اكمل رائد بهدوء : الرجال اللي ناوي يكمل نص دينه يدخل البيت
من بابه او يتواصل معاي رقمي عنده انا معطيه بنفسي وش له يكلمك
انتي و متى كلمك بالموضوع ، ريم بلعت ريقها بتوتر : من فتره و يبي
رفع صوته رائد يقاطعها : من فتره ليه ما تكلمتي ، ناظرته منوه
بـ استغراب من تصرفه : رائد علامك ؟
هي قالت لي من زمان قلت لها تستخير و اذا ارتاحت ابلغك !
صد عنها رائد بعصبيه راح للمكتب تحت انظار ريم المصدومه
ناظرت الفراغ تلمس عدم الرضا من ابوها و خافت انه يرفضه
مسكت كفوفها منوه تهمس : انا برجع اكلمه لاتاخذين اسلوبه
بمحمل جد طيب ؟ ناظرتها ريم تهز راسها بالإيجاب صعدت
غرفتها وقفت منوه تتوجه لرائد دخلت تجلس يمينه و ناظرته
تنتظره يبتدي كلامه و ما شافت إلا السكوت : ليه سويت كذا ؟
ريم ألف يتمنونها و لا هو اول واحد يخطبها انت تدري بهالشي
تنهد رائد اللي يشد على شعره بيده : منوه انتي ما تدرين بشي !
منوه : علمني اذا ما ادري بس لا تسوي اللي سويته قدام البنات
بنتك تحبك ترتاح اذا تكلمت معاك لا تشد عليها تبعدها عنك نطق
رائد بنفاذ صبر : اخوه الكلب راعي بنات و سوالفه ما تنسولف ادري به
منوه : وش عليه من اخوه ؟ رائد : تصير اشياء ما اعلمك بها ما تدرين
عنهم انا اللي ادري تدرين من هو ولده ؟ ولد صالحه !!
سكتت منوه تستوعب اللي يقوله و همست : كيف ولد صالحه وش
جابه لها هي بالديره هذا موظف هنا ، رائد بنتي لا تروح لها
رائد : الرجال الله شاهد علي عن عشر و موظف و صيته سابقه لكن
خايف عليها من سالم و عفته و صالحه و اخوه ما اخليها عندهم بالديره
هو مسجون لكن مصيره يطلع و لا ودي تشوفه ، منوه : طيب يمكن له
سكن دامه موظف هنا ، رائد : يروّح لامه و يتعنى بالطريق يومياً
عشانها شلون تبيني اخليها تسكن يمّهم منوه : اكيد بيكلمك و يخطبها
منك علمتني قال لها فكري و اذا موافقه اكلم ابوك اخطبك رسمي
و اذا كلمك اسأله عن السكن او نحط بالشروط السكن بالرياض المهم
بنيتي ما تروح للديره ! تنهد رائد يخفي موضوع خالد و تحرشه برغد
عنها هو اول شي طرا في باله من قالت له ريم انه محمد مو عارف كيف يتصرف و لا وده يمنعها من نصيبها مع رجال شاف وقفته معها بعينه !
مدت الفنجان تقهويها : صاحي ولدك ياخذها مالقى غيرها ؟
صالحه : اخخ يا عفته جنني يومها عجزت انام عسى الله يحرم عيونها النوم
هي و امها ، عفته : علامهم عيال هالوقت ما بهم الصاحي هذا بدر اخذ
امه و ترك الديره و سكن الرياض عشانها و الحين ولدتس تقولين
مسحورين و مرسولين عليهم بالأسم اللهم استودعتك عيالي لا يجيهم الدور
زين اللي ربتس حرمها العيال لا تحوّش على بنياتي
صالحه بتفكير : تهقين مسحور ؟ عفته بتأكيد : و نزيد السحر بسحر
لا يتكدر خاطرتس الموضوع عندي ناظرتها صالحه بشك
و اكملت : اعتبريه تم بس المهم نسوي خطه قبل و اذا صارت مثل
ما ابي كل شي ينقلب عليها هي و بناتها ، صالحه : علميني خليني معك بالصوره و همست عفته بتفاصيل توافقها عليها صالحه غايتهم فيها
منوه و رائد !
و بمرور اسبوع ..
