معاك أنا أقوى

خيبة أمل (oneshot) ..

سلام ، كيفكم

هذا الون شوت الي طلبتوه لجمعان وجابر ويعتبر البارت الأخير لقصتهم ، نكست بنبدأ بالكبل المحبوب والأكثر شعبيه
(سند وفيصل)

شغله ثانيه ، راح ارجع احط شروط بالروايات الثانيه اما هنا ما راح احط لأنكم عودتوني يكون تفاعلكم دائماً حلو واتمنى يستمر مثل ما عودتوني ♥️ ..

لا تنسوت الكومنت والفوت
استمتعوا ...

•••

بعد عشر سنين - بيت اهل جابر

كانو جالسين بالصاله بعد ما صلوا صلاة الجمعه وقاعدين يتقهوون في بيت ابوهم
حسان : وش لك بالتدريس بالمدارس ، انا اقول خلك مثلي وسو لك مجلس ذكر ودرس فيه مع المشايخ وطلاب العلم
جابر برسميه : لا ما احب الحكره ابي اروح وأجي وبعدين وش فايدة شهادتي لو قعدت في البيت ؟

حسان : ايه قول ان هدفك مادي من الأول
جابر : مو عيب ولا حرام هذا شغل ..
هز سعد راسه برضى : عين الصواب ما فعلت .. التدريس عمل فاضل
حسان بسخريه : اي تدريس يا سعد الله يرضى عليك ؟
جابر : اعتقد هذا قرار راجع لي سواء عجبك او لا

التفت سعد على جابر : دعك منه .. قول لي وين استقريت ؟
ارتشف جابر من قهوته : والله حست بكذا مكان وما جاز لي شيء ، بالأخير رسيت على حي القصور قريب من صلاح
همهم سعد : زين بس بعيد كثير عن هنا .. بلحالك والا معك احد عاد ؟
جابر : لا والله ما اعرف احد امون عليه .. سكنت بلحالي
سعد : وجنبك مسجد قريب ؟

جابر : ايه ماشاءالله فيه مساجد كثيره بكل شارع حتى فيه جامع كبير وراي
سعد بابتسامه : ماشاءالله ، وش اسمه هالجامع ؟
حس جابر نفسه بقعدة استجواب ونطق بتنهيده : ابن القاسم
سعد : اييه كني سمعت فيه ، الظاهر ان الإمام حقه من جماعة حلقة الذكر الي نجتمع فيها كل اثنين

حسان بملل : تبي الصدق انا من رأيي ماله داعي كل ذا ، ليش تسكن بلحالك وتترك اخواتي بلحالهم بالبيت ، وفوق هذا تدرس اطفال وانت بإمكانك تستفيد من علمك بشكل ثاني
جابر تنرفز من تدخل حسان المستمر ورد : اخواتي كبار ويشلون انفسهم وبعدين وش فيها لو درست بمدرسة اطفال ؟ ترى ماهو عيب ولا غلط .. وبعدين ترى شهادتي ما جت من قليل عشان ابروزها واحطها عالجدار

قلب حسان عينه بسخريه : ذبحتنا شهادتي وشهادتي الي يشوفك ما يقول انك رايح مغصوب عشان تاخذها
سعد بتحذير : حسان يكفي ..
جابر قبض على يده وطالع بسعد : شفت بعينك انه هو الي يفتح المواضيع بكل فرصه تحصل له ؟
حسان : افتح ؟ ليه هو تسكر اصلاً عشان ارجع افتحه لا يكون مصدق نفسك انك تنفع تكون مربي أجيال ؟