يوم عملية رغد .. منوه يمينها تتأملها و تمسح بيديها
عليها تحصّنها و ريم تكلم نور اللي تأخرت ما وصلت
رائد نزل مع فهد يتأكدون من بعض الاوراق و التوقيع
دخلت الدكتوره تبتسم : مساء الخير عليكم كيفك رغد ؟
ابتسمت لها بخوف : الحمدلله و تنهدت منوه تحاتيها
و ناظرت الدكتوره من تقدمت لرغد بهمس ما تسمعه على
دخول رائد معاه فهد يناظر : كل شي جاهز ، هزت راسها
بالايجاب و مسكت يدها : العمليه بعد دقايق جاهزه ؟
تنهدت رغد تاخذ نفس بتوتر و بلعت ريقها من تقدم فهد
يشيّك على باقي المغذي لو يحتاج تجديد ناظرت ابوها
المتوتر حاله حال منوه اللي وقفت امامه تهمس بخوفها
و تسمع فهد يتكلم للدكتوره و صارت ما تركز بشي تغفي
و اخذوها لغرفة العمليات و معاها رائد اللي وقف خلف
الباب من اشر له فهد يمنعه من الدخول جلس على الكرسي
يشد على يد منوه : بتطلع بخير و سلامه تطمني المهم ترتاح
دخلت حضنه تبكي بخوف يربت على كتفها : اذكري الله !
شافت المشهد هذا لحظة وصولها تناظر ريم ترجف بقلق
تعيد النظر لأبوها و امها تهمس : ليه تبكين صار لها شي ؟
ريم شصار رغد صار لها شي !! اخذتها ريم تحضنها : توها
دخلت العمليه اهدي مافيها شي بس ماما خايفه و تحاتي
تقدمت لأبوها : بنزل اجيب عصير ليمون يهدّي ماما تبي شي ؟
رائد : لا يا بابا جيبي لأختك بعد ، هزت راسها بالايجاب تتركهم
و اخذت عصير تشربه تحاول تصحصح نومها من بداية الاسبوع
تلخبط من دوامها و مرافقتها لرغد ما صارت تاخذ احتياجها
الكافي من الراحه حاسبت على اللي شرته تصعد لهم بتذكر
مدة العمليه اللي قالوا لهم و مدت الاكل و العصير لهم
تشوف رائد يحاول بمنوه و تنهدت تناظر نور اللي جلست
جنبها تهمس : تدرين زين انك جبتي اكل اليوم طلعت بدون
فطور مشغول بالي عليها مره ، ريم : بسيطه ان شاءالله
لا تحاتين و عليك بالعافيه .. عدا الوقت عليهم ببطء !
لحين ما انفتح الباب يطلع طرف السرير تلمحها غايبه
عن الوعي قامت بسرعه تمسح على راسها : ماما حبيبتي
و جلست مقابلتها من صاروا بالغرفه تمسح على يدها
تحصّنها من جديد تحس بيد رائد على ظهرها : تعالي ابوي
اجلسي ريّحي ظهرك مو زين تجهدين نفسك ناظرته بقلة
حيله تنطق : مو بيدي رائد احاتيها اخاف يوجعها شي و انا
مو منتبهه لها خلني يمها ، سحب يدها يجلسها على الكنبه
تتمدد : يبي لها وقت اذا صحت بعلمك انتي ارتاحي خذي
لك غفوه بتتعبين معها لا صحت ادري بك و البنات عندها
لو ما سمعتي الكلام برجعك للبيت علمتك ! مسكت يده تجلسه
عندها ترخي راسها على فخذه يلعب بشعرها يحس
بنومها يسحب الغطا الخفيف يغطيها فيه و رفع نظره لهم
يشوف نور اللي على الكرسي غافيه يأشر لريم تغطيها ..
وقفت تاخذ غطا من الدولاب تغطيها فيه و قربت لرائد
تهمس له : شرايك تريّح معاهم اذا صحت رغد بصحيك
حط يده على راسها : لا يا ابوك بروّح اجيب لكم اكل ما اكلتوا
من النهار غير الخفايف من وين تبين في شي تحبونه ؟ هزت
راسها تبتسم : نحبك انت ، قبّل جبينها : الله يحفظكم لي
انتبهي يا بابا و اتصلي علي اذا تأخرت عنكم يمكن انشغل !
