رزقت الحلال

رزقت الحلال {الحلقة 37}

ضمتها حياه بقوة وشوق، لم تصدق أذنيها عندما حادثتها حنان تخبر بالضيفة التي بإنتظارها في منزلها، حاولت الإتصال بحمزه لكنه لم يجب ثم أغلق هاتفه نهائياً، وجدت بقية من في المنزل يغطون في سبات عميق فاكتفت بكتابة ورقة وضعتها على الطاولة بجوار باب الشقة تخبرهم فيها أنها ذهبت لحنان ولن تتأخر.

ضحكت حنان: أنا هأروح أعملكوا كوبيتين عصير عقبال ما تخلصوا اللقاء العاطفي دا

تركتهم حنان وانسحبت بينما جلستا متجاورتين، أمسكت حياه بيدها وهي تسألها: عرفتي تهربي إزاي ؟؟

تنهدت فتون: البوليس هجم على الفندق اللي كنا فيه أخر مرة .. مش عارفه مين اللي بلغ أو عرفوا إزاي لأنه دي كانت أول مرة نروح هناك وأكيد المكان مش مشبوه .. قدرت أهرب وفضلت أجري لحد ما حسيت إني بقيت ف أمان .. ولحسن حظي كنت بأخلي الورقة اللي ادتيهالي معايا على طول .. عقبال بقى ما قدرت أوصل لهنا مشي كانت عدت ساعات كتير

-طيب و.. شادي؟ قبضوا عليه؟؟

هزت كتفيها: مش عارفه، أنا كنت مشغولة إني أهرب لكن ما أعرفش هو وكريمة والكام بنت التانيين  اتمسكوا ولا لا

تعجبت: كريمة مين ؟؟

ضحكت ببؤس: دي البضاعة الجديدة، بعد ما هربتي إنتي ونيفين .. شادي قدر يعلقها زينا

تنهدت بحسرة، حضرت حنان ضاحكة: ومعاك إتنين عصير وصلحه

شاركتها الفتاتين الضحك، جلسن سوياً يتسامرن قليلاً قبل أن تسأل حياه: وناوية تعملي إيه دلوقتي ؟

نظرت فتون بعيداً: مش عارفة ..

طمأنتها حنان: إنتي خليكي هنا معايا لحد ما تعرفي عايزه تعملي إيه ف حياتك

هزت فتون رأسها بقوة: لا لا، أنا بس جيت عشان أطمن على حياه وأشوفها وبعد كدا أمشي

أمرتها حنان بنبرة لا تقبل المناقشة: خلاص أنا قررت وإنتي مالكيش خروج من هنا

تنهدت فتون: بس ..

ربتت حنان على كتفها: خلاص بقى إنتي هتنوريني هنا يا فوفو

أضافت: إنتي صحيح دراستك إيه؟

أجابتها بخجل: كنت معهد تمريض ..

حنان: ومالك بتقوليها وإنتي مكسوفه كدا ؟ .. دا إنتي حتى ملاك رحمة

غمزتها حياه: أيوه بقى ملاك بس قمر

ضحكت فتون، دامت جلستهم سوياً لمدة ليست بالقصيرة حتى تثاءبت فتون ناعـسة فما مرت به ليس بالهين، رافقتها حنان إلى الغرفة وعادت لتجد حياه تجمع أغراضها لتذهب.

اعتذرت لها حياه: معلش يا حنان أدتها عنوانك .. لأني ماكنتش عارفه هأقعد فين ولا بيتي ف أنهي حته .. كنت حاسه إن هيجيلها الوقت وتهرب لأنه المكان دا مش مناسب ليها