و طلعت ريم تضحك : فقدتي المهاره .. عطست رغد
ضحكت نور : اكثر من كذا مافي قوموا نطلع بردت شوي
من العصر و احنا نسبح و التفتت تسحب الروب و لبسته
و مشت تصعد لغرفتها تاخذ شور و تلبس دافي ..
و خواتها اللي صعدوا بعدها و تجمعوا بالجلسه برا بعد
ما لاني عطتهم خبر إن امين شبّ النار ، نوره : عشان مره
ثانيه تسمعون كلام امكم و .. قاطعها اتصال من رقم : الو
من معي ؟ عقدت حواجبها و استأذنتهم تدخل تكلم بالصاله
و جت رغد بـ براد اعشاب لأجل يدفيهم و صبت لهم
و جلست و استغربوا صوت نوره اللي وصلهم من الشباك :
منوه لا تشربينه ، استغربت منوه : علامك ليه ما اشربه ؟
و اشرت لها بيدها بمعنى دقايق و اكملت حديثها بالمكالمه
و رجعت لهم بعد مده .. نوره بذهول : منوه ما تصدقين
لو اقولك مين كلمني !! منوه بتساؤل : مين ؟ اكملت نوره
تخبرين خالتي ام جابر ؟ منوه بـ تذكر .. مين ام جابر ما اعرف
احد بذا الأسم ؟ نوره : ما تعرفين راشد بس تعرفينها خالتي فضه ..
منوه اللي نطقت : يا حياتي امانه هي اللي كلمتك ؟
هزت راسها بالإيجاب : الله الله هي و سمعتي انادي عليك
سألت عنك و حرصت علي اوصل سلامها .. ابتسمت منوه
و ناظرت بناتها و ضحكت : شوفي بالله عليك هذا حالهم
كل مره يسمعون بأحد جديد عليهم ، ضحكت نوره
و قالت : هذي تصير خالتي و اكملت لمنوه اسأليني وش تبي مني
منوه : ايش تبي ؟ تنهدت نوره : لما قلتها لها عنك تقول
ولدها طالب نقل للرياض و شايبها ما يعرف و حتى ولدهم
ما يمديه يجي و يدوّر شقه ما عنده وقت ودها بمكان زين
ما تعرف و قالت لي اسألك و تسألين ابوكم .. فرحت
منوه : يا حياتي احلى خبر و عقبالك يارب و تصيرون كلكم يمي
ريم : بشويش علينا ارحمونا و علمونا مين هم و شالسالفه ، علمتهم
منوه بتفاصيل قديمه وقت مرضت امها
و كانت هي و خالة نوره جيران و اهتمت فيها بذاك الوقت ..
و التفتت نوره عليها من رفعت البياله بتشربها : و بعدين
معاك ما قلت لا تشربينها ؟ منوه : و ليه ما اشربها
نوره بجديّه : لا تشربين لين تروحين و تحللين بالمستشفى وجهك وجه
الحامل ، ضحكت منوه من شهقوا البنات
و التفتت لنوره : الحين ايش يفكني منهم طيحتيني بلسانهم
ريم : ماما حامل ؟ رغد بذهول : يعني الطفل اللي امس
قلتوه حقك ؟ نور تناظرها بترقب و ناظرتها نوره بـ استغراب
تنهدت منوه : مافيني شي و الحين نوره بتشككني بنفسي
قاطعتها : علموا ابوكم يا بنات ما يقصر ياخذها تسوي تحليل
انا لو اعرف شي هنيّا قلت لبدير و اخذتها غصب عنها
سكتت منوه بتفكير و ناظرت البنات .. رغد عدلت جلستها :
ماما يمكن صدق ؟ و التفتت لريم اللي قالت : تبين اوديك ؟
و لو صدق نسوي لبابا مفاجأه ابتسمت منوه من تخيلت
و التفتت لنور من فقدت مشاركتها و سرعان ما حست نور
بشعور غريب و قامت تصعد لغرفتها تحت ذهول نوره : علامها ؟
ريم : ما اعرف بس احسها غارت شوي ، منوه
ناظرت بنوره : قومي قدامي راضيها و ضحكت نوره تقوم
و تصعد غرفتها و دقت الباب و فتحته من ما حصلت رد
و دخلت تشوفها جالسه على كرسي البلكونه : نور البيت
تنهدت نور و ابتسمت تلتفت لها : لبيه خالتي ، جلست قبالها
و مسكت يديها : ليه يا امك تسوين كذا تخربين فرحة امك ؟
كم عمرك ؟ نور بضيق ٢٤ ، نوره : ٢٤ سنه ظنك اميمتك
ما ودها بضنا كل هالسنين ؟ ما حاولت تحمل ؟
تراها علمتني بكل شي كانها ما علمتكم به .. ناظرتها نور
بـ استغراب و اكملت نوره : ايه ايه علمتني كذا مره تحمل
و تتعب و تجهض و لا تعلمكم هي ودها كم مره تسوي
جدول مدري وش اسمه مع الطبيب عشان تجيب لكم اخوان
و الله ما يكتبه كل هالشي ما تعلمكم به عشان ما تخافون عليها و تمنعونها
عشان صحتها و لعلمك حتى ابوك مرات يمنعها و هي ما تطاوعه تقول
تبي لكم اخوان .. بكت نور و نطقت : كيف ما انتبهنا لها ؟ كل يوم معانا
كيف ما عرفنا شي ؟ نوره : سوالف حريم تجهلونها يا امك ، من البارح
و انا منتبهه كم مره طلبت من الحلويات و على العشاء عينها على الكيوي
دون الذبيحه لين قطعته لها و عطيتها ، كل هالشي
صار قدامكم محد انتبه ما تعرفون لأنكم ما اختلطتوا بحريم
ناظرتها نور و تقدمت تحضنها ، و ربتت على كتفها بهدوء
و ان شاءالله قريب تصيرين حرمه و تعرفين هالسوالف
و اعرفك لا حملتي من وجهك يا عساني اعيش و اشوف احفادي
منكم .. نور اللي تمنت تختفي من وسط حضنها
ابعدتها عن حضنها و هي تضحك : يلا يا حبيّبتي و انزلي
حبي راس امك لا تزعلينها ما تدرين وش كثر تتعب عشانكم
عسى الله يرزقها باللي تتمنى و يقر عينها به ..
