🍂 توتي 🍂
بمناسبة العرسان سافرو شهر العسل .. وفي البيت قاعدين هالة وامها وابوها بفطرو سوى ..
الصادق : سمعتي بالحادث الحصل امس دا ؟!
ابتهال : حادث شنو ؟!
الصادق : امس بليل حصل حادث حركة .. والله ٣ شباب زي الورد .. دخل فيهم بص كبير .. الحمدلله ماف زول في البص اتضرر .. بس الشباب نقلوهم المستشفى و البسوق حالتو كانت صعبة شديد قالو ..
ابتهال : لا حول ولا قوة الا بالله
هالة قامت مخلوعة ومشت بسرعة على غرفتها .. دايرة تضرب لي وائل .. قالت : اخخ نسيت انو انا م شلت رقموو يااا رب بس دي شنو المصيبة دي يا رب ما يكونو هم ياا رب😭😭😭😭💔
وبقت قاعدة على أعصابها ومنتظرة بس تعرف هل ديل هم فعلاً ولا لا ..
🔹🔸🔹🔸🔹🔸🔹🔸🔹🔸🔹
🍂 الخرطوم _ بعد ساعتين 🍂
انقسمو ناس منيرة لي ٣ عربات .. ومشو المستشفى .. وصلو ونزلو بسرعة وزياد سأل بتاعت الرسبشن وكلمتو انو طلعوهم الطابق ال ٣ .. اما وائل في العناية المكثفة في الطابق ال ٢
طلعو اول شيء الطابق الثاني عشان يشوفو وائل بس منعوهم .. منيرة فضلت قاعدة ومعاها ايناس وعمر وعلي والطاهر ونعمة .. وباقي الشباب طلعو يطمنو على عامر وكمال وسمحو ليهم يدخلو عادي .. كان اي واحد مرقدنو في غرفة ..
اروى دخلت لي عامر .. وهو كان مفتح عيونو .. عاين ليها وما كان قادر يتكلم كويس .. مشت عليهو وجرت كرسي قعدت جمب سريرو .. دموعها نزلت ومسكت ايدو وضمتها بيدينها الاثنين قبل ما تقول : عامر انت كويس !
هز راسو وشد بإيدو على إيدها ..
شوية كدا جو داخلين المستشفى اهل عامر بعد ما عرفو الحصل .. وطلعو فوق الطابق التاني كفرو لي اهل وائل وبعدها طلعو طوالي لي عامر .. دخلو الغرفة لقو اروى قاعدة جمبو .. قامت طواالي لمن شافتهم وعفاف مشت قعدت جمب ولدها وبقت تبكي وتقول : وااي يحليلك ي ولدي لا حول ولا قوة الا بالله😭
وزادت في البكا
اروى ختت إيدها على كتفها وقالت ليها : قولي الحمدلله ي خالتو انو طلع منها بالسلامة وماف خطر عليهو حالياً
عفاف : الحمدلله ي بتي .. الحمدلله
🔹🔸🔹🔸🔹🔸🔹🔸🔹🔸🔹
🍂 في الطابق الثاني 🍂
بعيد من الجوطة .. ومن الناس ..
كانت هدى ساجدة في المصلاية .. بتدعي وهي بتبكي وبتقول (( ياا رب .. يا رب انا م عندي في الدنيا دي زول اغلى من وائل .. يا رب هو أول وآخر شيء .. يا رب اشفيهو يااا رب ما تحرمني منو💔 ))
وهي لسا ساجدة ودموعها نازلة وبتقول يا رب ..
فجأة سمعت صوت رجلين جاية بسرعة عليها .. سمعت صوت اروى وهي بتقول : هدى هدىىى قومي بسرعة وائل صحا
قامت جري ومشت مع اروى .. كانو كلهم متلمين برا
اروى : الدكتور معاهو بس يطّلع بكملنا بالحاصل
استنو قريب ال ١٠ دقايق .. وبعدها طلع
منيرة : يا دكتور طمني عليك الله
الدكتور بإبتسامة : الحمدلله اتجاوز مرحلة الخطر وهَسي حا ننقلو الغرفة الفوق جمب باقي الشباب .. حمدلله على سلامتو💙
منيرة ودموعها نازلة : شكراً ليك يا دكتور بجددد .. الحمدلله .. ممكن اشوفو ؟!
الدكتور : اكيد .. بعد ما نطلعو فوق .. بس ما كلكم واحد واحد .. وما تطولو معاهو كتتير
منيرة : طيب
بعد طلعوهو فوق ..
لين كانت قاعدة مع كمال في الغرفة .. كلمها زياد انو وائل صحا .. وبعدها مشا كلم عامر وأهلو ..
جو لين وأهل عامر عشان يشوفو وائل برضو .. دخلو بالدور كلهم .. بس فضلت هدى ..
اول ما دخلت الغرفة وقفلت الباب وراها .. عاينت ليهو وعيونها ملانة دموع .. ما استحملت شكلو وهو راقد في السرير وتعبان ومغمض عيونو وشوية من الأجهزة مركبة فيهو .. غمضت عيونها شديد وضمت قبضت يدها .. فتحتهم تاني وهي بتبكي وبتقول بصوت واطي : اخخ ي حبيبي .. اخخ💔
مشت قعدت جمبو وهي بتبكي لمن بتشهق وخاتة إيدها على خشمها عشان صوتها ما يطّلع .. مسكت ايدو وتكلت راسها عليها وهي بتقول : قوم الله يخليك .. قوم
وبعد مسافة وهي قاعدة معاهو وبتبكي .. استغفرت ومسحت دموعها وقامت طلعت برا ..
🔹🔸🔹🔸🔹🔸🔹🔸🔹🔸🔹
※ نهاية الحلقة السابعة عشرر ۔۔۔ 💙✨
