معاك أنا أقوى

٢١ - ضياع ؛

مساء الخير ..
كيفكم يا رب تكونون بخير
بارت جديد نستكمل فيه الأحداث الي وقفنا عندها ..
طولته لكم لأني من زمان ما حدثت .

لا تنسون الكومنت + فوت
استمتعوا 🌷

.
.
.

عند باب بيت جمعان

طفى فيصل محرك سيارته الجيب والتفت على منيف وبصوت منغبن : يالله انزل
منيف كان يطالع قدام وتعابير وجهه متضايقه : خالي فيصل ... انا اسف
فيصل : لا تعتذر الأمر مو بيدك
منيف : ادري ثقلت عليك و ... ومنت مجبور تكمل مع ابوي لأن هالش..
فيصل : نعم ؟ وش الي مجبور ؟ اسمعني يا منيف لا عاد اسمع منك هالكلمه انت منت ثقيل على احد ولو الأمر بيدي اسكنك معي في بيتي غصب عن الي ما يرضى
تجمعت الدموع بعين منيف وقوس فمه : ب بس..
دفه فيصل بخفه : لا تبسبس لي ولا تتوقع اني بتركك عند ابوك الي ما يدري وين ارضه ووين سماه ، تحمل هالفتره بس لين ازين اوراقك وان شاءالله راح اخذك منه رضى والا انرض
هز منيف راسه وابتسم : شكراً
فيصل وهو يفتح بابه : يالله انزل ، بجي معك ابي اكلم سند بشغله

نزل منيف نزل شنطة ملابسه ومشى طق الباب ووراه فيصل
فتح لهم سند الي كان لابس سروال وفانيله وشعره منكوش
منيف : بسم الله شفيك كذا ؟ نايم ؟
سند وهو يتمغط ويطقطق عضامه : ايه شجيبك انت ؟
قلب منيف عيونه : على اساس ابغى ارجع وخر بس
تنحنح فيصل : السلام عليكم ، كيفك سند ؟
طالع فيه سند ورفع حاجبه : وخروا عن الرجل الأنيق لا يكون بتسكن معنا انت الثاني ؟ ترا ما عندنا غرف فاضيه بس لو لزمت فيه غرفه بالسطح اذا تبيها بشرط تدفع الإيجار مقدم
فيصل : ...
دف منيف سند وفتح الباب على عرضه : ادخل خالي لا تاخذ بكلامه الأخ قاعد يستظرف ..
مسك فيصل ضحكته ودخل مشى ووراه سند الي سحب منيف مع يده وهمس : منيوفه اشوف كبر راسك !
منيف وهو يهمس : ما كبر راسي بس لنا ساعه واقفين عند الباب وانت حتى كلمة تفضل لخالي ما قلتها!
سند بصوت مسموع : وليه اقول له تفضل بالله عليك هذي حزة زياره ؟

انحرج منيف ودف سند مره ثانيه ومشى جنب خاله ودخله المجلس وفتح الأنوار
لحقهم سند وجلس وهو يأشر عالكنب : حي اللي من جانا تفضل
جلس فيصل وهو محافظ على ابتسامته وجاء منيف بيجلس جنبه بس فيصل اشر له : منيف روح جيب لي مويه ..
هز منيف راسه ببطء وطلع وتركهم بلحالهم
فيصل : كيفك يا سند ان شاءالله طيب ؟
سند حط رجل على رجل : الحمدلله .. الي بعده
انحرج فيصل بس عداها له : انا اعتذر ادري انها مو حزة زيارة ، بس انا تعمدت اجيب منيف هالوقت لأني ابي اكلمك على انفراد بدون ما يكون ابوك موجود
سند : كلامك مع ابوي انا مالي اي علاقه ..
فيصل : لا كلامي مع ابوك خلص ، الشيء الي ابي اقوله راح اوجهه لك .. يمكن مالي حق املي كلامي عليك لكن حاب اطلع من هنا وانا متطمن على ولد اختي
سند : وايش هالشيء المهم ؟
فيصل بثقه : انا صامل في القضيه وضامنها وباذن الله راح اخذ منيف عندي ، لكن فيه مشكله معطلتني وهي ان القاضي طلع اجازه وهالشيء راح يأخر الإستئناف لذلك ابي اوصيك على منيف خلال هالفتره ، راح اتكفل بمصاريفه ، مابي شي نقصه وما ابيه يحس بأي نوع من الأذى هنا لا جسدياً ولا نفسياً ول..
عقد سند حواجبه وقاطعه : هيه انت وش جسدياً ونفسياً؟!! وش شايفنا انت ؟!
فيصل : لا تقاطعني انا ما جبت الكلام من جيبي .. تنكر حقيقة ان ابوك يعنفه ؟