فاقد الشيء يعطيه

الجزء 14

#فاقد_الشيء_يعطيه
#شمس
#بقلم_فريال
الجزء 14
قاعدة نشوف فالناس تشطح وتضحك وتزغرت تصور وانا وحدي لا والي لا تالي نشوف بالعين برك حتى جاتني بنت عم يزيد تتعوج وحدها تقول خبطها تريسيتي كلش فيها يردح وحدو قالتلي قاتلك عجوزتك وجدي روحك راه جاي يزييد تقول فيها بطريقة تعيف وخصوصا كيفاش نطقت اسمو يزيييد وشددت على الياء تقول تاعها وتتخنزر فيا تقول ديتلها رزق باباها لوكان تشدني تقتلني بأبشع طريقة ومايبردش قلبه، قولت في قلبي وش بيها هذي ثاني ناقصة همها فوق الخلعة لي راهي تحك فيا زادتلي لالة لمقودة. لبست لاغوب بلونش وعدلت روحي دخل خرجني من الباب تاع الشومبرة ورحنا قطعنا لابياس مونتي وكلني ووكلتو شطحنا تصورنا صراحة ماكنتش نستنى فيها منو درت في بالي هو راه معرس من قبل مايعاودش لعرس واذا عاودو حاجة خفيفة برك بصح هوما جبرو بخاطري ودارولي عرس مقلب كامل مكمل كيما تحلم بيه اي طفلة (منبعد عرفت بلي عجوزتي هي لي اصرت عليه باش ديرلي عرس هاك قاتلو راهي صغيرة وهذي فرحتها الاولى ماتخيبهاش وتخليها في خاطرها). كملنا لبست البرنوس وخرجنا ركبت معاه وديمارا ثان تقول بكوش كلمة مانطقهاش لاتي مع طريق مشافش فيا اصلا، اااو وشبيه هذا كون ماجاش راجل طول وعرض نقول محتمينو على هاذ الزواج بصح راهو كبير ويعرف صلاحو وعلى حساب ماشفت مايخاف من حتى واحد رايو يديرو. وصلنا للاوتال وطلعنا للشمبرة ولا نقول سويت كامل يهبل لكل صراحة جامي تخيلت اني نجي ليه اصلا انا عشت حياتي كامل محڨورة معنديش الحق نحلم ولا نشوف لحاجة اكبر مني كانو ابسط احلامي اني ننطق كلمة ماما برك ماكنتش نهتم بالجانب المادي قد مانهتم بالجانب النفسي، كي درت عرس مليح وفات بلا مشاكل قلت في قلبي وقيلا بدات تضحكلك الدنيا ياشمس وهي الظاهر الدنيا كانت تضحك عليا وانا ما جايبة خبر لوالو. دخلت لدوش ماجيت نحل شعري بالسيف زدت نحيت لاغوب وحدي  ماحبيتش نقولو عاوني وهو ديجا مشنف وميحكيش مجاياش نحكي معاه يديها في روحو، دوشت لبست ديزابي فلبيض وفوقو طقم الصلاة وخرجت هو ثان دخل دوش وخرج صلينا مع بعض حط يدو فوق راسي وقرا دعاء تخيلو دار هذو كامل والصمت سيد الموقف حرف ماقالهولي. رفدت سجادة طبقتها وحطيتها فوق طابلة دار ليا لقاني نرعش قالي خايفة درتلو براسي هيه قالي ماتخافيش ليلة وتفوت منها مازادش نطق بكلمة حتى قالي مبروك عليك، ليلة العمر الي كل طفلة تحلم بيها وتتمناها تفوت اجمل واروع ليلة انا فوتها عادي اقل من عادي كمل شغلو كأنو مجبور ويأدي في لخدمة الوطنية شتو هذاك الي يرغموه باش يخدم حاجة وهو ميبغيش ياك ينوض يخبط ويلبز المهم تكمل انا هكاك صرالي عاملني كأنو واجب لا حب لا رومانسية لا بوسة لا تحضينة كمل ناض دوش ورجع رقد عطاني بظهرو خلاني نتلوى وحدي حتى رقدت شوي من لوجع وشوي من تعب طحت حطبة نهار هذاك تقول عندي عام مارقدت ماخممت في والو لأول مرة مانخممش فواش فات عليا ولا وش راهو جاي.
#فريال