تنهد من شافها نايمه و عيونها متورمه من البكى و جلس يفكر بـ قراره و يراجعه ألف مره حس فيها من صحت تناظر وجوده و نطق جابر : انا فكرت بوضعنا و قررت و الافضل اننا ننفصل ! ناظرته باستغراب : مو مفروض هالقرار يطلع من تراضي بيننا ؟ وقف جابر : طلع مني و حبذا يطلع منك كذلك رغد : و دامك قررت وش تبي راجع لي ؟ جابر : لأن في كلام من اول ببالي و لا ودي يبقى بخاطري من اول موقف صار بيننا هنا تحاملت على نفسي عشانك و عشان اهلي ، صعبه يا جابر تتركها بأول الدرب عطها فرصه و امك بتزعل منك و انت معطي الرجال كلمه لكن لو انه رجال ما يترك حريمه هنا بدون ما يراقبهم و لا يشوفهم وش يسوون بمكان مختلط مع اللي ، وقف كلامه بـ صفعه منها تتركه مذهول و نطقت : ما اسمح لك تتكلم عني و عن بابا كذا يا مريض محد يفكر هالتفكير إلا اللي ما عنده ثقه بنفسه و لا بأهله دايماً الشخص الوسخ هو اللي يشك باللي حوله ! تألمت رغد من مسك عضدها بقوه يثبتها امامه على الجدار و صرخت تدفعه : اتركني جابر اتركني وابعد عني ! دخل فهد بعصبيته بعد ما سمع كلامه يبعده عنها و يلكمه و يوقف بينهم ، طاح جابر و رفع نظره له : هذا انت اجل .. فهمت السالفه ! فهد : اطلع برا و لا بنادي لك الأمن ! جابر بـ استهزاء : اطلع و اخليكم تكملون جو العشاق ؟ رغد : لا اسمع لك صوت جابر و اطلع برا !! اكمل بصراخ : تراك على ذمتي للآن و الله اذبحك معاه ! تقدمت له : و انا ما ابيك جابر مو انت جايني تبغى ننفصل ؟ يلا اعلى ما في خيلك اركبه و ما إن اقترب منها خطوه ابعده فهد يسحبه برا يناديهم يتصرفون معاه ، جلست بذهول : كيف كنت برتبط فيه و هذا تفكيره ؟ فهد : الحمدلله كل شي وضح من البدايه ! ناظرته و وقفت بـ احراج : اعتذر فهد عن اللي قاله ! أشر لها بيده يمنعها تُكمل كلامها : هذا عقله على قده ما ينشره عليه سوا شي ضرك ؟ هزت راسها بالنفي و اكمل كلامه : لازم يوقف عند حده مو اول مره يتعرض لك قدامي بلغي ابوك بكل شي و انا جاهز لو يسمع مني اللي صار ، رغد : ما تقصر و اعتذر منك مره ثانيه و طلعت لمكتبها ، تنهد فهد يجلس ما يعرف كيف مسك نفسه ما ذبحه عشانها و خرج من الغرفه يكمل شغله
اليوم التالي ..
تمددت نور و مسكت يد بدر بحماس و توتر و جلست امامها الدكتوره تحط الجل على اسفل بطنها و سمعت نبضه ناظرت بدر بذهول ابتسم يشد على يدها نطقت الدكتوره و هي تراقب الجهاز : جاهزين نعرف جنس الجنين ؟ ابتسمت لها نور تناظر الشاشه بترقب : ايوه ناظرتهم الدكتوره بضحكه : بتجيكم بنوته الف مبروك ضحكت نور والتفتت لبدر اللي لازال يتأمل الشاشه شدت على يده يناظرها و رجع يناظر السونار يرفع جواله يصوره و اقترب منها يحتضنها بفرحه غامره همست نور : ورد بتجي ! ضحك يهز راسه بالإيجاب : لك الحمدلله يارب ، الحمد الله ربي يحفظكم لي ، نور : اللهم امين و يحفظك يا أحن بابا في الدنيا و طلعوا بعد ما اخذوا صور السونار و شد على يدها من اقتربوا لغرفة سالم تنهدت نور : بدر لازم اشوفه ؟ هز راسه بالإيجاب : اللي ودك بس اشوف من الافضل تشوفينه ناظرته نور و دخلت الغرفه يقشعر جسدها من برودتها و جلست على الكرسي اللي جنبه و همست : ترددت كثير اني اجيك و ما اخفيك اني خفت اللي جاني منك مو شوي لكن ينغفر كله لخاطر بدر جيت اليوم عشانه راح ادعي الله يقومك عشانه لأني ما ارضى اشوف بعيونه الحزن على العموم ما بكثر كلام لكن فيه شي اخير ودي اعلمك عنه اليوم سويت سونار و بتجينا قريب بنوته ، يارب من هنا لين اولدها بخير و سلامه يتغير حالك للافضل عشانها و اتمنى تكون لها افضل مما كنت لنا و خرجت بعدم استطاعه لجلوسها اكثر قابلها بدر عند الباب يحتضنها و دخل لأبوه يقبل جبينه يمسك يده : ابوي عساك بخير ، مرت ايام كثير بدونك ما نويت تقوم ؟ قوم يبه شيّلتني مسؤوليه اكبر مني ، الكل شايل همك و يحاتيك لمياء جاها ولد و انا بتجيني بنت و اسماء ودي انها تملك على قومتك بالسلامه تصير الفرحه فرحتين ، توقف عن كلامه يحس بحركه خفيفه على يده و ذُهل بدر : ابوي تسمعني ! حس بذات الحركه مجدداً و ابتسم يقوم بفرحه ينادي الدكتور و وقفت نور تشوف اللي يصير من خلف الشباك بفضول من دخلوا جميعاً و جلس بمكانه يمسك يده بفرحه ، فتح عيونه سالم وسكرها من قوة النور حوله ابتسم الدكتور : الحمدلله على السلامه ابو بدر و بعد نصف ساعه من نقله لغرفه اخرى ، يناظر في بدر مستغرب حاله و نطق بدر : كلمني اذا تقدر التفت سالم لنور اللي دخلت يعقد حواجبه و رجع نظره لبدر يهمس بكلام يكاد يسمع : هذي من ؟ استغرب بدر و ناطر لـ نور : ابوي هذي نور ! ناظرها سالم يشوف يدها على بطنها و وقوفها جنب بدر و اكمل بدر : الحمد لله المهم قومتك بالسلامه ، سالم : الله يسلمك إلا وين امك ؟ ذُهلت نور وكذلك بدر : في بيتها تامر على شي ؟ سالم بضعف : وراها ما جتني علمها اني ماني بطيب و اكل الطبيب باهت مابه طعم ، وقف بدر : ابشر الحين اكلمها وخرج للدكتور يتكلم معه يعلمه بحالة ابوه و نطق الدكتور : حالته طبيعيه تطمن وفقدان الذاكره اثر طيحته على راسه هذا طبيعي و احتمالية رجوعها له حسب استطاعته لكن بيحس بصداع كل ما حاول يتذكر شي و هذا ايضاً طبيعي و مراجعاته تصير بين فتره و فتره نسوي له اشعه مقطعيه و بأذن الله خير ، بدر : الله يطمنك و مشكور ما قصرت و تنهد من دخل غرفة ابوه يلمح جلوس نور على كرسي مقابل لسالم و يسمع كلامه لها ، سالم : نوره ما علمتني إن بدر تزوج ، نور اللي محتاره تجاوبه على ايش من اسئلته و دخل بدر من حس بربكتها ينطق : إلا يا ابوي تزوجت و انت اللي زفيتني و اخذت السيف بالعرضه ترقص به ، ابتسم سالم : يمكني ناسيه التفت لنور يشد على يدها و يهمس لها : ابوي فاقد الذاكره ترا ناسي كل شي ماتشوفينه يطري امي ؟ تنهدت نور : يخوف كيف ينسى كل شي ؟ بدر : الحمدلله هذي اقل الأضرار و اكمل برفعة صوت لأبوه : يبه بيجلسونك اسبوع يشوفون تقاريرك و بعدها نروح لبيتي ، هز راسه بالإيجاب يغفى بذات الدقيقه و مشى بدر مع نور للسياره و ما إن جلست يمينه التفت لها : مو مصدق ان ابوي ناسي كل شي يعني الفتره اللي فاتت كلها انمسحت و رجع لكم سنه ورا و اكملت نور : بس ليه ما جاب طاري البيت الثاني تتوقع ناسيهم ؟ رفع اكتافه بحيره و مشى طريقه و ابتسم من تذكر : بابا بتنورين الدنيا و قريب اشوفك ؟ ابتسمت نور : يارب الله يجعلها خير و جيتها خير علينا كلنا تمتم بـ امين من وصل لبيته و نزلت نور تشوف نوره امامها بالحوش و جلست عندها و ناظرت بدر اللي جلس معاهم : ها يمه بشروا البيبي بخير ؟ نور : ورد تقول لك يا جده خمس شهور اجيك و انام بحضنك !
