LOYAL HEARTS #3: WHILE ON THE OTHER SIDE

THIRTY NINE

"We can't go with you nga kasi pupunta kaming Dalaguete..."

Lumalabi si Tori nang tinignan ako. Kapwa kami nakalatag sa kama at sumadsad sa sahig ang mga paa. Kanina ko pa siya kinukumbinse na samahan ako sa Music Festival. Timing ang pagpunta niya rito sa bahay dala ang ilang mamahalin niyang mga damit.

"Sige na, Astoria Mae..." Bumaba ako at lumuhod sa gilid ng kama. Pinagsiklop ang aking mga kamay, nagmamakaawa. "Ako magbabayad sa ticket niyo," agap ko bilang pang-udyok.

Bahagya siyang umangat at tinukod ang siko sa kama. Namamangha ang mukha niya.

"Ang yaman, a? But no. Naka-sched na kami ng araw na iyan with Nolan's family."

Hindi ko pinigilan ang gumuhit na kabiguan sa mukha ko, kung sakali mang makita niya ito at pagbigyan ang gusto ko. At anong meron ngayong Sabado't puro pamilya ang mga kasama nila? Si Jaxon din ay hindi ako masamahan dahil may salo-salo sa death anniversay ng kanyang lolo.

"How about Charlie and Angelov?" suhestiyon ni Tori.

Umiling ako bilang kabuuran sa aking tugon. Hindi mahilig sa mga ganoong bagay si Charlie, he prefers a small set of company. Si Angelov naman ay sigurado akong may sariling pagkakaabalahan.

Ayaw ko naman kasing pumunta roon mag-isa. Mas marami, mas masaya! But the thought of going alone drowned the excitement I thought would last long. Kung mapipilit ko lang talaga si Jaxon.

I don't want to deprive him from being with his family. Kahit hindi ko naranasan ang pamilya sa buhay ko, alam ko kung gaano ito ka-importante. A close-family tie is one of the things I want to undergo and I don't want Jaxon to miss those kinds of moments.

Wala sa sarili kong kinuha ang pumaibabaw na lace top sa dagat ng mga damit sa kama. "Bakit ka nga nagdala ng mga damit mo rito?"

Hinila ni Tori ang sarili patayo at isang beses sinuklay ang kulot niyang buhok. Antok niyang tinignan ang damit na hawak ko. Ano na naman kaya ang ginawa nito kagabi at mukhang puyat?

"I'm giving them to you. Hindi na kasi kasya, tignan mo naman ako," lumalabi niyang pinisil ang bilbil sa tiyan, "pinapataba ako ni Nolan."

" Eh 'di mag-exercise kayo." May tinago akong ibang kahulugan sa likod ng aking panunukso.

Tumawa siya. "Mas marami ang pinapakain niya sa akin kesa sa nababawas kong calories."

Hinubad ko ang aking shirt sabay tayo. Sinuot ko ang lace top sa harap ng salamin. Itim ito at kung titignang mabuti, isa na itong bustier dahil humahapit siya sa aking baywang at heartshaped ang neckline.

Kung pagbabasehan sa sukat ng top sa armpit, talaga ngang hindi ito magkakasya kay Tori. I saw her wear this one time noong freshmen year.

"Iyan bagay sa 'yo. Naku! Kung maibabalik ko lang talaga ang alindog ko..." Bumuntong hininga siya, inaalala ang kanyang kapayatan.

Tinignan ko siya sa salamin habang inaadjust ang strap ng top sa balikat.

"Sexy ka pa rin naman, Toreng." Ayon pa kay Denver, voluptuous.

Para sa akin asset niya ang kanyang balakang na pinapaliit tignan ang kanyang baywang. The kind of beauty and curvy body in the 50's. Tori has a vintage kind of beauty. Iyong tipong ihahanay sa ganda nila Marilyn Monroe o kung sino pang mga sex symbols noong dekada singkwenta.

"But not as slender as you anymore. Kung ikaw twenty five ang waistline, ako twenty eight! Pang-plus size na ako kumpara sa Victoria Secret model na alindog mo!"

"Plus size?" Tumawa ako. "OA na iyan Tori, ha?"

Dinala niya ang simangot sa aking tabi. Aliw ko siyang pinagmamasdan na inangat ang kanyang blouse upang ipakita ang baywang niya. Kahit hindi siya magsalita, nakaukit sa mukha niya ang pagre-reklamo.