هزت راسها بالنفي و بدت نوره تذكر ايامهم الحلوه :
كان يوصلنا للثانوي و بدون قصد سمع امك تناديني يا نوره
و طاح بحبها و صار يجينا متعطر و كاشخ يشهد الله انه امين
ما تعرض لها و لا كلمها ليوم تخرجنا علمتني منوه انه خطبها
حنّت نور لأمها و دمعت عيونها و لمتها نوره بحنيه : لا يا امي
احمدي ربك بدال البكى جيتي عند اميمتك الثانيه بالحفظ
و الصون ناظرت فيها : خالتي جوالي فيه موقع بيتنا هنا
و ناقصني اغراض ضروري اروح له ابغى جوالي
بتذكر من نوره : ايه يا امي بدير عطاني جوالك البارحه
و نايمه ما حبيت ازعجك ابتسمت بفرحه و اخذته منها
التفتت لها : تروحين معاي ؟ هزت راسها بالنفي
لا انا و لا انتي نروح لوحدنا انتظري بدر يجي و يودينا
بحلطمه : لا بليز قريب شوي نروح مشي و تعلميني عن الديره
نوره : الدنيا ماهي امان يا بنيتي بدر حروة جيته
انهت كلمتها و سمعوا صوت الباب و تخبت نور بظهر نوره
لانها مو لابسه الطرحه و بثوب امه اللي ناسبها
صد من انتبه و هو ناسي الوضع الجديد السلام عليكم و العذر
والله اني ناسي نوره بحنيه : ما عليه يا امي اهل ان شاءالله
روّح تروش و احط الغدا ، استغرب كلمة امه " اهل ان شاءالله "
و راح لغرفته يفكر انها في بيته و حسبة خواته ، بالمطبخ تقنعها
بعد الاكل يروحون بيتهم و سمعها وقت خروجه من الشور
و تنحنح و تخبت خلف الباب و كمل مشي لغرفته .. ما حب زنها
على امه و فهمها شي آخر و انزعج ، خافت و سكتت
و تناست الموضوع اكلوا و هي اكلت بالمطبخ و بالها
مشغول باهلها تشوف صورهم و اتصالات ابوها و المحادثات
و فز قلبها من سمعت فويس تحت ندائه المحبب
" يا نور البيت كسبتي الرهان و فاز الهلال و سفرتك
تم وين ما ودك ، منوتي ودها بالسفر بعد "
" ابوي وينك عن جوالك يا نوّارتي "
على مروره سمع الفويس و محتواه و ضحك
و سكت من سمع شهقتها و بكاها و تنهد كمل طريقه
غسل و رجع جلس جنب امه اللي تكمل اكلها
و نطقت : اقول امي البنيه تبي تروّح بيتهم لف باستغراب :
لهم بيت هنا ؟ هزت راسها بالإيجاب : اي يا وليدي
بيتهم قريّب نوديها .. فكر لحظات : امي صعبه نتركها
بالبيت لحالها علميها ان كان ودها تاخذ اغراض و ترجع معنا
بوديكم جميع غير هالكلام ما عندي ، ناظرت فيه نوره
و ابتسمت : اقول حبيبي ما ودك تقر عيني بشوفتك معرس
ودي افرح بشوف عيالك حولي ، ضحك و باس يدها :
على يدك .. تفاجأت بعد رفضه لفتره و محاولات اقناعه
اللي تفشل بشكل او بآخر و اخيراً رضا يدخل الفرح هالبيت
سكت لدقايق و قال : لكن امي عندي شرط ابوي ما يدفع الريال
ناظرت فيه تنتظره يكمل كلامه ابوي استخسر صحتك و راحتك
و راح استمتع بحياته انا بغنى عن فلوسه بحنيه نطقت : انت ابوي
و امي و بقوم بعرسك ما بينقصك شي ضحك : و ترقصين ؟
فيك حيل تربيني انا و عيالي ، طار قلبها بالفرح مجرد التخيّل
ايه يا امي ايه افرح فيك و ارقص و اربيك و اربي مرتك و عيالك
- بيت رائد -
انتظار رائد بناته بدمه الفاير من خوفه عليهم و ندمه
بعدم قدرته على تواجده معهم و معرفة السبب
سمع صوت السياره و قام يستقبلهم بـ احضانه
حضنه ريم بقوه وسط بكاها و مسح على راسها يسمّي
عليها و قربت لهم رغد شاركتهم الحضن وده لو يخبيهم
عن الدنيا طال انتظاره لنور يناظر السياره الفارغه
ارتخت يدينه عن الحضن من كان شكه بمحله
سأل بهدوء : نور وين ؟ بكوا بخوف و تذكر اللي حصل
و رفع صوته لأول مره عليهم : اختكم وينها فيه !!!
طلعت منوه بخوف تناظرهم و مسكت يده تهديه : علامك رائد
شفيهم البنات ، تلفتت بخوف تدوّر نور امي نور وينك ؟ ما سمعت
غير شهقات البنات جن جنون رائد ما عاد يشوف الدنيا اخذها
داخل البيت و قفل الباب جلسوا و خمس دقايق من الصمت خرج
صوته الهادي " او ما يسمى الهدوء قبل العاصفه " : اختكم وينها
فيه ليه ماهي معكم ؟ تعرّض لكم احد بـ سوء ؟ تشجعت ريم
و تنهدت بدت تتكلم اللي حصل بغياب جزئية نور و بدر
ضحك بسخريه من قهره و هز راسه : اجل خذوها لين
اجي و اخذ العلم ، مسكت يديه منوه تهديه : ريّح مافي
إلا الخير نروح و نشوف اللي حصل .. ناظرها و شد على
يديها : منوه ماسكين بنتي ! بقانون مين بنتي تنمسك صرخ بعالي
صوته : على كيف مين ؟ تخلونها كيف اختكم الصغيره
تتركونها وراكم ليييه !! خافوا منه و عليه و اشرت
لهم امهم يروحون غرفهم و مشوا على طول ..
