انتهت و رجعت للغرفه و فكت شنطتها حطت قلوس و عطر
و رتبت شعرها ، ناظرت جوالها طافي شحنه رجعته
للشنطه ، انتهت و حطت الطرحه الواسعه على كتفها
لاحظتها حجمها يغطيها بالكامل يظهر اقدامها
و اطراف يديها خرجت نيتها تساعدها شمت ريحة
الطبخ تذكرت امها و تواجدها بالمطبخ لذة
طبخها و سرحت بخوف من مصيرها المجهول
صحت من نداها تعالي : سولفي علي
ساعدتها بتجهيز العشاء رغم حلف نوره بعدم لمس شي
بحكم انها ضيفتها . نور بهدوء : متعوده اساعد امي
نوره بحنيه : الله يخليها لك جهز الاكل بمناوشات حنونه
انتهى بجلسه بالحوش نوره : سمي يا امي لا تخجلين
خجلت من طلبها اللي جا ببالها لوهله ، خاله في ملاعق ؟
ضحكت و هزت راسها و جت بتقوم و حلفت عليها
قامت بـ احراج من ضحكها تدور بجهل عن مكانهم
فزت برعب من طق الشباك المفتوح جزئياً
هو ؟ لا لا لكن يشبه له .. تذكرت ملامحه الحاده
صحت من سرحانها على اغلاقه الشباك بعصبيه
خافت و اتجهت للحوش بعد ما غسلت الملاعق
و توترت تقول لها اللي حصل او تغفل عنه قررت تتجاهل
نوره : سمي و ابدي يا حبيبتي الامور سهالات ابتسمت
و بدت تاكل شبعت و أصرّت نوره عليها تكمل كثرت بالأكل
و هالشي ما يناسبها .. تسلم يدينك طبخك مثل طبخ امي ضحكت نوره
على دخول بدر ، غطت شعرها بسرعه و صدت عنه بخوف
يبوس راس امه ينطق جابتني ريحة طبخك
تلمه و تبوسه : غسل يدينك و تعال و لا بتاكل بملعقه ؟
استغرب كلام امه و ناظر السفره و الملعقتين وحده بيدها شتت نظره عنها
كملوا عليكم بالعافيه و قامت بسرعه : انا خلصت تسلم يدينك خالتي
قامت مبتعده للغرفه ، غسل يديه و جلس قرب امه انتبه لمكانها و لريحة عطرها و صحى على صوت امه بتساؤل عن الجهه الاخرى " قبل ساعتين "
دخل بيت ابوه و باس جبينه و همس له : موضوعنا تم
ابوه معصب تماماً و لا غابت عن عيونه تصرفات بدر
بدر جلس بزاوية " القهوه و معاميلها " المجلس الممتلئ بالرجال
و جت دفعه جديده فز بدر يصب لهم القهوه
و يجددها للموجودين سابقاً و اخوانه على استعداد
لأي اشاره من ابوهم او بدر ، مر الوقت الى حين الـ ١٠ مساءً
خلى المجلس من الرجال نده سالم لولده بصوته الجهوري
يا ولد يا بدر تعال بعِلمك .. جاه بدر بعد ما تأكد من خلوا المكان
بدر : سم طال عمرك .. البنات هذولي الله يستر عليهم جايين يقومون
بواجب العزا عن امهم مريضه سالم نطق بتهجّم : امهم مريضه ابتلاء
على سوء التربيه و الابو اسود الوجه وينه عن السلق تاركهم
اخذ نفس : ابوهم ملتزم بدوامه و مقابل الأم الله يشفيها
سالم : عليهم لعنة الله و المسلمين الا بالله عليهم اللعنه
بنات كاشفات وجيه بستاير اشكال انواع يناطحون رجال
بدر بعقلانيه : اهدا يا طويل العمر الموضوع عدا
إلا ما يجي ابوهم و نعطيه العلم و يربيهم من جديد
هد اعصابك ألزم ما علينا راحتك ..
ناظره بتفحص : و انت علامك ملبق عيونك عليها وش بينك
و بينها قاطعه بدر : ابوي كانت خايفه و .. قاطعه بتهكم : يومها خايفه
وشوله تسوي شي ماهيب قده بئس التربيه الا بالله بئس التربيه
وقف بدر و باس راسه : طويل العمر بمشي للبيت
تامر على شي ؟ سالم بمماطل : ايه ايه ابي شي
امك وش اخر اخبارها .. ناظر فيه بدر : امي بتمام الصحه
و العافيه مرتاحه و ماعليها قاصر
سالم بكبر : قاصركم فلوس مقاضي
بدر بهدوء : ما تقصر ابوي ، عن اذنك
طلع بدر من الباب و اخذ نفس طويل بصدره و نفره
طرا في باله صغره و مواقف ابوه و تقصيره عليهم
مصروف بالقطّاره مقاضي محدوده ، لحين كبر بدر و صار
يسد مكان ابوه و يسد حاجة امه و يعطيها زود
توظف وقت دراسته و انضغط و كلمته " يهون لأجل نوره "
دخل بيته يدندن و بنداه المعتاد : يا نور البيت
فزت نور من جلستها من سمعت نداه و سمت عليها نوره :
علامك يا امي بسم الله عليك هذا بدر ، ابتسمت بخفوت
و داخلها مرعوب كيف عرف اسمها و نداء ابوها لها
ردت نوره بعالي الصوت : هلا يا امي البنيه فيه علامك !
ناسي تماماً وجودها في بيته ، تنحنح و تغيرت نبرته
يبوس راسها : هلابك اميمتي عساك بخير ؟ نوره بحنيه
تمسح على كتفه و يديه : بخير ياوليدي جويعان اصب لك شويهي ؟
ضحك بخفه : صبي لي شويهي تدرين بي ما اقول عنه لأ ، ضحكت
تغير حديثها لنور : يحب الشاهي من صغره
ياوليدي جيعان اي امي سوي لي شاهي و ضحك من تذكر
ابتسمت لحديثها الدافي و همست : عن اذنك خالتي
