ناظرها يبتسم : متى كبرتوا انتو ؟ ضحكت تحضنه
اكثر : الله يحفظكم و يخليكم لنا روح و انا ببقى معاها
اي شي يصير ابلغك بس .. لمحت الدكتوره و أشرت لها
تجي ، اقبلت عليهم تناظر رائد ، ريم : بابا هذي دكتورتها
تكلمت معاه بشكل مُفصل عن وضعها : الفحص الجاي
نحدد وقت العمليه المهم تواجدك عشان التوقيع ..
رائد : يعطيكم العافيه ما قصرتوا ، و دخلوا للغرفه عند
رغد يناظرها : تغديتي بابا ؟ هرت راسها بالنفي : جيت
على طول من اتصلوا علي .. رائد : نطلب من المطعم ؟
ريم : لا يا عيوني روح للبيت لا ينشغل بال ام سعودي
ضحك يوقف : يلا بمشي يا بابا اذا استجد شي اتصلي
علي و انزلي تغدي في مطاعم قريبه و خرج رائد للبيت
عند منوه بالمطبخ بفستانها المكسّر تجهز الغدا ابتسمت
من سمعت صوت رائد تغسل يديها و تطلع له : حبيبي !
احتضنها بشوق و يقبل كل مكان فيها : اشتقت لك حبيبتي
تناظره ودها تشبع من شوفه ، رائد : طمنيني عنك ؟
جلست جنبه و تشد على يديه : ابشرك بخير انت كيفك
فقدتك مره .. قبّل خدها : بخير دامك بخير و لا تحاولين
شوقي لك اكثر سعودي اخبارك عسى ما تعّبت منوتي !
ضحكت تمسح على بطنها : ولدك المشاغب ، رائد : افاا
وش مسوي بك ، اكملت منوه ترخي راسها على صدره
من حاوطها بذراعه : مو طبيعي كل وقتي نوم يا اقوم اكل
او انام اشوا البنات قايمين بشغل البيت عني و يداروني
و شافت ساعتها : تأخرت ريم مفروض جايه من ساعه !
تنهد رائد يقبل جبينها : منوتي .. ناظرته بخوف من نبرته
و اكمل رائد : مافي شي حبيبتي بس رغد تعبت و ريم
عندها بالمستشفى ، منوه بفزع : بسم الله بنتي شفيها
رائد امانه شفيها ! رائد احتضنها يسمي عليها : مو زين لك
الخوف اهدي مافيها شي والله انا جيت منهم توني معدتها
توجعها و بيسوون لها فحص .. منوه بتذكر : إلا والله
اذكرها تشكي معدتها بالله رائد قم ودني ..
مسك يدها : ابوي انتي الحين مافيه زياره العصر نروح
لها تبين تشوفينها نكلمهم فيديو ؟ مسحت دموعها
تهز راسها بالايجاب .. اخرج جواله يتصل على ريم
و ردت تشوفه بالبيت عند منوه : هلا بابا ، رائد : ابوي
امك تبي تشوف رغد صاحيه ، حطت الجوال عند رغد
اللي ضحكت من شافتها مكالمة فيديو : ماما يا عيوني
منوه بخوف اخذت الجوال من يد رائد : بسم الله عليك
شفيك ماما ؟ رغد بمزاح : الدكتوره تقول لي هذي من
الغيره عشان بيجيكم بيبي و غيرانه منه ، ضحك رائد
و ابتسمت منوه من مداراتهم لها : علميني يوجعك شي ؟
رغد : مافيني شي يا عيوني اتدلع عليكم يعني مو بس انتي
تتدلعين ، ضحكت تناظر رائد : بجيك العصر ان شاءالله
ارتاحي الحين ، ناظرهم رائد : استودعتكم الله حبيباتي
التفت لها : شفتي مافيها شي ؟ منوه : تعلمني فيها !
اعرفها تكابر على الوجع صدق رائد علمني شفيها ..
تنهد رائد : مراره و يبون يسوون لها فحص و يشيلونها
ناظرته بخوف و احتضنها : صغيره رائد على العمليات
اخاف ما تتحمل ، رائد : بنتي قويه و لا ليه صارت دكتوره !
