فاقد الشيء يعطيه

الجزء 21

#فاقد_الشيء_يعطيه
#شمس
#بقلم_فريال
الجزء 21
فقت صباح عليه ينوض فيا كان ينشف في شعرو ويعيط عليا نوضي اييي انت (تقول معنديش اسم) كي حليت عينيا قالي وش تفاهمنا ياك قولت كل صباح نوض نلقاك وجدتيلي فطوري متفهيش ولا تلعبيها متفهميش منبقاش كل صباح نعاود في نفس الهدرة، انا بقيت نشوف فيه تعجبت من خلق ربي ناس تقول صباح الخير من بعد تطلب لفطور مش يصبح يعرشلي تقول كاش كلبة عندو مكفاش الشي الي دارو فيا لبارح بغا يكمل عليا صباح هذي. كي شافني منضتش وبقيت مصمطاتو جا حكمني من يدي وجبدني جيت واقفة هكاك ماني لابسة والو كنت متغطية بالكوفريطة وطاحت بان كلش شفتو كي بقا يشوف فيا وليه ليه دور وجه قالي استري عليا روحك وامشي قدامي حطيلي نفطر راح لحال عليا، خرج وخلاني واقفة هكاك رجليا نرجف من لوجع الي شادني وبالسيف مالبست قشي دڨدڨني الحلوف لبارح وذوك حاب يكمل عليا زعما حشم دور وجهو كي شافني عريانة ولبارح كي كان ينهش في لحمي ماحشمش ياخي بغل ياخي ناس تتزوج بناس عندهم عقل وانا تزوجت ببغل مخو محروق عندو خلل فنهار يحشم وفليل يطير لحشمة. لحت روبا لقيتها فلخزانة جاية عريضة وتلحق حد ركبة عيت نتحرك نمشي ونسب وندعي عليه نبان زي هذيك الي زيدت وزادو فيها لوكان يبقى يديرلي هكا كل ليلة يرجعها كثر من دخلة تاع سطيف. رحت حطيتلو يفطر كي كمل خليت كلش فوق طابلة ورجعت نرقد عيانة ميتة ومكانش بزاف شغل واحد ماناض من غير المكلوب تاعي مايرقدش بكري وصباح يصبح زي السردوك مايتعب ماوالو. لحقت 10نضت دوشت وفرزت شوي وطيبت لغدا وفوت ندى لدوش دوشتها صغرونة تهبل تتاكل كل شوي نبوسها لعجوز كي شافتني مش قادرة نتحرك كي شغل فهمت ومبغاتش تحرجني خلاتني على راحتي نمشي زي لبطريق كل رجل في جيهة. تغدينا ورقدنا كيما موالفين فليل زاد جا يزيد انا قولت يتعشا يرقد من تعب ويخليني في حالي بعد عملتو تاع لبارح يبعد عليا حتى نرتاح بصح هو والو تقول روبوت مايتعب ماينعس زاد طلبني وكان موجدلي حتى وش نلبس واحد شرويقة مافيها مايصلح هي انا نتعرالو مع لخر وعلاه امالا يخسر دراهمو على لحوايج هذو مافيهم مايعجب زوج خيوط ولصقوهم في بعض ويبيعوهم لناس وغير لحمار الي يشريهم، شدني يزيد وعاود دار فيا نفس لعملة تاع لبارح ولمرة هذي رقدت انا وخليتو ماستنيتوش يعطيني بظهرو انا الي مديتلو بظهري وغفيت حسيت بيه كي غطاني بصح مقدرتش نحل عينيا تعبت.
#فريال