فاقد الشيء يعطيه

الجزء 11

#فاقد_الشيء_يعطيه
#شمس
#بقلم_فريال
الجزء 11
دخلنا عقدنا مطولناش بزاف مع كملنا ولعجوز تطلقها بتزغرية، خرجنا لبرا جابتلي عجوزتي صاشيات بزاف وعطاتهملي سقساتني على لجهاز قالتلي قريب تكملي قتلها مزال ولوكان تشوفني شليقة ماشريتهاش ومشكيتش نشريها، المهم يابنتي ماتجيبيش لفراش جيبي غير لبستك والتصديرة راكي تلقاي الماشطة هي لي تصدرك ولاغوب وكلش علينا، ماعلاباليش علاه دارت هكا بلاك كي شافتني زوالية ومعنديش ولا تكون عرفت بمعاملة اهلي ليا بصح شكون يقولها مضنيتش فضيلة تحكيلها مستحيل تقولها الحقيقة وتشوه صورتها قدام الناس ديما تحاول تبين بلي هي مرت اب مثالية وكيفها مكانش. هبطت راسي حشمت طلعتهولي وقالتلي انا هي يماك ماتحشميش مني لي تخصك قوليلي عليها سلمت على جبينها وقلتلها ربي يخليك لينا _ ويخليك لينا مام انت يابنتي ايا نخليك ذوك ابنتي بالسلامة، شعوري في ذاك الوقت مزيج بين الفرح والحزن فرحت كي صبت عجوزتي تحن عليا وتعاملني كي بنتها وحزنت كي تفكرت يما لي أصلا مانشفاش عليها كيفاه مدايرة كون جات ميتة خير وخير نترحم عليها ونبكي ونحزن ونتفكرها بالملاحة بصح هي عايشة ومتهنية كأنو ماولدت ماخلات طفلة من وراها. رجعنا للدار دخلت قابلتني فضيلة قالتلي مبروك عليا تهنيت منك خزرت فيها وفت بدلت قشي وفتحت هذوك الصاشيات لقيت فيهم كل خير الله يبارك مكياج كوسميتيك قفطان بلوغوا يهبل بصباطو بالبوشات تاعو. من غدوة ذاك وليت نخرج مع جارتنا نجهز المهم هذوك 10 ملاين كامل درتهم لبسة برك قش الدار وقش تاع الخرجة ونويزات ودوبياس راكم عارفين صوالح هذوك كامل ديتهم ماكثرتش بزاف هذا وش جابلي شرط تاعي وزدت شريت باغوغ بلاكي قلت نديرو في رقبتي برك علابالي بابا دورو مايعطيهوليش وانا منڨاشة ماعنديش باشنديرها في وذني اصلا مادارولي والو من صغري محسسيني بلي علة عليهم وزايدة فهاذ الدار. كملت كلش والحاصول قشي هذا كامل جاني في زوج فاليزات كبار وفاليزة صغيرة حطيت فيها الكوسميتيك والمكياج، شفتو نتوما كشما عروسة تخرج من دار باباها بزوج فاليزات؟ جامي اقل شيء تدي معاها 5فاليزات بلا لفراشات وصوالح لخرين لانو يماها مترضاش تخرج بنتها بلا جهاز وباباها ميقبلش بنتو تروح ويديها فارغين هذو نقدرو نقولو عليهم والدين صح اما الي جابوني انا خسارة فيهم كلمة اب وام، بكيت مخ راسي ذاك النهار وانا نطبق في شورتي زعما ههههه وش من شورة ماتتسماش حتى.
#فريال