قروية

الجزء الثالث ١

~~~~~~~~~~~~~~

~~~~~~~~~~~~~~

اروى بعد ما أدت وائل الدفتر .. شالو ورجع البيت .. اول ما وصل طلع غرفتو وقفلها عليهو .. مشا وقعد في طرف السرير .. عاين للدفتر مسافة قبل ما يفتحو ويبدا يقرأ فيهو ..

كانت كل كلمة بدون ما يحس بتتسبب في انو دموعو تنزل بزيادة .. كاتبة كل شيء بالتفصيل .. من اول يوم شافتو .. قعداتهم وكلامهم .. لدرجة حتى بتسجل كان لابس شنو وكدا .. قرا اخر جملة في الدفتر قبل ما يقفلو ويخت يدينو في وشو وهو بيبكي بشهقة حس انو روحو طلعت معاها .. مسح دموعي بيدينو قبل ما يستغفر ويقوم يتوضى ويصلي ركعتين .. قرا قران مسافة قبل ما يدعي لهدى ..

شال تلفونو واتصل على اروى وكلمها انو ح يجيها في البيت ..

شال تلفونو وطلع ..

اول ما وصلها هناك قعدو سوى بعد ما سلمو على بعض وكدا ..

وائل وهو بيعدل قعدتو قبل ما يثبت عيونو ف عيون اروى ويقول : ليه ما كلمتيني من الاول !!

اروى : شوف بصراحة هي اصلاً ما كانت عايزاك تعرف لانو يمكن كانت حاسة فعلا انو انت ما عندك ناحيتها اي مشاعر فحبت تحافظ عليك كصاحب على الاقل ..

وائل : طيب بس لو كلمتيني يمكن كان اتجنبت اجرحها بدون قصد في حاجات كتيررة💔

اروى : وائل خلاص حصل الحصل بعدين اكيد انت ما قاصد شيء ولا عملت شيء بجرح وحتى هي كانت قوية وقدرت انها تدس الحاجة دي وما تبين ليك شيء .. وكدا كدا هي هسي ما موجودة معانا فأنسى الموضوع وارتاح..

وائل : امممم ان شاء الله ..

وقعد معاها شوية قبل ما يودعها ويركب عربيتو .. اتصل عليهو سامي وكلمو يجي الشركة وكدا ..

وما كلها الا دقايق وكان معاهو .. نزل ودخل مكتبو .. جاهو سامي : مالك يا زول قالب وشك كدا ..

وائل مسح وشو بيدينو قبل ما يقول : لا ولا شيء تعبان شوية بس

سامي : اها قررت شنو في موضوع السفرة..

وائل : هي متين !!

سامي : الخميس الجاي يعني بعد ٣ ايام 

وائل : خلاص بفكر وبوريك بعدين

سامي : تمام دي ملفات ختيتها ليك قبيل راجعها ولو في شيء وريني 

وائل : خير خير

سامي : تمام

وطلع على مكتبو قبل ما وائل يمسك الملفات ويبدأ شغل فيها ..

🍂🍂🍂🍂🍂🍂🍂🍂🍂🍂🍂🍂🍂🍂

‎🌸 عند لؤي 🌸

اتصل على لجين وكلمها انو حا يجيها في البيت لانو عايزها في موضوع .. خلص شغلو سريع قبل ما يصلها .. سلمو على بعض وقعدو سوى ..