و بعدين شكلك ما اشتقتي لي و صد عنها يمثل الزعل
ناظرته منوه بضحكه تقبل خده بخفه : تتدلل علي ؟
وقفت تمسك يده يقوم معاها يحاوطها يصعد لغرفتهم
العصر في المستشفى ..
دخل رائد مع منوه متوجهين لـ رغد و دخلوا الغرفه
تناظرها متمدده و مغطيها الابيض تغرق عيونها : ماما
ابتسمت رغد تمد يدينها تحتضنها و تنهدت منوه بخوف
تحصنها بكل الآيات و الاذكار تقبل جبينها : بسم الله عليك
امس و انتي عندي مافيك شي متى اوجعتك ياروحي ؟
رغد : تقلصات خفيفه و اليوم بغرفة العمليات شفت دم
و طلعت ما قدرت اتحمل الألم و ما اذكر بعدها شي
منوه ناظرت رائد و نطق : هذي قدامك طيبه ليه الخوف
ناظرتها بحنيّه : اكلتي شي طيب ؟ هزت راسها بالايجاب
و اخذتها ريم تجلسها على الكرسي ترتاح فيه : اكلنا كلنا
تطمني نور ليه ما جت معاكم ؟ منوه : عندها كلاس
مفروض مخلصه الحين ، ريم : انا بكلمها تجي اتصلت
عليها : نور خلصتي كلاسك ؟ نور : توي طالعه منه
ريم : طيب ترانا مو في البيت نور : الغدرات هذي اعرفها طالعين
مع بعض بدوني ! ريم : لا مو طالعين رغد تعبانه
شوي و حنا عندها برسل لك لوكيشن و تعالي لا تتأخرين
قفلت منها ناظرتهم : محد يطيح بلسانها ..ضحك رائد
و دخلت الدكتوره : السلام عليكم كيفك رغد ؟ همست : الحمدلله
و اكملت الدكتوره : انتي بتكوني دكتوره و عارفه
كل شي ماله داعي الخوف مجرد فحص بسيط و ان شاءالله
امورك تمام ، منوه : بعده الفحص عمليه ؟ التفتت لها
الدكتوره : القرار بعد النتيجه اللي تطلع معانا و يُفضل نشيلها
عشان ترتاح منها و ما تحصل اضرار خرجت عنهم يكملون
جلستهم على وصول نور اللي من وصلت قلبت المكان من
خوفها : رغودي شفيييك !! قبلت خدها و ابتسمت : الله
الورد لي ؟ نور : لا بخليك تصورينه و تاخذين الكرت و بعدها
باخذه لغرفتي ، منوه : طالعه على مين ، نور : جمالي ؟
اكيد عليك و لا يا بابا .. هز راسه بالايجاب يوافقها الرأي
منوه : اتحدوا علينا الله يعيننا يا بناتي ، ضحكوا و تغير جوهم
و زال الخوف من قلب منوه من شافتها تضحك و خرج رائد
معاها ينزلون ياخذون لهم عصير و سمع رائد احد يناديه
التفت له يلمح فهد جا يسلم عليه : عسى ماشر يا عمي ؟
رائد الله يسلمك يا ولدي بنتي تعبانه .. فهد : ما تشوفون شر
و انا بالخدمه لو احتجتني بـ شي ، منوه همست لرائد يوصيه
على رغد و ناظره : و انا عمك بنتي تقول كانت بالعمليات
و شافت الدم و تعبت و الدكتوره تقول مراره و حصوات
و بعد الفحص عمليه .. فهد ناظره بذهول يفهمه رائد بأنها
رغد ذاتها و نطق : ابشر يا عم انا بشرف عليها شخصياً
و بتابع الحاله مع الدكتوره و بطمنك اول بأول ، ابتسم له
رائد : ما تقصر يا فهد رايتك بيضاء ، فهد : الله يحفظك
و مشى يدخل عند الرسبشن يبحث عن اسمها و توجه لهم
