نطق بتمالك اعصاب : اعرف اقلب الدنيا عليك بس مو هنا
ريم : وين بتقابلني يعني ؟ اذكر قلت مالك بهالدرب انت سيده
و تتقهوا بمجلس ابوي و تقابلني فيه الحين غيّرت كلامك ؟
همس : لا تلعبين بـ اعصابي زواج من غيري مافيه احلمي وش
اسمه اللي خطبك ؟ ريم : اممم يمكن صالح قاطعها : احرقه
بمكانه انطقي اسمه كامل !! ناظرته تتأمله : غرت الحين ؟
تأفف يضرب المكتب : عن الاستهبال ترسلين لي اسمه كامل !
ريم تناظره و ساكته تشوف غيرته و عصبيتها اللي لولا المكان
كان احرقها و اكمل : ما يأذن الظهر إلا و اسمه واصلني ..
ريم بهدوء : ايش بتقوله .. خاطبها قبلك بس عمي ما يدري ؟
و لا احبها و خربت على نفسي و ما بخليها تتزوج غيري ؟
يشوف برودها و يتأمل عيونها اللي بتغرق بدموعها بأي لحظه
و نطق : بقول له احبها و غلطت بحقها و اعتذر لها باللي ودها
و ابيها تسامحني و تدمح غلطتي الأولى و اوعدها لو صار شي
بسألها و اعرف منها قبل اي احد حتى نفسي و بنتظر رضاها
و من يوصلني منها لو تلميح بتقهوا مع ابوها بنفس اليوم
و بشوفها بنفس اليوم و اخذ بخاطرها بطريقتي ، ناظرته ما
ودها ترضى و يرخص زعلها و لا ودها يطول الزعل تشتاق له !
محمد : برجع مكتبي و اللي قلت عنه يوصلني لا يكبر الموضوع
و لا بعرفه بطريقتي ، ناظرته يخرج لمكتبه و مدت يدها تاخذ
مسبحته اللي نساها تلمسها و تحتضنها بيدها ، تشوف جديته
و عصبيته و هي تستعبط عليه اخذت نفس تكمل شغلها ..
العصر في البيت .. نزلت تشوف البنات و ناظرت ريم : ترا
خالتي كلمتني بتجي تتحمد لرغد بالسلامه علمي خواتك
انا بشوف نوره ، تشوفها ساهيه و جلست قبالها تنطق : ريما
ريم : هلا ماما بغيتي شي ؟ هزت راسها منوه : ايه علامك ؟
ريم متردده تقول لها او لأ و تنهدت تمسك يدها منوه و ريم
تناظرها : ماما بيتقدم لي واحد ، منوه بذهول تنتظرها تكمل
و ابتسمت : بيتقدم لي واحد معاي بالدوام و اليوم قال لي
منوه : ليه ما كلم ابوك ؟ ريم بتوتر : اممم ماما هو قال
يشوف رايي اول اذا موافقه يجي يتقدم رسمي !
منوه : انتي تعرفينه بدوامك و تشوفينه بس ما تعرفينه برا
ما تعرفين تعامله مع اهله و لا مع الرجال ، لا تحكمين عليه
و لا تقررين الحين ما تدرين هو كريم و لا بخيل عصبي و يُعتمد
عليه او لأ يا ماما ما نحكم على احد بكم ساعه نشوفه فيها !
تنهدت ريم تهز راسها بالإيجاب شايله همه و ما تعرف كيف
تتصرف بموضوع الخطبه اللي أختلقتها عشان تعصبه ..
