انا الفلك والناس حولي مدارات تشوف عز نفوسها من خلالي

part11

أولا أنا هنت لك نفسى وقدرتك
فكرت أنك تراعيني مثل ما أرعاك
-
لكن اشوفك طغيت وغرتك نفسك
طاوعت منهو بتزييف الكلام أغراك

ناظرت نفسها بالمرآة تبتسم بتوتر وتحط اخر لمساتها من عطرها وقفت تدور حول نفسها بفستانها ابيض مايل على موف طويل باكمام نازله واكتاف متعاكسه،  تحس بسعاده مفرطه اليوم بتتحقق اعظم احلامها وبيخطبها بسام،لفت للباب من انفتح تدخل شموخ الي ابتسمت تتقدم لها: ما شاء الله وش هالكشخه
ابتسمت غلا بخجل تتنهد بحب: جاي يخطبني
لانت ملامحها بذهول: بسام؟
هزت راسها بالايجاب بفرحه: شفتي انه يحبني صدق؟ مو نصاب مثل ماقلتي ياشموخ والله يحبني
تنهدت شموخ بعدم ارتياح: لا توافقين على طول استخيري ياغلا
غلا: شموخ بليز لا تخربين علي فرحتي لو لعاب ماكان جاء خطبني تخيلي ارفض؟مستحيل
سكتت تناظر فرحتها وهزت راسها بالايجاب: امشي تحت وصلو
طلعت معها تعدل شعرها بتوتر،نزلو يستقبلون ام بسام واخته وتقدم غلا تسلم عليهم ببتسامه خفيفه ملاحظه نظرات ساميه ام بسام الي عليها،سلمت على سُعاد اخته يدخلون للمجلس يجلسون،وقفت تاخذ الدلّه وتصب لهم وتقدم لساميه تبتسم: سمي
اخذته منها تنطق بهدوء: سم الله عدوك
صبت للكل تصب لنفسها وتجلس بجانب شموخ تنتظر الي بيحدث على احر من الجمر،،،،جلس بسام بجانب عُدي بعد ماسلمو على بعض يوقف هاجس ويقهويهم يسمع سوالفهم الي تتمحور حول شغلهم، جلس بجانب نجم يناظر قصي الي بدا يتكلم موجه كلامه لعمران: انت تعرف ياعمران بيننا عيش وملح ونعرف بعض من سنوات وانا والله اليوم جاي وطالب اناسب فواز لولدي بسام وترله مثل ولدكم اسألو عليه ان بغيتو
عم الصمت لثواني تنتقل نضراتهم على بسام ينطق عمران: والله والنعم فيكم ياقصي وبسام ولدنا ومنا وفينا وفواز مو لاقي مثله لكن الرأي رأي البنت والله يكتب الي فيه الخير
ابتسم قصي يناظر بسام: اذا ماعليك امر يبي الشوفه
وقف فواز يهز راسه بالايجاب بهدوء: حقه تعال يابسام
وقف يعدل ثوبه وطلع معه يجلس بالمجلس يطلع فواز لجوا: ياغلا
ارتجفت خلايا جسمها تشد على يد شموخ ووقفت تطلع مع عواطف من ناداها: سم يبه
ناظر عواطف فواز يبتسم: بسام اليوم جاي يخطب غلا تعالي على الشوفه
ابتسمت عواطف: والنعم فيهم روحي يابنتي
بلعت ريقها برجفه تتبع فواز،دخلت معه ونظراتها بالارض من توترها تهمس: السلام عليكم
رفع نظره بسام يناظر شكلها يتفحص جسمها من اطراف اصابعها لشعرها يرد: وعليكم السلام
تقدمت مع فواز توقف ورفعت نظرها له تنزلها تخفي ابتسامتها من سعادتها وهي تشوف امنيتها تتحقق آه ياكبر فرحتها وهي بتتزوج الي تحبه،طلعت مع فواز من المجلس يناظرها: عندك يومين يابنتي استخيري وبعدها يصير خير
هزت راسها بالايجاب بدون رد ترجع لغرفتها،دخلت تنزل نظرها لكفوفها الي ترجف تضحك بعدم تصديق: اخخخ خطبني يا الله
انفتح الباب تدخل شموخ وحضنتها غلا بفرحه: شموخ ببكي خطبني والله يبيني
بادلتها الحضن شموخ الي تشعر بعدم راحه تجاه بسام وحست بدموع غلا تبعد وجهها: خلاص يابنت خطبك شفيك تبكين
ضحكت تمسح دمعتها وتأشر على يسار صدرها: ماتحسين بلي احس فيه احس قلبي بيطلع من مكانه
ياشموخ احبه اعشقه
سكتت شموخ تاخذ نفس تمتنع عن الكلام عشان ماتخرب فرحة غلا