فاقد الشيء يعطيه

الجزء 44

#فاقد_الشيء_يعطيه
#شمس
#بقلم_فريال
الجزء 44
خرجت من دار وهملت بعدت طول على دار هذيك عيطتلي يما قالتلي وينك ووعلاش طلقتها وراهي عيطتلي تبكي ومرتك بالحمل مجاياش ترميها وكيفاه دير لبنتك وتتمرمد ماخلات ماقالتلي وبدات تبكي حكيتلها كلش كلش سكتت ضربة وحدة وانا من نهار هذاك كرهت وعفت نسا وفقدت الثقة فيهم نهائيا نشوف فيهم كامل خاينات وخداعات. رفعت عليها دعوة طلاق وطلقتها من الجلسة لولى دار هذيك بعتها وشريت دار هنا مابغيتش نبقى قريب من الكارتي هذاك يفكرني بالغدر والخيانة تاع لكلبة هذيك، بعد ماولدت الكلبة في دارهم درت تحليل ADN ومن حقي نديرو لانو اي واحد في بلاصتي راح ينكر وميعترفش اصلا بالبيبي لانو الشي الي شفتو مايتقبلو لا لعقل لا لمنطق، درت تحليل وكيما كان لحال ظهرت ندى بنتي هكاك ومبغيتش نحيهالها هي معندها حتى ذنب في الشي الي صرا خليت الحضانة ليماها حتى تزوجت باش نحيتهالها جبت بنتي عندي مستحيل نخليها تتربى عند راجل براني. بعدها يما بقات عڨابي حتى قبلت نتزوج شافاتك في العرس وقنعتني نجي وانا قبلت قولت نديرلها وش بغات وكانت مريضة لثم مبغيتش نزعفها مني نقولك الصراحة انا مكنتش ناوي نعاود نتزوج خلاص  وتزوجتك على جال يما ونهار لعقد كنت ناوي نبطل ونفرق سوق مبغيتش نظلمك معايا معندك حتى ذنب (مجبدش خلاص حكاية شرط وبلي بابا باعني مبغاش يجرحني)، نهار شفتك ماخليتي فيا عقل تقدري تقولي اعجاب مع لول قولت صاي متقدرش تبطل ونفسخ كلش ذرك طفرت يسموك تتزوجها على جال يماك وبنتك هكا كنت نقنع في روحي باش منضعفش قدامك كنت خايف تكوني كيما هي وتغدريني عليها كنت نعاملك هكاك بغيت نبينلك اسوء مافيا باش تخافيني وحتى كي كنت نتوشيك نحاول نشد روحي باش منعتارفش بحبي ليك كنت نعنفك ونروح فيها مقدرتش نسايسك درت فيك هبالي كامل وكنت منشبعش عليها نطلبك ديما، شفتك كيفاه تعاملي ندى كأنها بنتك صدقيني يماها ومديرلهاش هكا ربيتيلي بنتي وصبرتي على هبالي حتى ليوم كي غرتي من سهيلة فرحت ومابغيتش مبين كنت ناوي بعد مانوصلهم نرجع نحكي معاك ونتفاهمو بصح انت كنتي عند كلمتك ومقعدتيش في دار (عجبتني حاجة تانية فيه ماجبدليش كامل وش صرا في دارنا وكيفاه حاوزوني). هو يحكي وانا نبكي غاضني بزاف تمرمد في حياتو وتغدر من حقو يشك ويكره نسا الخيانة واعرة بزاف، نطقت انا قولتلو عليها مبغيتش تجيب مني لولاد عفتني _ وشنو كيفاه هذي عفتك _ باينة لانو انت كنت مداير لعزل ومتعمد متجيبش شهوتك فيا _ حبسي نفهمك انا مابغيتش نكرشك باش متحصليش في بيبي خلاف ندى كانت متعاباتك وكي شفتك ساكتة انا قولت انت تاني مبغيتيش لولاد عليها كملت في الشي هذا.
#فريال