مجتمعين في بيت منوه بوجود نوره و ام جابر اللي تتأمل رغد
بلا ملل و كل شوي تلتفت لها تلمح فيها الهدوء و الابتسامه
و نطقت : عاد انتبهي لصحتك هالمره عدت الحمدلله سلامات
ابتسمت رغد : ابشري خالتي و اكملت كلامها لمنوه من لمحت ميلا
بحضن رغد : جنني ولدي يوريني صور قطوتكم المره اللي فاتت
شافها و صدّع بي يوريني صورها و لعبه معها و ليل نهار كل
ما شاف وجهي يمه ابي اشتري قطوه و اخليها بغرفتي شكلي بطخ
و اخليه يجيب ضحكت منوه : ربعه واجد انا اول رافضه بعدين رغد
حطتني امام الأمر الواقع صحيت إلا اشوفها متمدده بالصاله و اطردها
احسبها جايه من الشارع و يوم يومين تعودت عليها لين صرت افقدها
ما اتطمن لين اشوفها تاكل و لا تلعب ولدك بيسوي نفس الشي وش لك
بوجع الراس وافقي عليه يتركها بغرفته .. فضه : يا خوفي ابتلش به
هو و قطوته لا تزوج كيفه اما الحين لا ضحكت منوه : بيجيبها
و تشوفينها على سجادتك كل ما صليتي هذا وضعي مع ميلا اول
ما افرش السجاده انسدحت قبالي دام ما وراهم ضرر خليه على كيفه
رغد : صح كلام ماما و نظيفين بتغيرين رايك صدقيني ، ناظرتها فضه
بـ ابتسامه تجهلها رغد و نطقت : ايه ايه صدقتي الله يجيب قطوته
و مرته مره وحده ، نوره و نور على نفس الكنبه يتكلمون بتفاصيل
البيت كالعاده و ريم مشغول بالها مع محمد اللي محترقه اعصابه عند
امه ينطق : عطيني سبب ترفضينها انتي من وين تعرفينها اصلاً !!
صالحه بغضب : ما تاخذها محمد لو تبقى آخر بنيه ما تاخذها محمد
بعصبيه : باخذها يمه لو منعتيني بقنعك لين توافقين يا يمه انا مادخل
قلبي غيرها و لـ قاطعته ترفع صوتها : و الله ما تاخذها و لو فيك
خير خذها من وراي زي ما سوا ولد سالم
انا اتشمت بعيال الناس و ولدي ياخذها و الله ما تاخذها
مدري وش مسوين بنات ابليس كل واحد واقف بوجه اهله
عشانهم وش مسويه لك علمني وين شايفها يا محمد انطق ..
محمد : معاي بالدوام و حاشمه عمرها ما شفت منها شي
قاطعته صالحه : ماكل لحم خنزير ما عندك غاريّه انت ؟ تدوام
وسط رجاجيل و بتاخذها و كلن شاف وجهها ترضى على نفسك
و هي شوف عينك تمشي بين الرجال بعباة ملونه كاشفه وجهها
روح يا محمد لا تحرق اعصابي زواج من هالبنيه مافيه لو تطبق
السماء على الأرض ، محمد : باخذها يمه حطي هالشي ببالك
باخذ ريم و ما يهمني غير هالشي انا مديرها بالشغل و لا شفت
عليها العيبه و لو شايف ظنك اخذها ؟ بنت ناس و محترمه
صالحه : يكفي انها بنت رايد و منوه ، ضحك محمد : ايييه ايه
كل الرفض و العصبيه و الحلف عشانها بنت رائد و منوه عشان
اللي سويتوه انتي و عمتي ام غازي بـ خالتي ام بدر تحسبين ما نعرف
معمي على عيوننا ما نشوف و لا نسمع ترا كبرنا انكشف
كل شي طول عمري اتغاضى عن كلامكم و انا اعرف خالتي نوره
كل عمري اصد و لا اصدق عنها حرف لأني اعرفها و لأني اعرفك
يمه و اعرف عشان عمتي وش تسوين يمه الله يخليك خلاص
بعد هالعمر وش بقى سوالفكم ما خلصت ناس عايشه حياتها
هذي خالتي ام بدر سكنت الرياض و ادري ان قلبك محترق مع
عفته و ادري بعد انك مستعده تسويين اي شي عشان تحرقين
الاثنين و هم بغنى عنكم اللي يحط الله بين عيونه ما يضره شي
ادري انك خايفه تطيحين من عينها لو سمعت اني اخذت بنتها
خايفه تتشمت بك !! باخذها غصب و قدامكم كلكم و اللي به
خير يمنعني ، صالحه اللي يأست منه : ما برضى عنك تسمعني
لو بتاخذها ما برضى عنك ، هز راسه محمد يقوم : الله راضي
علي دامني ما غلطت و لا مسوي الحرام و لا تتشمتين بالناس
و عيال الناس يكفي ولدك خايس بالسجون من سواد وجهه
و تبين اعلمك مين اللي تحرش بها ؟ بنت رائد اللي ما تواطنين
طاريهم ولدك المصون تحرش ببنته و ناوي يحرقه بأرضه لكن
عشاني تركها للشرطه يتصرفون معاه نزّل راسي بالأرض يومها
ما عرفت اقول كلمتين على بعض و خليه يتأدب هذا شي واحد
من سواد الوجه اللي شفته بجواله خليه يخيس زود ..
