انا الفلك والناس حولي مدارات تشوف عز نفوسها من خلالي

part 7

ناظرت رقمه بتردد له اسبوع من سافر~لندن~ وماكلمته اخذت نفس تدق عليه وانتظرت تعتدل بجلستها من وصلها صوته:هلا
سكتت لثواني تمسك خصلة شعرها:كيفك؟
نجم:الحمدلله وانتِ؟
فُلك:تمام
عقدت حواجبها من وصل لمسامعها صوت انثى وسرعان ما انقطع من ضغط الميوت نجم يلتفت لنوير الي نطقت:نجم الاجتماع بيبدا تعال
هز راسه لها يفتح الميوت من مشت:شوي واكلمك مشغول الحين
سكر يترك فُلك الي داهمت الافكار راسها وسرعان ما هزت راسها بالنفي تتعوذ من الشيطان،رفعت راسها للباب من انطق:ادخل
دخلت سديم تحمل بيدها ملف وتقدمت تعطيها ياه:  في مندوب وصله لك
اخذته باستغراب تطلع سديم تاركتها فتحته تعقد حواجبها من ورقة عقد القران الموجوده ناظرت الاسماء تبرد اطرافها من شافت اسم نجم ورتيل، ارتجفت يدينها بعدم تصديق تاخذ الرساله الموجوده بجانبها فتحتها ماتتعرف مين مرسلها وتقرا الكلام: انا فاعل خير زوجك مو رايح سفره مهمه رايح شهر عسل مع زوجته الثانيه بدون ماتدرين انصحك تبعدين عنه واذا مو مصدقه نجم مايشتغل عاطل وش السفره المفاجئه ذي؟روحي عند آل بارود وبتتاكدي انه رتيل مو موجوده بعد
سكرت تضحك بجنون وعدم تصديق اخذت جوالها ترجف يدها ودقت على عِقد تجي:انا جايه اصلا انتظريني
سكرت منها توقف تستند على عكازها اخذت عبايتها تلبس وافكارها توديها وتجيبها وجزء كبير من تفكيرها يرفض التصديق وفي شي غلط،فتحت الباب عِقد تتقدم لها:اشبك
لفت لها فُلك تنهار حصونها وتبكي حضنتها تبكي بحرقه:تكفين قولي كذب مستحيل يسويها
عقدت حواجبها بقلق:فُلك اشبك حبيبتي وش سوا؟
بعدت عنها تمد لها صك الزواج وتلونت ملامح عِقد ترفع نظرها لها:مستحيل فُلك مستحيل يسويها
جلست على الكنب تبكي:كلهم مثل بعض نفس بسام هو مايختلف عنه مايحبني كذاب مايبيني ياعِقد يلعب علي
مسكت زندها توقفها:البسي نقابك وامشي بتاكد بنفسي
لبست نقابها تتبعها وركبت سيارتها عِقد تركب بجانبها فُلك،حركت لبيت آل بارود بسرعه تركن سيارتها ولفت لفُلك الي مستنده براسها على الباب وساهيه:لا اشوف دموعك لا تبيني كسرك لهم
نزلت عِقد تنزل بعدها فُلك الي تستند على عكازها، دخلو يلقون جمعه الجالسه بالصاله حولها الحريم وشموخ وتقدمت عِقد بدون مقدمات:وين رتيل؟
عقدت حواجبها احلام:شتبين من بنتي؟
عِقد بسخريه: حاكلها سألت وين رتيل؟
ناظرتها شموخ:مسافره
غمضت عيونها فُلك تنزل دمعتها من اتضح لها الامر وتمسكت بظهر عِقد لفت لها تمسكها وتطلع تحت استغرابهم ولقت امامها هاجس الداخل مشت فُلك تبكي لسيارة عِقد وتوقفت عِقد امام هاجس الي استغرب وجودها:نعم؟
رمت صك الزواج بصدره:الله لا يوفق ولد عمك الكلب ادا مايبي فُلك ليه ياخذها ليه يخليها تتعلق فيه جعله يموت هو ورتيل ومايرجعون وانت تتستر عليه اجل مسافر سفره مهمه وهو عاطل مايشتغل حتى حسافة حب فُلك مايستاهلها الرمه 
عقد حواجبه بعدم فهم:شتقولين انتِ؟شدخل رتيل بنجم
مشت عنه تتبع فُلك واخذ الورقه تلين ملامحه بصدمه دخل البيت:ياولد
تغطت شموخ يدخل هاجس قبل راس امه ينطق لاحلام:وين رتيل؟
عقدت حواجبها احلام من سؤالهم المتكرر عنها:مسافره عند عمها مالك وش فيكم عليها؟
مارد يوقف ودخل غرفته يطلع جواله ويدق على نجم مارد عليه يكرر ويرجع يدق لين رد:هلا هاجس
هاجس:انت وش مسوي؟
عقد حواجبه بعدم فهم:وش سويت؟
هاجس بحده:متزوج رتيل؟
رفع حواجبه بذهول:هاجس تستهبل انت؟وش متزوج رتيل انا وين وانت وين
هاجس:انت ماتدري وش صاير زوجتك كانت هنا مع صديقتها وهذا معي صك زواجك من رتيل كيف عمتي تقول مسافره لعمها؟
ارتخت ملامح نجم بذهول:فُلك كانت موجوده؟هاجس انت اكثر واحد تعرفني مانا متزوجها ولا دريت عن هواء دارها رتيل في شي يصير
هاجس:لازم ترجع وتحل كل شي يمكن توصل للطلاق
مارد نجم يسكر منه وطلع لمُلهم:متى نخلص؟
جلس مُلهم:تونا يانجم وين مستعجل
فصخ سترته الواقيه يجلس امامه:لازم استعجل بكره لازم ارجع الرياض
ابتسم مُلهم بسخريه:على اساس انت الحين مو بالرياض
نجم بجديه:بالنسبه لنا بالنسبه للباقين انا بلندن في مشكله صارت كلم العميد نستعجل بالمهمه او بطلع نص يوم وارجع
دخلت نوير الغرفه لابسه طرحتها وبدلتها الواقيه: حددنا موقعهم مايدرون بوجودك يانجم بالرياض كل شي صار تمام وروحتك للندن بكره نداهمهم العميد عطاني كل الاحداثيات شوي وتجي..