هزت راسها بالايجاب تشوفه يحط الوساده تحت راس منوه
و اغلقت الباب بعد ما خرج تتأمل الغرفه و نومهم فيها تحب
كيف قلبهم على بعض حتى على ابسط الاشياء تنهدت ترجع
تجلس تشوف رغد و مضى من الوقت ساعه و ربع يدخل رائد
معاه اكياس المطعم تاخذهم عنه يهمس : محد صحى ؟
هزت راسها بالنفي توجه لمنوه يصحيها بهدوء : منوتي يلا
قومي ، فزت منوه تناظره و التفتت تشوف رغد لازالت نايمه
رائد : بسم الله عليك ابوي جبت اكل يلا قومي ..اعتدلت بجلستها
تقوم لدورة المياه و طلعت تنشف يديها تناظرها : اختك من متى نايمه ؟
ريم : نامت معاك و قامت تصحيها و ابتدوا ياكلون و رفعت نظرها
منوه لرغد من حست بحركتها تقوم لها : بسم الله عليك امي .. ناظرتها
رغد تبتسم لها و اكملت نوم التفتت منوه بذهول لرائد : رجعت نامت !
رائد : يمكن من المخدر تعالي كملي اكلك بعد شوي تنتهي
الزياره و مافي نوم عندها من الحين علمتك ، جت تجلس يمينه بحلطمه
و ضحكهم عليها و نطقت ريم : ما وراي شي ابقى عندها انتوا روحوا
و ارتاحوا بالبيت ، نور بضيق : ترا مو هاين علي اخليك عندها بس
هالفتره كويز ماعندي وقت ، رائد : لا ترجعين معانا و تذاكرين ريم
ما عندها دوام تجلس و رغد بأذن الله كم يوم طالعه معانا البيت و قام
يغسل يديه و انتظرهم يخلصون ، لبست منوه عبايتها و التفتت : اختك
اذا صحت بلغيني على طول ابغى اكلمها ، رائد : يا حبيبتي
هذي المره الرابعه اللي تقولين لها نفس الشي يلا امشي ..
اغلقت الباب خلفهم و جلست على الكنبه تفتح جهازها
تكمل الشغل و ذبحها الخمول قررت تنزل تاخذ لها قهوه
لبست عبايتها تناظر رغد تنهدت و همست : دقايق و اجي
خرجت تغلق الباب بهدوء و نزلت ، دق الباب بخفه يسمع
الهدوء فتحه يشوف مافي احد نطق : السلام عليكم تلفت
مافي احد تقدم لرغد يتطمن عليها و جدد المغذي و يراجع
تقريرها و حس بحركتها الخفيفه يهمس : رغد ! فتحت عيونها ببطء
تناظر اللي حولها ترجع تغمض من نور الغرفه القوي حط يده فوق
جبينها يخففه عنها : كذا زين ؟ هزت راسها بالإيجاب ، فهد : الحمدلله
على سلامتك كيفك الحين ؟ همست : الحمدلله ، ابتسم يكمل : شفتي كيف
بسيطه كنتي متخوفه منها و متردده ! رفعت اكتافها بعدم حيله : خفت ..
فهد : الامور بالسليم مافيه مضاعفات و اي شي تحسين فيه بلغيني رفعت
يدها لـ صدرها تهمس : احسني مكتومه مقدر اتنفس تقدم يرفع السرير
و ناظرها : احط لك اكسجين يساعدك ؟ هزت راسها بالإيجاب و تقدم لها
يرفع راسها بمساعدتها يثبتها خلف شعرها يهمس : ببقى هنا شوي اختك
مدري وين ، غمضت عيونها بموافقه وقف لحين عدا منتصف الوقت
و شاف المخدر اخذ مفعوله و لمحها تأشر بيدها تقدم يرفع عنها كمامة
الأكسجين و ناظرت فيه : انت حلو موت ابتسم فهد من فهم انه اثر البنج
و نطقت : متزوج ؟ هز راسه بالنفي يجاريها و مسكت يده : ابغى اتزوجك
بليز نتزوج و نروح لندن و قالت بحزن : لأ زحمه لندن خلاص نروح
باريس و اكملت توصف بيدها : و تعترف لي بحبك عند برج ايفل
و نروح مونماغت يرسموني معاك ضحك من خيالها و تأملها اقترب ..
