It's YOU [END✅]

it's YOU : EP 36

តាមការពិតទៅ ជុងហ្គុកបានពឹងឲ្យហូស៊ុកជួយស៊ើបមើលពីម្ចាស់ព្រួញតាំងតែពីថ្ងៃនាយត្រូវពួកនោះលបប្រហារលើកដំបូងមកម្ល៉េះ ហើយផែនការនេះដំណើរការទៅជារឿយៗមិនរអាក់ រហូតមកដល់ពេលនេះឯង។ ហូស៊ុកបានឲ្យប៉ូលីសបន្លំខ្លួនចូលក្នុងក្រុមហ្គីឈីអាន់ ចំណែកខ្លួនតាមមើលពីក្រៅដើម្បីបូកសរុបភស្តុតាងចូលគ្នាជាមួយជុងហ្គុកផង កុំឃើញនាយស្ងៀមៗ ថានាយព្រងើយឲ្យសោះ នាយបានជួលពួកផ្សេងទៀតមកធ្វើការលើរឿងនេះដូចគ្នា។ ហើយថ្ងៃជួបជុំគ្នានៅក្លឹបដើម្បីពិភាក្សានោះ ហ៊ូសុកអត់បានប្រាប់តំបន់ដែលវាកាន់កាប់ឡើយ ត្បិតនាយមិនទាន់ទទួលបានព័ត៌មានច្បាស់លាស់ ទើបតែរសៀលនេះប៉ុណ្ណោះ បន្ទាប់ពីកូនចៅដែលគេឲ្យបន្លំខ្លួននោះស៊ើបដឹងក៏រាយការណ៍មកប្រាប់នាយ ហើយហូស៊ុកខលមកប្រាប់បន្តនេះឯង។

ផឹប!!

មួយគ្រាប់ចំស្មារ តាមថាតម្រង់មកកាន់ក្បាលតែជុងហ្គុកឱនតម្រៀបផ្កាឲ្យស្រួលបួល ទើបខ្មាន់កាំភ្លើងសារេកានុងខុសគោលដៅ។ មួយគ្រាប់នេះ កំលោះម៉ាហ្វៀទប់ត្រង់របួសសម្លឹងមើលជុំវិញខ្លួនស្របពេលវ៉ុនអ៊ូនិងកូនចៅឯទៀតរត់មកជួយនាយល្មម ។

ផាំង!!

មួយគ្រាប់ពីដៃជុងហ្គុក នាយកំលោះក្រឡេកឃើញមនុស្សមួយក្រុមពីក្នុងព្រៃ បាញ់ចំស្មាអាម្នាក់កាន់កាំភ្លើងតម្រង់មកកាន់គេ។

" ចាហ្វាយ ចូលទៅក្នុងសិនទៅ " វ៉ុនអ៊ូប្រាប់ព្រមទាំងកាន់កាំភ្លើងខ្លីជាប់ដៃមួយដើមដូចគ្នា ឯកូនចៅផ្សេងទៀតក៏ត្រូវគ្រាប់ដែលរះចេញពីក្នុងព្រៃច្រើនគួរសម ។

" ប្រយុទ្ធទាំងអស់គ្នាទៅ " ជុងហ្គុកមិនបានសំងំយករស់តែឯងឯណា បើទោះជាត្រូវរបួសហូរឈាមអស់ជាច្រើនយ៉ាងណាក្ដី នាយយកកាំភ្លើងពីក្រោយកៅអីអង្គុយកាន់ជាប់ដៃទាំងសង សម្លឹងមើលកូនចៅគេដែលគេចពួនគ្រប់ទីកន្លែង។

គ្រាប់កាំភ្លើងគ្មានសម្លេងរះពីទិសខាងត្បូងដែលមានព្រៃបាំង ចំណែកជុងហ្គុកនិងបក្សពួកឯណេះកំពុងតែពួនក្រោយឡានចាំឆ្មក់ឱកាសតបតទៅវិញ ខ្លះមានផ្លាកផ្នូរជារនាំង ខ្លះយកដើមឈើមកពាំង។