معاك أنا أقوى

١٣ - اجتياز ؛

مساء الخير ..
عيد مبارك يا حلوين ينعاد عليكم جميعاً بالخير 🌷
تم اعادة نشر الاجزاء المقفله ٩، ١٠ ، ١١
اترككم مع بارت جديد نبدأ فيه الفصل الثاني للراويه
استمتعوا ...

.
.
.

مرت الأيام وانتهى الفصل الدراسي وسامي بحكم شغله المعتاد ما قدر يوفي بوعده ويرجع للسعوديه ، كانت الاشغال متراكمه عليه وانغمس بالشغل كثير وقل تواصله مع عياله ورائد ...

اول ايام عيد الفطر
كانوا جالسين بالصاله يتقهون
شهد : ماما شرايك بلبسي كذا حلو والا اطلع البلوزه لبرا ؟
ام رائد : لا كذا مرتب وش زينك
شهد : وانا طالعه لمين ؟
ام رائد : ههههه اكيد طالعه علي اجل مين ؟
دخل رائد ومبارك وهم لابسين ثياب العيد وجايين من المسجد
رائد : السلام عليكم كل عام وانتوا بخير
مشى وباس راس ويد أمه وجلس جنبها
مبارك : ما عرفتك يالإبن البار
رائد : هههههه طول عمري بار

مبارك بابتسامه عريضه : لا تحاول مهما سويت انا رقم واحد في قلب أمي ، مو كذا يالوالده ؟
ام رائد وهي تخزه : لا مو كذا! استح على وجهك حتى سلام العيد ما سلمت علي
مبارك وهو ينسف غترته فوق راسه بعشوائيه : اوووه اووه زعلتي ام رؤود؟ تعالي اعطيك اكبر بوسه
جلس جنبها وقام يبوسها براسها وخدها بقوه
ام رائد وهي تضحك : ابعد شفطت خدي هههه
شهد : حدثوني عن الدفاشه احدثكم عن بروك .. وخر عن امي ذبحتها!
رائد : هههه خليها اصلاً هي مبسوطه شوفي ابتسامتها
مبارك وهو ضام امه ويطالع فيهم : قلت لكم انا نمبر ون!
ام رائد حطت يدها عليه وربتت عليها : الله لا يحرمني منكم ولا يبين غلا كل واحد فيكم
رائد : اميييين

ام رائد وهي تكمل وتطالع رائد : قول امين واشوفك معرس انت واخوك بليلة وحده
مبارك تنحنح : هههههههه ما تفوتها الوالده بس امين من بؤك لباب السماء اهم شي ما اكون قبل رائد
رائد مو من قلبه بس قال لأمه : امين ..
شهد بصوت حاد : مام ليه بس تدعين لهم وانا لا ؟
مبارك : شوف الحيوانه تبي العرس
شهد تخصرت : طبعاً ابغى اتزوج ليه ناقصني شي ؟
رائد : بالعكس انتي الحلا كله الله يحفظك ويرزقك بالشخص الي يحبك ويسعدك
ام رائد : امين يا رب
مبارك رفع كمومه : اوووكي ندخل في المهم ، وين عيديتي ؟!
طالعوا ثلاثتهم ببعض وانفجروا يضحكون على مبارك الي مهما صار مستحيل يتغير ويترك حركات الطراره .. اخذتهم السوالف ومر الوقت بسرعه ....

رائد : يالله انا بروح ارتاح بغرفتي شوي عشان نطلع نتمشى بعد شوي
شهد الي كانت جالسه جنبه : ترتاح والا تكلم الحب ؟
نغزها رائد بكوعه وضحكت بصوت عالي : هههههه اااي ليه تنغز؟
ام رائد وهي مبتسمه : ايش فيك على اختك ؟
رائد حمر وجهه : هاه ولا شي ما انتبهت لها
مبارك : سوقوها على غيري .. يالوالده انا اقول لك هذي اكيد ماسكه عليه شي وتهدده
رائد انخبص ووقف بسرعه : وش بتمسك علي يعني؟ عن الخرابيط يالله سلام
مشى لغرفته بسرعه وهو يسمع مبارك يضحك وينكت عليه
دخل الغرفه وقفل الباب وتسند عليه واخذ نفس طويل وابتسم : هين يا شهد مردوده
طلع جواله واتصل على سامي ورن مرتين وبعدين جاه المسج الصوتي : الهاتف الخاص بسامي الـ... الرجاء ترك الرساله بعد سماع الاشاره
تأفف وجلس عالسرير واتصل على منير الي رد عليه على طول : السلام عليكم
منير : عليكم السلام استاذ رائد
رائد : عم منير كل عام وانت بخير ، كيف الأولاد اليوم ؟
منير : وانت بخير يا ولدي .. الاولاد تمام وهذاني قريب من البيت ومعي الأمانات
ابتسم رائد : ان شاءالله تعجبهم
منير : اكيد بتعجبهم يكفي انها منك
رائد بتوتر : طيب اممم ... عم منير كلمكم سامي ؟ يعني اااء اقصد العيال كلموه ؟
منير : والله له اسبوعين ما اتصل ولا يرد .. اكيد مشغول
رائد وهو يلعب بطرف تيشيرته : امممم اوكي ..
منير : بس اكيد بيتصل اليوم عمره ما يخليهم بهالمناسبه
تنهد رائد : طيب اذا اتصل علمني ..
منير : ابشر .. يالله انا وصلت البيت
رائد : اوكي اكلمك وقت ثاني ..
سكر الخط وقبضه قلبه وبتفكير : يا ربي ايش فيه له اكثر من اسبوعين ما يرد حتى عياله ما اتصل عليهم عالأقل بس يطمنا عليه .. يا رب ما يكون فيه شي