معاك أنا أقوى

٢٥ - رذاذْ ؛

مساء الخير
سنه جديده سعيده عالجميع ~~
بسرعه مر الوقت .. بديت معكم بهذا الشهر وهذا احنا فيه مره ثانيه
وبكذا اكون كملت معاكم سنه
بهالمناسبه احب اقول لكم شكراً على تفاعلكم ودعمكم المستمر .. شكراً للطفكم وذوقكم .. شكراً فقط لكونكم متابعيني 3>
اتمنى لكم مع بدايه السنه اوقات سعيده وأمنيات محققه والي ما قدر يحقق شيء في العام الماضي يحققه هالعام
أعزوفة ..

•••••

قبل ما اتركم مع البارت احب انبهكم ان الاسبوع القادم راح يمر بدون تحديث لأني راح اداوم ١٤ يوم ورا بعض بدون اوف ومره صعب اني اكتب بارت كامل .. لذلك وجب علي التنبيه قبل ما انقطع ..
لا تنسون الكومنتات والفوت
استمتعوا🌷

.
.
.

بعد ما وعى سامي من صدمته وقف بسرعه ولبس ثوبه واتصل بجواله الخاص : الو معك سامي مقبل الـ
الخط الثاني : سم طال عمرك
سامي : برسل لك رساله من رقم ثاني ابيك تحدد لي اسم المرسل كامل وعنوانه باسرع فرصه
الخط الثاني : ابشر طال عمرك ساعه بالكثير وتكون عندك
سامي : لحظه .. وبرسل لك رقم باسم رائد فهد ابيك تسوي لي تقرير كامل بكل الرسايل والمكالمات الي استلمها خلال الثلاث شهور الاخيره
الخط الثاني : اوكي هذي سهله عشر دقايق وارسلها لك
سامي : انتظرك

فتح باب غرفته وطلع بسرعه جهة غرفة فراس وكان تيم عنده
سامي : تيم اطلع ابي اخوك شوي
تيم بعدم مبالاة : مابي اطلع تونا بادين اللعبه
سامي ماكان في حال يسمح له ياخذ ويعطي اكثر فطنش تيم وسكر الباب ومشى جلس عالسرير : اجل ابلع لسانك ولا تقاطعنا ، فراس تعال هنا
ارتبك فراس من شكل ابوه الي واضح انه معصب وماسك نفسه ومشى جلس جنبه
سامي : سند هذا الي عطاك الشريحه وين بيتهم ؟
بلع فراس ريقه : ع عند منيف نفس البيت .. قلت لك من قبل هو اخوه و..

سامي : طيب بدل ملابسك وتعال معي ابي اروح اكلمه الحين
توهق فراس مو عارف يقول له انه بالسجن :
ه هو مو موجود الحين
سامي : ايش دراك انت ؟
فراس وهو يدعي ان كذبته ما تنكشف : امم لأن منيف قال لي انه مسافر ..
وقف سامي بانفعال : مسافر ؟ وين يسافر الكلب ؟!

قرب تيم وهو يتحلطم : عيب الشتم بعلم استاذي عليك لما يرجع
حس فراس ان فيه شيء سيء صار وقرب من ابوه : بابا ايش فيك صاير شيء ؟ لقيت حاجه بالفلاش ؟
هز سامي راسه بس ما رد
فراس : له علاقة بسفر استاذي صح ؟!! سند له علاقه ؟
تيم وهو رافع راسه ويتلفت بين الاثنين نظراً لفارق الطول : ايش فيه استاذي؟!
ما رد سامي لما سمع صوت الرسايل الي استمرت توصل ورى بعض على جواله وكان فيها التقرير عن رقم رائد واكتفى انه يقراها بتركيز لين وقف عند رساله معينه ورفع عينه لفراس وهو مطير عيونه : هات جوالك بسرعه!