(أنْتَ تُهْمِلْ وَغَيْرُكَ يَهْتَمْ ... وَالقَلْبُ يَا سَيدِي مَيالْ)

بارت ٦٠

كان نايم في امان الله بعد يوم طويل من لعب البلوت مع عيال عمه، فجاه دق جواله، اخذ الجوال وبدون ما يشوف اسم المتصل رد ، المتصل : سلام عليكم ، تركي بنوم : وعليكم السلام، ضحك نواف وقال: يا الحبيب لا يكون صحيناك من النوم ، رد تركي وهو كله بغضاء وحقد على نواف لانه صحاه من عز نومه : لا ابد تصدق كنت جالس اتفرج في جوالي، انت صاحي انت شف كم الساعه من يدق الحين بذي الحزه؟!، حك نواف راسه باحراج وقال : والله لو انه مو شي مهم ما كان دقيت عليك هالحزه،، صحصح تركي يوم حس ان الموضوع جدي ولازم كل حواسه تكون يقظه: آمرني وش بغيت، تكلم نواف وهو منحرج: ما يآمر عليك عدو بس بغيت اسالك تعرف الدكتور خالد **** ، تركي : ايوه اعرف ليه؟ وبخوف وقلق : لا يكون صار لاحد شي؟؟؟ "طبعا بكلمه احد هو يقصد الحب تولين هههه" ، نواف: لا لا ما حولنا شر بس،،، سرد لتركي القصه لكن باختصار ما حب يدخل في تفاصيل كثيره،، تركي : ابشر اعتبر الامر تم بكلم لك واحد من الشباب يشتغل في نفس مستشفى الدكتور وببلغك اذا قدرنا نقدم موعدكم ،، ابتسم نواف وشكره وقفل من عنده،، كان رح ينام بعد ما حط الجوال على الكوميدينه لكن نقز من سريره يوم سمع صراخ ،،

نرجع لملاك،،،،
حست بشي يمشي على كتفها كانت رح تبعده لكن اول ما لمست يدها الشي الي على كتفها صارخت متناسيه مكانها ووين هي من الخوف وقامت تركض وما حست الي وهي طايحه بوجهها على الارض، تعرقلت بجسم الانسانه الي كانت تحتها ومن سوء الحظ كانت تولين: اخخخ يا ظهري وش صار اعوذ بالله من الشيطان الرجيم جاثوم، شافت ملاك وهي طايحه على الارض وقامت مفزوعه وهي تحاول تقومها: ملاك بسم الله عليك وش فيك ليه تصارخين وليه طايحه؟؟؟؟ شافتهم ساره وتكلمت بقلق : بسم الله الرحمن الرحيم ملاك وش فيك ؟؟ كانت ملاك ترتجف وهو تقول : م م مدري كان في شي على كتفي ولمسته وطلع عنده رجولي كثيره يمهههه،،، فجاه صحت لين واعتدلت بجلستها وهي شعرها منكوش ووجهها مفقع من النوم : وش فيكم انتم ما تشوفون ان الناس تحاول تنام هنا!!!! استغربت من سكوتهم ونظراتهم وشافت كيف وجيهم راحت صفراء من الخوف : بسم الله وش فيكم كدا كانكم شايفين عفريت اوكي شكلي يخوف بس مو لذي الدرجه،،، كانت تولين تحاول تتكلم بصوت هادي وثابت بدون ما تخوف اختها : ل ل لين حح حبيبتي اسمعي لا تتحركين زين؟؟ استغربت لين وقالت : ليه وش فيه؟ وبخوف : لايكون وراي شي!!!! ابتسمت تولين ببلاهه : ليته ورا ظهرك ههههه ، كانت لين بتصارخ على تفاهت اختها لكن انشلت حركتها وطارت كلماتها من حست بالارجل الصغيره الي تمشي على شعرها،،،،،،