فاقد الشيء يعطيه

الجزء 19

#فاقد_الشيء_يعطيه
#شمس
#بقلم_فريال
الجزء 19
ماحسيناش بالوقت خلاص حتى سمعنا المغرب يآذن صلينا ورحنا للكوزينة هي قعدت وانا بديت نوجد في الطابلة مع كملت دخل يزيد لاح سلام باس يماه على راسها وهز ندى بقا يبوس فيها ويحضن وحتى هي فرحت كي شافاتو للحظة غرت منهم كي شفتو محضن بنتو ويبوس فيها وباين بلي يحبها ومتعلق بيها على عكس بابا جامي باسني ولا حضني وملي راحت ماما وهو يعامل فيا معاملة الكلبة ومحملني مسؤولية طلاقهم تقول انا سبب في الشي الي صرا معاهم كنت كي نعيطلو ونقولو بابا يسبني ويضربني ميحملش يشوف وجهي اطلاقا(يديروها الوالدين ويسلكوها لولاد المتضرر الوحيد في الطلاق هم الاطفال يكونو عايشين في جو مليح فجأة يتقلب و يتبدل كلش عليهم يعيشو محرومين من حنان الاب ولا الام). تعشينا كامل مع بعض يما ويزيد يحكيو مع بعض هو يرد كلمة وقص ياكل وشاد بنتو في حجرو كل شوي يبوسها وانا تقول منبانش خلاص مشافش فيا ومقاليش حتى وش راكي، كلا خلص وفات لدوش يدوش وانا لميت وغسلت لماعن سيقت الكوزينة ماجيت نكمل لقيت العشا آذن روحت دوشت وتوضيت صليت هو ملقيتوش في شومبرة كان عند يماه الحاجة الي تعجبني فيه هو تعاملو مع يماه وبنتو محتارمهم ومقدرهم وكي يقعد لازم يفوت وقتو معاهم. لبست بيجامة تاع رقاد راح تقولولي عروس جديدة علاش متلبسيش نويزات وتعدلي وتزوقي لراجلك راح نقولهم بلي نحشم ومن حقي الراجل مش معبرني ومقيمنيش اصلا كيفاه نروح انا نتعرا ونقابلو باش يقول عليا ميتة على لفراش وجات ليا برجليها لا صح انا خوافة بصح كرامتي فوق الجميع منقدرش نطيح بروحي قدامو. ستنيتو يدخل طول ماجاش وانا نعست وبغيت نرقد ندى باش نرقد من وراها، كي شفتو طول روحت لعندهم لشومبرة لقيت يماه متسطحة وهو قاعد معاها وندى راقدة فوق صدرو شافت ليا يما قالتلي بنتي كشما بغيتي _ جيت باش نهز ندى نرقدها راح لحال وهي مزالها سهرانة مش مليحلها _ اي خليها تبات عندي اليامات هذو مزالك عروس جديدة، كي قالالي هكا هبطت راسي وحشمت وهذاك الدب تقول ماهو معانا هز بنتو حطها قدام يماه وقالها تصبحي بخير اذا بكات راني نجي نديها _ متتقلش راني هنا، هو خرج وانا بقيت واقفة زي لبهيم مش فاهمة والو انا هزيت سريرها لشومبرتي باش ترقد ديما معايا وهو حطها عند يماه وخرج ياك قالي جبتك على جال يما وبنتي وش يقصد ذوك اواه انا راح نهبل لوكان نبقى مع راجل هذا الشي الي خلاه بابا وفضيلة يكملو هو طرف عقل وراح يطير.
#فريال