يوم الفرح ..
يوم إكتمال فرحة بدر بتمام نوره و حبه ، يومه السعيد المحفوف بالأهل و الأصحاب و الدعوات الصادقه لهم جلست منوه بتعب : هذي بداية الليله تعبت ياربي هوّن علي نوره اللي مو سايعتها فرحتها : ما تسمعين الكلام اقولك ريّحي ما تجلسين كل من جا قمتي تسلمين عليه ، منوه : يوجبوني لازم اقوم لهم و لا تخيلـ .. سكتت من لمحت دخول آخر اثنين كانت تتصوّر تواجدهم مدّت يدها عفته تنوي السلام و التفتت نوره بنظرها لأحد الطاولات الفارغه بدون لا تصافحهم : حياكم بفرحتي توجهوا يجلسون مذهولين من المكان و من شكل نوره اللي تغير للأفضل باينه عليها الراحه و الخير من الذهب اللي زاد عليها و يتأملون منوه بتفصيل صالحه بهمس : يخرب بيتها العجوز فيها حيل حمل للحين ، عفته بتمثيل الابتسامه : تركتي الخير هذا كله و بلشتي بحمل منوه شوفي القصر لو اجمع سبع بيوت بالديره ما صاروا قده و لا نوره اللي زايده مضاعدها بكل يد اربع و خمس كرسي جابر واصل لركبتها منوه مو باين عليها الخير لابسه طقم شكله فضه و لا فالصو وين الذهب دامهم غرقانين فلوس و خير ، وكاد الله حرمهم النعمه .. التفتوا لنزول ريم و رغد توجهوا لمنوه اللي توترت تهمس لنوره : ذولي وش جابهم ؟ نوره بتوتر تحاول تخبيه : الله يحفظنا بحفظه استودع الله الذي لا تضيع ودائعه انفسنا و فرحتنا و كل ما نملك الله يستر منهم مسكت يد ريم تهمس لها توصيها على نور تحصّنها قبل نزولها و مشت عنهم ريم و ناظرتها صالحه من عرفت انها غاية محمد و ارتبكت منوه بخوف على ريم : يمه بنتي اكلوها بعيونهم مقدر اتحمل يا نوره ابقى كل الزواج يدي على قلبي !! همست نوره تحاول تهديها : نسوي اللي علينا و الله خير حافظ رغد يا امي روحي قولي لهم يضيفونهم يشغلونهم عنا ، رغد راحت بنفسها للاستقبال تختار السويت و أشرت لهم يقدمون القهوه و توجهت لهم بـ ابتسامه : نورتونا ، ابتسمت عفته بمجامله تاخذ القهوه و تناظرها بتفحص : انتي من بنات رايد ؟ رغد بدلال : ايوه انا رغد بنت رائد و ماما منوه القمر اللي هناك صالحه بخبث : عاد وشوله اختكم الصغيره تتزوج قبلكم اخبر الكبيره تتزوج و الدور للي بعدها إلا اذا كبيرتكم بها شـ ..
قاطعها وقوف ريم قبالها : معاك ريم كبيرتهم شخصياً امري ؟ ابتسمت صالحه بمجامله تتأمل الفستان اللي مفصّل ملامح جسمها الرويان و عينها على صدرها : ايه يا هلا و انا ام محمد ريم تلعب بشعرها بدلع : اممم ما عرفتك من طرف مين جايه معليش عشان نقوم بواجبك ، صالحه : من ضمن المعازيم .. ابتسمت ريم بلكاعه : حياك الله ام محمد الفال لمحمد قريب صالحه اخذت نفس التفتت بعدم تحمّل و هي متأكده معرفة ريم فيها ، عفته اللي نطقت بفضول : إلا يا ريم امك بأي شهر ؟ بدخول نوره اللي ابعدت البنات عنهم و ابتسمت : حياكم الله فوق عند نور و بدر يتصوّرون سوا و خجل نور اللي بدر يقاومه ! يهمس بأذنها : تعرفين انك اخذتي عقلي الليله ؟ وش هالجمال مفروض اني اقاومك ؟ ضحكت نور و ابتسم يقرّب يقبلها بحب و ابتسمت المصوره تلتقط لهم صور عفويه و نطقت : انتهينا خذوا راحتكم الآن باقي الصور وقت الزفه عن اذنكم و خرجت تتركهم و تنهدت نور : حبيبي مو قدامها خجّلتني ! بدر بهيمان : و الله يا عيون حبيبك ما اقدر اقاومك مو بيدي و بعدين متى تخلص الزفه ؟ ماله داعي الرسميات و لا له داعي يشوفونك الحضور يكفي المعرس شافك و صورنا لازم نمشي على طول ! نور تضحك بذهول و ذاب بدر : ضحكه بعد اخخ قلبي ابتسمت نور بدلال : بسم الله على قلبك الحنيّن ! احتضنها بقوه و شعّت ملامحها خجل من همسه لها و توجعت من حسّت بعضه منه نور : ااه بدر عورتني ، اقترب لأذنها يهمس بخبث : تحمّلي شوي ياروح بدر هانت قربنا نخلص ، ضحك من ضربت صدره يشوف خجلها منه : اششش عيب .. لا توترني على الأقل مو الحين ترا اعلم خالتي عليك و تطردك ، بدر : ياااا حُلو اللي يهدد يا ناس ! ابوي انتي اجلسي ارتاحي لا تتعبين مسك يدها يجلسها و جلس يمينها تناظره بتأمل ما ودها تنتهي اللحظات الحلوه إلا بحضنه ابتسم يضبّط شماغه و بشته : جميل لهالدرجه ؟ ضحكت نور و نطقت : انت ما وراك اخوياك و ناس ينتظرونك ؟ رفع جواله اللي حاطه صامت يوريها كثرت الاتصالات و الرسايل منهم و ضحكت : حرام عليييك ينتظرونك من اليوم يا المعرس ، بدر : حرام عليك انتي تصرفيني مو كافي حارمتني منك يومين ! نور مسكت يدينه : انا لك بتاخذني معاك لك نهاية ليلتنا حضنك !
ما ودي ينقص ليلتك شي عيش الشعور كله معاي و معاهم المهم فرحتك تكمل ابغاك تروح و يصورونك اشوف ابتسامتك اللي احبها و احس بفرحتك .. بدر : تكفيني هاللحظه معاك !
حطت يدها على خده تقبله بخفه و ابتسمت وسط بوستها من حسّت بتعمّقه و تنهد يبتعد عنها مسافه بسيطه و يحصّنها
يرفع يدينه يمسح اعلى طرحتها لآخر فستانها و همس : بروح لهم حبيبتي و هزت راسها بالنفي تقربه منها و حصّنته بالمثل ترفع نفسها بمساعدته تمسح على اعلى شماغه لأسفل البشت
و تنهد بدر بـ راحه : حبيبتي الله يحفظك لي استودع الله فرحتنا وقف و شدت على يده تتأمله بحب و وقفت تحتضنه : حبيبي !
ابتعدت عنه تبتسم له : استودعتك الله و انتبه لك بدر بليز ..
مشى بدر متوجه للرجال و دخلت منوه تتأملها و غرقت عيونها بالدموع وقفت نور تحضنها : لا يا ماما بليز لا تبكيني معاك !
تنهدت منوه تضربها بخفه : متى كبرتي علميني امس اخذتك من الحضانه شريت لك شنطه للروضه كبرتي صرتي عروسه ؟
بسم الله عليك يا ماما الله يحفظك و يتمم فرحتك على خير رائد نطق من خلفهم : اللهم امين بس مدري اسكت من فيكم
تنهدت نور تدخل حضنه و اكمل : شفت بدر جا قلت هذي فرصتي اشوفك قبل تنزفين و تروحين لبيتك و تصيرين عروسته نور بتذمر : بااببااا ضحك رائد و اكملت : بنشب لكم ما اخليكم
تحسبون يجي البيبي اخلي له الساحه لا طبعاً التفت رائد لمنوه يتأملها و ضحكت نور : يمكن صار لازم اصرّف نفسي ؟ تقدمت توقف يمين نور : بنتصور يلا قوموا بعدين اصرفك ضحكت من دخلت تصوّرهم سوا بدخول خواتها اخذوا صوره حنونه مجدداً بعدها بدقايق جت نوره مع بدر يتصورون و يخلدون فرحتهم !
جا وقت الزفه .. توترت نور تشد على يد بدر يلتفت لها : اهدي
انا معاك و امي تقول ناظروا للكوشه بس لا تتوترون و انتبه لك ناظرته و ابتسمت من حسّت بتوتره اللي يحاول يخفيه عنها ..
ابتدت الزفه و نزلت خطوتين من الدرج و ذُهلت من سمعت ابيات قصيده بصوته التفتت له فوراً ابتسم لها يشد على يدها و اخذت نظره سريعه على الحضور تكمل ثبات خطوتها معاه
تقدم قبلها بخطوه يمسك يدها ترفع كعبها عن الدرج توصل الكوشه و تنهدت من جلست و تتأمله يجلس يمينها قدام الملأ
التفت لأمه يقبل يدها من رقصت له بـ ليله من الليالي الهنيّه ..
