فاقد الشيء يعطيه

الجزء 09

#فاقد_الشيء_يعطيه
#شمس
#بقلم_فريال
الجزء 09
رفدت راسي نشوف في فضيلة عينيها لمعو حسيتها فرحت لانو راح تنتاقم مني ماشي غير هي لي تزوجت واحد مطلق وعندو طفلة كي شغل عمرت هذاك النقص لي كانت تحس بيه. نطقت فضيلة و قالتلها انا من جيهتي قابلة نمدلك طفلة، ايييه يادنيا كون جات عندي يما مستحيل تقبل تمدني لواحد مطلق عندي 21 سنة نتاجاتي مازالو يقراو وانا رايحة نتغبن ونتزوج واحد كبير عليا وفوقها مطلق. عيط بابا لفضيلة خرجت ليه منعرفوش قالها رجعت تزغرت عرفت بلي قبل بيه زغرتت عجوزتي ثاني وجبدت خاتم لبستهولي زادت قعدت شوي وراحت ماسقساونيش حتى اذا راني قابلة بهاذ الزواج ولا رافضاتو اصلا من وكتاه يديو رايي ويشاوروني انا لعبة بين يديهم هوما يقررو وانا نفذ بدون اعتراض لانو معنديش الحق نقرر ونخير الي يخرج عليا كعاد معنديش يما واقفة معايا. الي حيرني انا الراجل هذا وليد لعجوز كيفاه قبل يتزوج بيا وهو مشافنيش وماطلبش يشوفني اصلا ديراكت قبل بيا، قعدت ندي ونجيب نخمم ونعاود زعما راجل هذامعوق مهبول كشما بيه حتى مدخلش يشوفني ونشوفو بصح يماه باين عليها عاقلة لوكان جا ولدها مريض راهي قالتلي مخي رايح يتحرق انا هكاك حتى نسمع في بابا يقول لفضيلة انا قبلت بشروطو كامل _وش هوما شروطو قالي مانقبلهاش تكمل قراية وتظل طالعة وهابطة خلاص لاليصونص بزاف عليها ماعندها مادير بالماستر وتربيلي الطفلة وهو قبل بشروطي الي حطيتهم كامل ضحكت فضيلة قاتلو تهنينا من الهم هذي وربحنا نسيب مرفه. ايه يادنيا انا هم عليه والراجل الي خاطبني مليح كعاد عندو الدراهم بصح يادرا وش شرطلو بابا وهو قبل بكل بساطة تعيا وتبان ويتوضح كلش. رحت نفرز فالحالة وبالي مع هاذ الخطبة الي جات فجأة وحتى الطفلة الصغيرة قلبي تعلق بيها من اول ماشفتها قسمتلي قلبي وغاضتني قلت خلي نقبل نتزوج ونربيها نربح فيها اجر ونديرها كي بنتي الذل والضرب والمعاناة الي شفتهم انا من عند مرت بابا هي ان شاء الله ماتشوفهمش وريح مايقيسهاش معايا. فاتت على الخطبة شهر ونص وانا كي شغل ماتخطبت ماوالو لاجهاز كيف لبنات لا توجاد لا والو ضاربين النح مش مقيميني خلاص وانا خصني نغلط وننطق ونقولهم كاش حاجةليوم هذاك يفوت عليا كحل مافهمتش وش بيهم يا منا حابين يتهناو مني وهوما ماشراولي حتى شليقة نديها معايا في جهازي على حساب سكوتهم هذا فيها إن ماعيطو لراجل ماسقساو عليه ماحوسو يفهمو علاه طلق مرتو ووش يخدم واذا ناس ملاح ولا خاطي والو تقول رايحين يمدولو حمارة مش عبد فضيلة من بكري تكرهني ولوكان تلقى تمدني لكلوشار كي والو بصح بابا ياك انا بنتو من لحمو ودمو كيفاه ماحوسش يسقسي على راجل الي خطب بنتو شي عجب والله يعجز اللسان عن تعبير فهاذ الحالة.
#فريال