قفل الباب عن اهله لا يشوفون هالمنظر و ترك حاتم مع ابوه بسيارة الاسعاف و ركب سيارته يحرك خلفهم اتصل بـ فهد يعطيه الخبر لاجل ينتظره عند الطوارئ ما إن وصلوا استقبلهم فهد بالسرير يدخلونه العمليات و مسك بدر يمنعه عن الدخول خلفهم نطق بخوف : عسى ماشر شفيه الوالد ؟ ناظره بضياع و نطق : حادث صار له حادث التفت لحاتم يحتضنه و يقبل راسه فهد : الله يقومه بالسلامه بسيطه بحاول اطمنكم عليه تركهم ما إن جلس بدر بجانب اخوه وامامه عمر اللي نطق : الله يقومه بالسلامه و ناظره : وش اللي صار دخلت لأهلي مافيه إلا العافيه عمر بلع ريقه يناظر حاتم : كنا واقفين مع ابوك عند الباب ما شفت إلا غازي صدمنا طيحتي خفيفه لكن ابوك طاح على راسه الله يقومه بالسلامه بدر بـ ذهول : يصدمكم ليه وش السبب ؟ رفع حاتم اكتافه بعدم معرفه يبكي : بدر ابوي راح يموت ؟ بدر احتضنه سريعاً : لا يا ابوي انت بسيطه ان شاءالله ادعي له مو صاير إلا الخير اتصل جواله شاف اسمها و رد : هلا امي ؟ نوره : وش صاير يمه ؟ بدر قام عنهم يرد عليها بهمس : احد يمك ؟ نوره : لا انا بالمطبخ ، بدر : ابوي صار عليه حادث و اسعفناه دعواتك تنهدت نوره : لا حول و لا قوة إلا بالله شهقت لمياء من سمعتها : ابوي و اخواني فيهم شي ؟ قفلت و جلست معاها من جلست على الارض : لا يمه مافيهم شي ! دخلوا من سمعوا صرختها تقدمت عفته : وش صاير صبيتوا عظامي ناظرتها نوره و نطقت بخوف : بنتك ، الحقي بنتك اتصلي على احد يسعفها بكت اسماء من شافتها بهالمنطر اتصلت على غازي اللي قفل جواله و حاتم ما يرد اخذت جوالها عفته تتصل على احمد اللي بلغته باللي صار و جايهم بالطريق و نور تتأمل اللي صار و ما قُوت تتحرك جلست قبالها نوره من اخذوا لمياء مسكت يدينها بخوف : خالتي وش صاير علميني بدر فيه شي ؟ نوره : لا يا امي و الله مافيه شي بس صار حادث و اسعفوه على طول لاجل كذا دخل مرتبك ، نور : حادث على مين ! نوره : ابوه يقول جيتكم مابه شي سمعت الصوت و انا عندكم الله يقومه لهم بالسلامه و لمياء سمعتني و شوفة عينك خذوها يسعفونها الله يستر عليهم و يشفي مرضاهم و لا يفجعهم بغالي ! بالجهه الأخرى من الطوارئ دخلت عفته تصرخ فيهم ياخذونها و دخلوا فوراً يسعفونها و ناظرتها اسماء بخوف : وش صاير يمه ليه صار كل شي فجأه بكت عفته بضعف من كل شي مرت فيه بساعه عصفت فيها الدنيا و لا تركت لها مستقر تاخذ فيه نفس براحه ناظرت احمد بقلة حيله : تكفى يا احمد بنتي لا تخليها ! خرجوا بالسرير امامها يتوجهون لغرفة العمليات و فزت من مكانها تنادي عليهم و خارت قواها تجلس على الارض امتلكها الخوف و فزع قلبها من جا في بالها اسوء الأقدار و بكت تدعي من قلبها : ياربي لا تكون حوبة نوره في بنتي يارب خذها مني و اترك بنتي ياربي و اسماء لا زالت تتصل على اخوانها ما حصلت رد جالسه بخوف باكل داخلها هي للآن ما تعرف مين اللي دمه بثوب بدر و لا فهمت شي من كلام نوره و عفته في البيت و الآن اختها بين يدين الاطباء و الاجهزه و كلمة امها اللي ترن في اذنها و اتصلت على نوره : خالتي امانه عليك شصاير ؟ نوره : قوليلي شصار مع اختك ؟ اسماء ببكى : تو دخلوها للعمليات ما اعرف وش يصير ، تنهدت نوره بخوف : ما عليه يمه يمكن هذي ولاده مبكره من الخرعه خلك يم امك انا جايتكم قفلت نوره و قامت تاخذ نور لأهلها و ما إن وصلت دخلت لهم بيدها نور و ناظرتها منوه بخوف تترك سعود تمسكها : بسم الله شفيها ؟ نوره : هي مافيها شي بس خافت سالفه طويله اقولها لك لا اتصلت عليك مضطره امشي الحين انتبهي لها و تركتهم ترجع للسياره تتوجه للمستشفى و جلست منوه و نادت على رغد تجيب لها مويه و اخذت نور نفس من اعماق صدرها تمسك كفوف منوه برجفه تسرد لها اللي صار تحت ذهول منوه و رغد و احتضنتها منوه و تقرا عليها : مو صاير إلا الخير الله يقومهم بالسلامه انتي اهدي مو زين لك التوتر ، نور : مو بيدي ماما دخل علي بدر ثوبه مليان سكتتها منوه : اشش لا تقولين شي ارتاحي الحين و ان شاءالله يطمنونا عنهم و اخذهم الوقت بين انتظار عملية سالم و لمياء نوره اللي جالسه بوسط اسماء و عفته تهديهم نطقت عفته : انا ادري هذا خطاي و ربي رده في بنتي سامحيني يا نوره تكفين ما اقدر اموت لو يصير فيهم شي نوره ناظرتها بذهول : مسامحتك بس لا تقولين كذا و تعورين قلبي عليها باذن الله تقوم بالسلامه بعد ساعات خرجت لمياء بسريرها فزت عفته و دخلت معاهم لغرفتها تتأمل ارهاق ملامحها ناظرت الدكتوره : وش صار معها ؟ ردت الدكتوره وهي تتأمل خوفها عليها : صار معها ولاده مبكره الأم بخير الحمدلله لكن الطفل يبقى بالحضانه لين يكتمل نموه و غمضت عيونها نزلت دموعها بحسره و مدت نوره يدها تربت على كتفها : الحمدلله على سلامتهم مبروك ما جاكم يا ام غازي ناظرتها بحزن : هي بقى فيها مبروك يا نوره ؟ قاطعتها نوره : لا استغفري ترا ما يجوز تقنطين من رحمة ربك ولاده مبكره اهون من غيرها و عقبال يبشرونك بطلعة ابو بدر بالسلامه و دخلت اسماء بيدها قوارير المويه تمدها لهم نطقت : شفتهم بالجهه الثانيه ابوي للآن بالعمليات ناظرتها عفته بحزن : ما عرفتي وش صار ؟ اسماء اللي لا زالت بصدمتها : غازي صدم ابوي و هرب !شهقت عفته : وش اللي تقولينه ليه يصدم ابوه ؟ رفعت اكتافها بـ حيره ناظرت لمياء : ولدت ؟ نوره : الحمدلله ولدت بالسلامه اسماء : و البيبي وينه ؟ اكملت نوره : الحين خُدج يا يمه يعني ما يصير يطلع لين يكتمل نموه ، تنهدت و جلس قبالها و دخل احمد و خرجت نوره تتركهم براحتهم و توجهت لبدر من شافته و التفت بـ استغراب : يمه ؟ نوره : جيت من زمان اختك ولدت ولاده مبكره من الخرعه بدر بذهول : و نور وينها ؟ اكملت نوره تطمنه : تركتها في بيت اهلها ابوك وش صار عليه ؟ بدر : يقول طيحته قويه اثرت على الدماغ واحتمال كبير يفقد الذاكره نوره بذهول : لا حول و لا قوة إلا بالله الله يشفيه ، بدر : اللهم امين انا بروح اغير ثوبي تروحين معي ؟ هزت راسها بالإيجاب و ركبت معاه : يمه روّح يم نور طمنها البنت طار قلبها من خوفها عليك بدر : ابشري بس اغير ملابسي نروح لها و بخليك عندهم ارجع اشوف لمياء و كمل طريقه لبيتهم يبدل ملابسه و يخرج يشم ريحة الطبخ وقف عند باب المطبخ مستغربها : وش تطبخين يمه ؟ نوره : اسوي اكل لنور و اختك لاجل تاخذه معاك ابتسم لها يقبل جبينها : الله يحفظك و يطول بعمرك باقي له ؟ هزت راسها بالنفي تنطق : جاهز يا امي بس البس عبايتي اجيك توجه بدر للشارع يتأمل مكان طيحة ابوه ، التفت لخروجها ياخذ عنها الاكل و توجهوا لنور اللي بدلت ملابسها لفستان ناعم و رفعت شعرها و ناظرت انعكاسها بالمرايه و لمست بطنها تهمس : لا تخافين يا ماما اتفقنا ؟ بابا معانا دايماً ، نزلت تجلس بالحديقه بعيد عن الخوف اللي سبب ضجيج داخلها و زعزع امانها لأول مره بدخول بدر اللي تأمل سكونها و جلس يمينها و التفتت له بفزع : بسم الله متى جيت ؟ احتضنها بدر بحنيّه : توني ياروحي طمنيني عنك ؟ تنهدت تحط يده على بطنها : انا و البيبي خفنا !
تمدد على فخوذها و حط وجهه على بطنها يقبلها بهدوء ..
