و تقدمت له منوه و ناظرتها نور تغمز لها : ما يمدي نفضّي
لك الجو روحي لجلسة الحوش الحو حلو و الدنيا رواق
ضحكت تضرب كتفها بخفه و توجهت منوه للجلسه و نور للمطبخ
تجهز القهوه بروقان من جا في بالها اللي حصل امس
قربه منها و حكيه اللي اثبت لها انه شاريها و وده فيها
قاطع ابتسامتها رغد : الله الله يا بخت راعي النصيب
بادلتها الابتسامه ، رغد : يختييي على الحب الله يرزقنا اذا
هذي علومه .. نور بحب : ااه يا رغد يارب تحسين بنفس الشعور
احسني فراشه طااايره ، عطيني من سويت امس
بابا حبّه مره ، جابته تحطه على الطاوله و نور تزين الصحن بروقان
و رغد تتأملها و بتذكّر : نسّيتيني اللي جيت عشانه
الله يهديه و يرد عقلك لك و اخذت ابريق و راحت تسوي لهم شاهي
و تجهز المعجنات .. اخذت صحن تضيف لهم منه و حطته بالصينيه
تطلع برّاد الشاهي و البيالات و من انتهت من تجهيزها طلعت للحوش تتنحنح : انا جيت لو كان الوضع مو اوكي .. ضحك رائد من حطت
الصينيه : الله على السنع بنعزم الضيوف دايماً اذا اشوفك كذا
نور تبوس يد منوه : طالعه على ماما بالسنع ، ابتسمت منوه تبوس
خدودها و راحت نور لداخل البيت ، منوه ناظرت صحن السويت تاخذ
منه حبه : رائد هذا مره لذيذ اذا رجعنا للبيت ابغى منه ، اشر على
خشمه و بوّس خدها و وقف : عيوني لك و ابشري يا قلب رائد بروح
للرجال توصين على شي ؟ وقفت معاه و سرعان ما جلست من حست
بدوخه يمسكها رائد بخوف : بسم الله عليك علامك ؟ ناظرته و تمسكت
فيه بقوه و غرفت عيونها بالدموع بخوف : ما اعرف من
قمت دارت فيني الدنيا احتضنها يهديها : انا يمّك لا تخافين و بدا يقرا
عليها و يحصنها لين حس براحتها .. ابوي انتي صرتي احسن ؟
هزت راسها بالإيجاب تناظره : احسن يا حبيبي لا تخاف روح
لا تتأخر على الرجال .. قاطعها : كل شي ينتظر المهم صحتك
انادي لك البنات ؟ منوه بهدوء : لأ لا تخوفهم انا بدخل لهم
ضمها بخوف يحاتيها و يهمس لها : خلي جوالك معاك اتطمن عليك
كل شوي ، ابتسمت من قبلها بخفه و قام يوقفها معاه يوصلها بنفسه
لباب الصاله و ناظرها من دخلت عليهم ، تنهد ياخذ الصينيه يروح
للمشب بـ استمرار دعواته لها .. دخل رائد مبتسم لـ بدر و من لمح دخوله
حط الورده بـ غلاف جواله و قام ياخذ عنه القهوه : عنك يا عمي
جلسوا و تقدم بدر يقهويه و عدم رضا رائد : انت الضيف و تقهويني ؟
بدر بضحك : انا ولدك ماني ضيف او غريب
رائد : عز الله ولدي اللي ما جبته من صلبي رجال و انا عمك
الله يهدي ابوك و يرده للصواب و يسخره لكم
بدر بهدوء : اللهم امين .. و اخذتهم السوالف عن الدنيا
و معاناة رائد و صبره و حياته اللي صارت منوه و بناته
بدر بحيره : إلا بسألك يا عم الرجال اللي عزمتهم البارح اعرفهم
اللي ما عرفته علاقتهم بك ، هز راسه رائد يجاوبه : رجال و النعم فيهم
مثلك و شرواك ، بدر بـ ابتسامه : شرواك الطيب
اكمل رائد : ايه و انا عمك كل واحد منهم حصل موقف
و شفتهم فيه عن عشر رجال عز الله .. مثلك خابر مالي احد سوا بنياتي
و ابيهم بأحسن تعليم و لا ودي ينقصهم شهاده
و لا وظيفه متعودين على الأمان و الراحه و الثقه وسط البيت
كبروا و انا ابوك عيني ماهي عليهم دايم و عيال الحرام بكل مكان
هذي ريم بوظيفتها تعرضت لها بنت سوء و لو لا الله ثم
محمد كان بنتي تضررت و بنيتي رغد جاها ولد حرام يتغيشمها
بسوالف سيارات و تعويض ما تفهم بها ، الله جاب لها فهد بالوقت
المناسب و مسح دمعته و اكمل : بعد هالعمر تمنيت لو اني جايب لهم
اخوان سند لهم و يوقفون بوجه اللي يضرهم انا ما بدوم لهم و الدنيا
تخوف و انا عمك ، قام بدر يبوس راسه : دمعتك غاليه يا عمي ..
انا ولدك و الدنيا فيها خير من يوم صار اللي صار يشهد الله أعدهم
خواتي .. انت لا تشيل هم و ارتاح ، رائد : فيك الخير و اشهد بالله
رجال بارك الله فيك بدر : ما عليك زود يا عم انت الخير و البركه
مد له الفنجان يقهويه و عدا فيهم الوقت
مساءً بقسم السباحه ..
منوه اللي نطقت : بتمرضون الاجواء بدت تبرد و ناظرت
ريم اللي نزلت للمسبح : ريم هذا و انتي العاقله تطاوعينهم !
ضحكت نوره تعطيها عصير ليمون : هدي اعصابك علامك
خليهم يسبحون الشتاء على الابواب صحيح لكن ريّض
التفت رغد بتساؤل : ريّض ؟ جاوبتها نوره : يعني بدري
عليه و اكملت كلامها مع منوه و رغد التفتت تهمس
لـ نور : اقول حبيبتي بكرا احفادنا علومتس يا خاله و ريّض
ضحكت نور و صرخت رغد من حست بشي يلامس رجلها
و يسحبها للأسفل و طلعت لهم ريم من العدم ، ضربت كتفها
بخوف : خوفتيني يا بنت ، ريم : من زمان عن الغطس
مين تتحدا ؟ نور اللي بدت تحسب لهم من غطست معاها
رغد و سرعان ما طلعت راسها تتنفس بقوه ..
