضتني عمري يعني انا وش خاصني حتى ندي واحد مزوج ومطلق وعندو طفلة لدرجة هذي الحياة قاسية عليا يعني كل مانقول تهنيت وجا الفرج وراح تضحكلي دنيا نتصدم ونرجع للالم والعذاب، مكتوب عليا التمرميد للممات.
#فريال