#فاقد_الشيء_يعطيه
#شمس
#بقلم_فريال
الجزء 30
فاتو يامات رمضان ملاح يهبلو نصبح راقدة حتى نشبع ونوض للكوزينة نوجد لفطور وانا كل يوم نوع فالطياب اصلا من صغري وانا نطيب وزيد كي درت التيليفون نشوف ليغوسات الجدد من اليوتيوب ونطيب ويزيد الشي الي نقولو جيبو يجيبو وانا نخدم ونوع وفليل هوما يروحو يصليو التراويح وانا نبقى نصلي في دار ونتونس مع ندى كي يكملو مرات يجيو دار عمومو وبنت عمو الصامطة هذيك وساعات تجي خالتو كل مرة يجي واحد. كي بقاو 10 ايام على العيد جا يزيد مع لعشية رافد بزاف صواشي بدا يفتح ويوريلنا كسوة يما جابلها جبة وجلابة وخيمار وصاك وصباط( هذوك طبيين لانو هي مريضة برجليها) وكسوة ندى ثاني تهبل جابلها روبة فالغوج جاية ستيل برانساس مع صباط فلكحل وسارتات وليبافان وزادلها شورط وبيستي فلبيض ومساسك وشوشوات وزادلها ڨورمات تاع ذهب سامبل تهبل. قالي هاكي قيسيلها باش اذا ماجاتهاش نبدللها، قستلها جاو قدها وانا عطالي الصواشي لي بقاو فتحتهم نلقاهم لوازم الحلوى كنت ديجا وصيتو يجيبلي ولا نقولو هو قالي وش نجيبلك باش ديري الحلوة تاع لعيد مزروب بزاف وعندو الحق ياربي نبدا نخدم باش نكمل في الوقت لانو على حساب وش قالتلي يما يجيوهم ضياف بزاف ويحبو يتلمو كامل مع بعض. انا باش نقول ماغاضتني بالعكس غاضتني بقيت نحكي مع روحي(النسا كامل فيهم العفسة هذي يبقاو يتمتمو ويحكيو مع رواحهم)، ياااه صافي انا وجهي ماهوش تاع كسوة العيد رمضان كامل وانا مشوطة فالكوزينة نبدع ونوع ونزوق فالاطباق باش يعجبوهم وضرك كسوة مانستاهلهاش ونزيد نخدم الحلوى ربحت عليا غميتها في قلبي وسكتت ماحكيت مابغيت نبين، هي انا صح ماحسدتش يما وندى ربي يعطيهم يما تنحيها من لحمها وتعطيهالي حاطتني في عينيها متفرقش بيني وبين ولدها وندى كون نجيب ولاد مانعزهمش كيما هي بلاصتها وحدها نشوف فيها صورتي كيما كنت صغيرة ويتيمة وواحد ماهو معبرني عليها دخلت قلبي من نهار شفتها قررت نحطها بنتي ومانقص عليها والو. بديت نخدم فالحلوى بديت بالمقروط وزدت لعرايش وبقلاوة وقريوش وغريبية تشاراك العريان باللوز وزدت تشاراك لمسكر وكعيكعات دزيريات زدت صابلي سامبل هذاك هكاك وكنت خايفة ميكفيوش وزيد هذا اول عيد نفوتو عندهم ويجيو لافامي تاعو لازم ندير كلش بالطبع وشان ومنخليلهمش المجال باش يحلو فامهم ويهدرو خصوصا بنت عمو المعوجة هذيك لوكان نلقى مانشوفهاش خلاص وجه لخلا لصقة زي لڨرادة.
#فريال
أنت تقرأ
فاقد الشيء يعطيه
General Fictionمعاناة طفلة صغيرة تخلت عنها امها وكانت امنيتها في هذه الحياة انت تقول كلمة ماما ولكن للاسف لم تجد حنان الام ولا الاب وعاشت محرومة منه