فضه بهدوء تهمس لمنوه : ودنا بالقرب يا ام سعود ما القى
احسن من رغد لوليدي ويشهد الله علي دخلت قلبي من شفتها
خذوا وقتكم اسألوا عنه و انتظر منك خبر .. منوه بتفاجئ : الله يكتب
اللي فيه الخير خاله انا ببلغ ابو سعود و مثل ما تعرفين الشور للبنت
و بأذن الله ارد لك ، ابتسمت فضه تناظر رغد بتأمل قاطعهم دخول
نوره اللي تضحك : مسيكينه هالـ ميلا يالله تمشي مع هالبطن
ضحكت رغد تشوفها دخلت تمشي بثقلها و نطت عندها : قلبي ودي اشيل
عنها بطنها باين عليها التعب مره .. تمسّح عليها من انسدحت و ناظرت
فضه لمنوه من جا في بالها نفس الشي و ابتسمت فضه تأكده لها
و جلست يمهم نوره و سألتها فضه : إلا وش صار حجزتوا القصر ؟
نوره : الحمدلله قضينا منه و من العشاء الباقي الاستقبال بخليه على
البنات هم ادرى بهالسوالف يختارونه و نخلص مره وحده ، منوه : انا
مو لاقيه فستان كل ما عجبني ما يناسب الحوامل و مافيني حيل فرفرة
الاسواق بشوف اونلاين نوره : ارتاحي يا منوه البنات يدورون لك
الله يتمم لك على خير و يقومكم بالسلامه . فضه : اللهم امين والله ما تدرين شكثرانتظر سعود غلاته سبقت جيّته ، ضحكت منوه : يا روحي خاله
و شكلي بترك كل شي للبنات و اريّح هالفتره رجولي حاره مقدر
اطول بوقفتي نوره : الله يعينك احتسبي الأجر يا حبيبتي ..
منوه تمشي بهداوه لين وصلت للسرير و رائد حط وراها مخده تمددت
لمحت نظراته لها تبتسم : الله لا يحرمني منك ، اخذ يدها يقبلها : و لا
منك يارب هانت حبيبتي بأذن الله شهرين تولدين ترتاحين ..
تنهدت بخوف : احاتي كل شي رائد زواج نوراللي بعد ثلاث اسابيع
ولادتي و البنات و احسني مقصره معاك رائد يلعب بشعرها : ابوي انتي
انا عاذرك و المهم راحتك اشوف قومتك و قعدتك صعبه ازيدك ؟
صدقيني راحتك من راحتي ! منوه تناظره و نطقت : كلمتني خالتي فضه
تخطب رغد لولدها قلت بشاورك انت و رغد و ارد لها خبر .. شرايك ؟
رائد بتفكير : الولد قابلته ما عليه رجال و منطوقه حسن و نسبهم يشرّف شاوري رغد و عطيها وقت تستخير و الله يكتب اللي به الخير دمعت منوه : بناتنا كبروا رائد ! ابتسم لها يمسح دمعتها : اي والله كبروا و كثروا خطّابهم البارحه مكلمني خويي وده يخطب ريم و انا للحين متردد مع محمد و خطبته ، منوه : رائد مو لأنه خويك بس المهم هو رايها و حنا ادرى بمصلحتها و الشروط بنحط فيها السكن بالرياض اريح لهم اثنينهم عشان وظايفهم
كلمه بكرا مادام ريم مرتاحه له ، هز راسه بالإيجاب : ابشري
بيت صالحه ..
محمد : تقولينه صادقه يمه وش له انتظر شهر ؟ خير البر عاجله
صالحه : كانك تبيني اوافق عليها انتظر شهر و لا بلاها يا محمد مو كافي
انك مشيّب بي تراني ادور الزله عليك اي غلطه برفض هالموضوع من اساسه محمد بصبر : خلاص اللي ودك شهر مافي غيره ، صالحه : و لا تنسى قبل
كل شي تسوي اللي قلته .. محمد : يا يمه شلون بتحضرين العرس مو طول عمركم مشاكل مع الاثنين صالحه : مو شغلك بتوديني غصب عنك !!
تنهد و هو يموت و يعرف خافي امه و اصرارها على الحضور همس : ابشري اللي تبينه يصير بس والله هذاني احلف قدامك لو كان من ورا روحتك لهم
شر و مشاكل بيصير شي ما يرضيك ! صالحه : تحلف على من يا محمد سوالف الحريم مالك بها مو عشاني رضيت تعرس على بنت منوه تدخل بكل صغيره و كبيره اعرف قدرك يا محمد لا تخليني اقلب الدنيا عليك ، ناظرها محمد بفقدان امل : انتي قلبتيها و خلصتي عمرك ما كلمتيني بهالاسلوب
و لا عاملتيني هالمعامله بس عشاني باخذ ريم صار وجودي و عدمه واحد
عندك و كرهتيني من كرهك لأمها ..