قاطعتها من دخلت وحده تمنع ظهور وجهها بقناعها ومايظهر منها الا عيناها وجلست بجانب نوير ترخي راسها على الجدار ناظرتها نوير ترفع حاجبها: شفيك
مسكت جبينها تدلكه:مصدعه
وقف نجم يطلع مع مُلهم من الغرفه وفصخت قناعها ينتثر شعرها الاسود على ظهرها ابتسمت نوير: حامل؟
لفت لها بذهول:بسم الله وين صداع بس
ضحكت نوير تفصخ طرحتها:تعبت يافيّ متى نمسكهم ونخلص
وقفت فيّ تفتح شنطتها وتطلع باندول اخذت قارورة مويه تسمي بالله وتشربها جلست بجانب نوير تطلع جوالها من وصلها اتصال ابتسمت ترد على ولدها: دحوميي
فتحت السبيكر يوصل صوت طفل لها ولنوير:ماما اشتقت لتس
صرخت اخته توليب بحماس طفولي تحاول اخذ الهاتف منه:ماما
ضحكت فيّ تناظر نوير المنسجمه معهم:وانا اشتقت لكم ياعيون امكم ان شاء الله الاسبوع ذا برجع لكم
عبد الرحمن بزعل:قلتي اسبوع بس وخلص هالاسبوع متى ترجعين
فيّ:وعد ياعيون امك ان شاء الله اجي هالاسبوع
توليب:بابا
اخذ الهاتف:فيّ
ناظرتها نوير تغمز وسكرت السبيكر تأشر لها تطلع:  عيونها
طلعت نوير تترك فيّ الي تكلم زوجها:كيف المهمه؟
تنهدت تنسدح على سريرها:والله تعبت يافيصل العميد ارسل لنا اليوم موقعهم الاساسي ادعي نمسكهم بكره ونخلص
جلس على الكنبه فيصل يجلس توليب بحضنه ويبوس خدها:انتبهي لنفستس لو تبين اكلم عبد الرحيم واجي اخذتس
ابتسمت تهز راسها بالنفي مدعيه انه يشوفها:بكمل الي بديت فيه
ضحكت تتذكر الماضي وتكمل: لا تجي عشان ما
اتصاوب بدالك
ابتسم ينطق:اقطع ايده الي يجرب يأذي حرّم فيصل
فيّ:انتبه لنفسك وتوليب وعبد الرحمن بسكر باي
سكرت منه توقف واخذت قناعها تلبسه وتطلع لنوير الي تتهاوش مع مُلهم بالمطبخ:انا بسوي اطلع برا
مُلهم:انا الي بسوي قلت انتِ اطلعي
تقدمت فيّ منهم:لا انت ولا هي انا بسوي
ناظرتهم نوير:والله مايطبخ غيري انا حلفت كذا كيفي ابي اطبخ
هز راسه بأسى مُلهم يطلع وابتسمت نوير بانتصار تبدا تطلع مكونات الكبسه تقدمت منها فيّ تهمس: تحبيه؟
لفت لها بذهول:انا؟مستحيل
رفعت حاجبها فيّ بشك:يعني ماتبيه يتعذب ويطبخ وانتِ رفله ومسويه السنعه وماتحبيه
صدت نوير تقطع البصل:شدعوه انا ابي اطبخ لاني ابيه شدخلني فيه تعب ولا ماتعب
ابتسمت فيّ ماترد عليها وقعدت على الكرسي تناظرها