فاقد الشيء يعطيه

الجزء 17

#فاقد_الشيء_يعطيه
#شمس
#بقلم_فريال
الجزء 17
سمعت ندى تبكي رحت ليها رفدتها بقيت نسكت فيها ويما دارتلها بيبرونة عطاتهالي رضعتها ودخلتها معايا لشومبرتي درتها في حضني ورقدتها رقدت ليه ليه مطولتش حطت يدها جيهة صدري وحكمت الروبة تاعي كمشتها في يدها تقول رايحة نهرب وخافت تبقى وحدها،بداو دموعي يطيحو شوي عليها وشوي عليا وعلى زهري لمعوج كنت حاطة بلي الدنيا بدات تضحكلي والايام تتسڨملي بصح الظاهر ماعندي زهر لا في الصغر ولا لكبر، بقيت نطبطب على ظهر ندى وهي راقدة حتى غفيت وانا قاعدة هكاك وساندة ظهري للحيط. مع ال10 نضت بدلت حوايجي وخرجت ندى ثاني ناضت بدلتلها حوايجها وفطرتها وفطرت ماما انا كي كملت قلت نشمر على يديا ونبدا فالشغل ماني تاع تعرويس ماهو تاع وجهي انا وجهي وجه تمرميد وشغل وش يجيكم من وحدة دخلت للكوزينة على 6سنين من صغري نسوفري ومزال نزيد نسوفري كثر وكثر، قد ما حاولت معايا يما خلي عليك حطي مديري والو مزالك عروس جديدة ومديريش عليه هو من بكري مقلق هكا والو مدرتش عليها قتلها غير اقعدي انا ندير كلش مكلاه تعبي روحك. بديت بلغدا درتو يطيب درت طاجين الزيتون وزدت شوربة وغراتان تاع سلق (تهبل بزاف انا وحدة من ناس نموت عليها) وزدت حميص سلاطة. جزت على البيوت خملتهم ومسحتهم  كانو نظاف بصح انا بكل صراحة خفت من يزيد يرجع ويلقاني قاعدة ماندير والو ويرجع عليا يعود يضربني انا بطبعي خوافة وهذا بفضل صغري الي فات عليا يهبل بزاف لدرجة وليت نخاف من خيالي بعد. كي كملت روحت جبت سرير ندى وحطيتو عندي فالشومبرة هكا خير ماتبقى وحدها وزيد انا ثاني نلهى بيها ونحاول نمدلها لحنانة الي فقدتها انا وملقيتهاش في صغري. حق وقت لغدا روحت لعند عجوزتي قولتلها نحط ولا نستناو يزيد قالتلي مكلاه تستنايه وبلي هو مايدخلش ذوك حتى يلحق ليل باش يجي، ايا تهنيت منو هكا خير مايدخل ويبقى يعيط عليا ويسبني وانا مش ناقصني بهادل كيما تاع صباح. روحت حطيت تغدينا انا وياها كملت لملمت كلش وغسلت لماعن عيات فيا خلي انا نغسلهم روحي ترتاحي من صباح واقفة وراكي عروس جديدة مجاياش تخدمي قولتلها عادي موالفة نخدم دخلت للكوزينة وانا صغيرة _ على قداش دخلتيها _ بلا مانحس قولتلها دخلتها على 6 سنين خبطت في فخاضها وقالتلي متقوليش مرت باباك سيفت عليك تخدمي، فقت مع روحي وحاولت نعدلها قولتلها لا انا بغيت وكنت وحدي منحبش نقعد ايا دخلت نتونس ونلعب برك حاجة خفيفة _ ايه يابنتي خلعتيني انا قولت كانو معذبينك في صغرك لانو الي تروحلو يماه يقعد يتمرمد ومرت الاب صعيبة بزاف ومذابيا تحطي ندى كيف بنتك انت عشتي وشفتي وتعرفي وش معناتها تعيشي بعيدة على يماك _ ايه علبالي ونعرف الشعور هذاك صعيبة بزاف ومتخافيش ندى نديرها في عينيا هذيك بنتي _ ربي يحفظك _امين يارب تعيشي ويحفظك مام انت لينا.
#فريال