ابتسمت نور تتأمل المكان اللي فاض باللون الوردي و باقات الورود بكل مكان و دخل بدر بهدوء يهمس : ورد متى تصحى ؟ ناظرتها لثواني تهمس بالمثل : مو الحين رضعتها توي و ابتسم بدر يجلس عندها يتأملها و يحصّنها ، وقفت نور عند المرايه بـ ضحك : طاح كرتي ؟ التفت بدر و قام خلفها يحتضنها و يقبل كتفها : انتي راس المال لا تقارنين نفسك بـ احد ! ابتسمت له و قفلت حبال روب النفاس ، جلست على السرير من دخلت نوره بيدها صينية الاكل و اخذها عنها بدر يحطها على طاولة نور : يا عمري خالتي يعطيك العافيه تعبتك معاي ، نوره : تغذي يا امي عليك بالعافيه لا بغيتي تنامين عطيني خبر اخذها عنك ! ابتدت تاكل و اشرت على بدر اللي يحاول يصحي ورد و رمت عليه نوره الوساده : اتركها يا بدير لا تقعدها ما تنام علينا الليل كله ! بدر : اسهر معاها ما عليك ضحكت نور : مثل امس خليها لي ، غمز لها يبيها تسكت و اكملت نور : إلا بعلمها ، حصلته فاتح عنها اللحاف نايم جنبها ، نوره بذهول : الدنيا برد ، انت تتحمل و عندك مناعه هي ما تتحمل ! بدر : ما قاومتها و هي تحاول تتحرك و اكملت نوره : تقوم تفكه عنها ؟ ضحكت نور اللي بدر يتحلّف فيها من ورا نوره و نطق بدر : ترا اليوم خواتي بيجون و احتمال تجي عمتي ام غازي ، نوره : حياهم الله إلا يا بدر الوضع لمتى انا ما صرت ارتاح بالبيت و لا اطلع به متى ماابي و السبب هو ، آخر مره لقيت ورده على رف المطبخ و انا داريه ماهي حركات بدير لا جاب لك شي يعطيك فوق لكن هذي سوالفه ادري بها ، تنهد بدر : و الله اني مو عارف شسوي علمته يقول لا هذي زوجتي ودني اشتري ذهب اراضيها به !! ضحكت نوره و صدت تناظر ورد و غمزت نور لـ بدر من شكت بالوضع و ناظرها بدر يفكر باللي تلمّح له و خرج للصاله الأخرى التفتت نوره من ناداها بدر توجهت له بـ استغراب : هلا امي ؟ جلس امامها و همس : يمه لو مثلاً مثلاً ابوي يبي يتزوجك وش رايك ؟ نوره بذهول : وش تخربط انت هو قايل لك ؟ هز راسه بالنفي : هو يحسبك انك زوجته للحين انا من اطلع للدوام لين ارجع خايف انه يشوفك او يسوي شي ما يجوز لك وش قلتي ؟ نوره : لا يا بدر يروح لبيته و اهله يقومون فيه ، بدر : تحسبيني ما حاولت ؟ و الله حاولت لكنه رافض و مواعيده هنا اقرب !
بدر : انا ترا خايف عليك يمه افهميني و لو يصير شي الناس ما ترحمني ما تحشمني سافهم و لا يهمني كلامهم على وجود ابوي و وجودك بنفس المكان لكن لو توافقين تراه زواج مؤقت لين ترجع ذاكرته يطلقك و انا بنفسي انهي الموضوع مثل ما بديته ! تنهدت نوره : لو بوافق بشروط غرفتي ما يطبها يبقى بقسمه و لا يطلب مني شي ثاني غير اللي اسويه الحين ، ابتسم بدر يقبل راسها : الله يديمك لي يالغاليه خليني اشوف الوضع اعلمك به لو صار جديد ، تركهم يدخل غرفة ابوه اللي يتابع الاخبار يجلس عنده نطق بهدوء : ابوي عندي موضوع ودي اكلمك به ، التفت سالم يناظره و اكمل بدر : ما ودي الناس تتكلم عنك بالشينه و عن امي بعد هالعمر وش رايك تتزوجها ؟ سالم بـ استغراب : هي زوجتي من يقول غير هالكلام ؟ تنهد بدر : تدري انها ماهي زوجتك و انت هالفتره عندنا في البيت عشان صحتك و مواعيد المستشفيات اقرب لك من الديره لو ودك نقفل على هالسيره ترجع لبيتك هناك و ينتهي كل شي ! سالم : انا ابقى هنا احسن من هناك يا ابوك و نوره وش تبي اللي تبيه يصير ؟ ابتسم بدر : نجيب شيخ يعقد و ماله داعي زواج و تكاليف و لا ودك ازفك ؟ سالم : ابي اشوف نوره وش تقول و اكمل بدر : ترا عندك زوجه غير امي و عيال و بنات بيتك الاول بالديره ، هز راسه بالإيجاب : اجيبهم هنا يسكنون المهم نوره ، بدر بذهول : تبي تشتري بيت بالرياض و تستقر يعني ؟ سالم : الله الله نسكن جميع شوف لي بيت قريب من بيتك اجي اشوف نوره كل ما قدرت ، ابتسم من اصراره على وجود امه و شوقه لها بعد هالعمر و جلس معاه و تفكيره بالأيام الجايه كيف بيتصرف مع عفته و عارف ما تسكت عن اللي بيسويه ابوه ، تنهد يقوم يعلم امه باللي صار و يشاورها بعد شهرين .. دخلت عفته البيت تتأمله نطق حاتم : يعني هذا راح يصير بيتنا ؟ ابتسم بدر : اذا انه عجبك تبشر به ! هز راسه بالإيجاب و صعد الدرج بسرعه : بروح اختار لي غرفه ، ضحك بدر و ناظرته عفته : سالم وين يستقر ؟ بدر : ما علمني لكنه معزّم على السكن هنا اريح له و لمواعيده و اقرب منها و انتم تستقرون بالبيت ان شاءالله ، تنهدت تخفي غيرتها و شعورها بوجود نوره حولها مو مريّحها ابد و ودها لو تسيطر على سالم من بدري قبل لا يعقد على نوره و اكملت خطواتها للمطبخ و تتأمل تفاصيله و طلعت للصاله و الغرف تشوف الاثاث بنفسها
جلس سالم بالصاله و بحضنه ورد اللي تضحك من لعبه لها و دخلت نوره مبتسمه : لا تضحكها واجد ، فز قلبه من سمعها و جلست قباله تحط صحن الفواكه و ابتدت تقطع له ، بنزول بدر و نور و نطقت : ماما ازعجتي جدانك ؟ نطق سالم : تضحك لي قبّل راسه بدر يجلس يمينه و اخذ عنه ورد يقبّل خدودها وسط ضحكها من حط وجهه على بطنها و اخذتها منه نور : يا روحي ! اقترب بدر يهمس لسالم : اليوم غازي بيطلع ودك تروح معي ؟ هز راسه بالنفي : قل له لا يجيني و يروح لبيت امه على طول !! التفت لنوره اللي مدت له الفواكه و ابتسمت لورد اللي ناظرتها نطقت بـ حنان : تعرفين جده يعني ؟ انتي قلب جدتك و اخذتها تحطها على المفرش و تبدا تلعبها و صوت ضحكها يملي البيت نور : الله يعينني بتزعجني بالحفله ، مو راضيه تنام من صحت ! نوره : ما عليك منها خلصي امورك و اجهزي خليها عندي ، نور : خالتي بتزعجك ادري بها ! هزت راسها بالنفي تتأمل ورد : انتي تزعجيني ؟ ضحكت ورد و نطقت نوره : شوفيها تقول لأ ضحك بدر و صعدت تبدا تجهيزها لملكة رغد تلبس عقدها ، جلست تضبط شعرها بدخول بدر : يارب قوّي قلبي لا يطير ! ابتسمت بخجل و مسك يدها يقومها و لفت نور توريه فستانها و نطق : يوه على الجمال ! شرايك .. قاطعته بضحك : لا مافي ! ضحك بدر : تكفين نور ، هزت راسها بالنفي : اصلاً خلصت باقي لبس وردي و امشي ، حبيبي ممكن تجيبها البسها ؟ بدر : ابشري يا قلب حبيبك بس الوعد بعدين ، ضحكت نور و فتحت دولاب ورد تطلع فستانها الزهري و عطرها ، دخل بدر بيده ورد : جت الاميره وين فستانها ؟ اخذتها من يديه و حطتها على سريرها و نامت من ابتدت تلبسها و ضحك بدر من نامت ورد : وين اللي بتزعجك هذي هي نامت ! نور : نامت الحين و تصحى علي بعز الحفله ، بدر : لا تطلعين اشاعات بنتي مؤدبه ، نور و هي تلبس عبايتها : اكيد تدافع عنها ! ضحك بدر يبعد شعرها عن العبايه و يقفلها و يتأمل حلاوتها : طيب ليه حلوه كذا ؟ بشويش علي ! حاوطت رقبته و قبلته بهدوء : همم يمكن لأني زوجتك ؟ بدر طار عقله من دلالها و تقدم يقبّل عنقها بـ نهم وسط نداء نور ! و ابتعد ياخذ نفس و يتأمل آثاره عليها و ابتسم بـ خفه : لبيه يا روح بدر ؟ ضربت صدره : وقتك يعني ! هز راسه بالإيجاب ياخذ ورد و ينزل للسياره ، التفتت للمرايه تشوف بوسته و تنهدت و طبطبت عليها بالكريم و ما إن انتهت نزلت له و مشت لأهلها
