معاك أنا أقوى

١ - خيبة أمل

مرحباً ..
كيفكم ؟

مثل ما وعدتكم راح ابدأ انزل بارتات اكسترا للراويه وراح تكون مخصصه لكوبلات معينه بمعدل ما يتعدى الثلاث بارتات لكل كوبل

قبل كل شيء اتمنى انكم تتطلعون على روايتي الجديده ..
وتين
نزلتها قبل اسبوع ، ضيفوها لمكتبتكم وشاركوني اراءكم .

الاكسترا ذي راح تكون على جزئين بعنوان
خيبة أمل
والبارت اهداء للثلاث الي توقعوا الكوبل صح : )

@280128
@kook__21
@Ayooosh_21

؛

قيل يوماً ما إنه لا توجد بدايات حقيقيه ، بل مجرد نهايات مستمره ..

قبل ٢١ سنه من بداية روايتنا وفي أحد الحدائق العامة ، كانوا جالسين بجنب بعض ..

جابر : شوف هالثنتين ؟
جمعان : اي ثنتين ؟
جابر : لا تتلفت بسرعه ، الي جالسين بالكراسي وراك
رفع جمعان عينه وسوى مسح شامل ورجع نزلها وطالع بجابر : واضح انهم صواريخ من عيونهم

جابر : صدق ؟
جمعان باستغراب لأن جابر اول مره يطالع احد بهالنظره : ايه شعندك ؟
نطق جابر ببطء وهو يطالع بجمعان : الي عاليسار هذي فايزه
جمعان ترك الي بيده وبعد عدة ثواني فتح فمه بضحكه : اووووه اجل هذي خطيبة الغفله ؟

جابر توتر ونطق بابتسامه منحرجه : ايه شرايك ؟
جمعان بضحكه : والله منت هين يا مطوع الغفله هذا الي ما يطالع ويغض البصر ؟
جابر : ترى مو انا الي اخترت أمي
جمعان : ايه عاد أمك جنيه ما يحتاج تعرف تصيد البنات صيد
ابتسم جابر لأنه متعود على مزح جمعان : طيب ما ودك تصيد لك أحد معي ؟ تكفى خل نتزوج بنفس اليوم

جمعان : تؤ يكفي حوريه مصرقعه راسي تصرقع هي واهلها
جابر بفضول : ليه ما خلصوا هذول ؟
جمعان وهو يسفط اكمام ثوبه : ولا بيخلصون اخوانها السلق ذلوا أمي بطلباتهم وكل يوم والثاني عطها وسو لها ومدري ايش ، قسم بالله اني تفلت العافيه منهم !
جابر : طيب ما صار شيء على تغيير شغلك؟
جمعان : مصدق انت ؟ وين اغير الحين العالم يبون شهايد ثانوي ولا جامعات مثل حضرتك ما يبون الي مثلي

جابر بانفعال : طيب ذولي يعرفون ان وضعك كذا ليه وافقوا يزوجونك اختهم من البدايه ؟!
جمعان : خبوول شافوني اغازلها عند الدكان ويحسبون بيننا شيء وغصبوني عليها وانا بصراحه جتني من الله والا ما كنت مفكر بالزواج من الاساس
جابر : من جدك يعني للحين ما حبيتها ؟
جمعان : لا .. بس شبه مرتاح لها يعني تمشي الحال