قروية

٣٠

* بعد نص ساعة *

جو داخلين وائل وعامر ..وكمال مشا على زياد ..
اما زياد كلم اهلو علشان يبدو الخطوبة ..

زياد (( وهو بوجه كلامو لي ام وابو لين )) : شكراً ليكم لانكم سلمتوني اغلى حاجة عندكم وصدقوني حا اشيلها جوا عيوني لانها بقت اغلى حاجة عندي..
ولين تتبسم ساي ورنا تشيل وتغمز ليها..
اما كل ما تقبل رنا على كمال تلقاهو بيحدر ليها بي بسمة ويقبل منها..
لبسو الخواتم وكل شيء مشا حلو اغاني ورقيص وهججو قدرتهم..

فجأة كمال مسك الميكرفون وقال : احم احم..
كل الناس التفتت عليهو
كمال : بمناسبة انها خطوبة اختي لين..فأحب اقول ليها الف الف الف مبروك وربنا يتمم ليك على خير وبجد بتمنى ليك كل السعادة من قلبي..
ابتسمت ليهو ..وبادلها نفس الابتسامة قبل ما يكمل كلامو ويقول : ورأيكم شنو اذا الفرحة الليلة بقت فرحتين..
كل الناس بانت عليهم ملامح الاستغراب..
ابتسم ابتسامة خفيفة قبل ما يكمل ويقول : طيب طيب عارف انكم ما فهمتوني.. (( اشر لي رنا علشان تجي تقيف جمبو ))
وهي مشت عليهو بخطوات خوف ومتوترة لانها ما عارفاهو عايز يقول ولا يعمل شنو..
كمال : شايفين البت الواقفة جمبي دي ..قدامها وقدام اهلها انا بطلب يدها على سنة الله ورسوله..
رنا التفتت عليهو وقالت ليهو بخلعة : شنو
هو ضحك وقال وهو بوجه كلامو لي ام وابو رنا : عمي وعمتي..رأيكم شنو !
الطاهر (( ابو رنا )) : نلقا زيك وين يا ولدي...ما عندي ااي مانع لو هي موافقة ونقول على بركة الله ورسوله..
كمال غمز ليها قبل ما يأشر لي وائل..وهو على طول جاب ليهو علبة صغيرة كدا..فتحها وطلع الخواتم..
ولبسوها لبعض..
وكل الناس باركت ليهم ورجعو لهجيجهم وكل الناس مبسووطة..

==========================

* اوزون _ الساعة ٩م *

صالح : نرجع بعد دا !!
لجين : اوكي يلا

ركبو العربية واتحركو..بعد شوية مسافة صالح وقف جمب محل كدا وقال لي لجين : ثواني بس
ونزل على طول.. وبعد ٥ دقايق كدا جا..
صالح : اتفضلي..بعرفك بتحبيهو
(( كان جايب ليها ايسكريم بنكهة الاوريو والجلكسي ))
لجين بإبتسامة : ااااالله تسلم ياخ..
صالح : العفوو ولو المهم تكوني مبسوطة..
ابتسمت ليهو قبل ما يدور العربية ويتحركو على البيت ..

==========================

* روتانا _ ١٠ ونص مساء *

خلصت حفلة الخطوبة واي زول رجع على بيتو ..حتى عامر  رجع بيتو علشان تاني حتبدا الامتحانات وكدا ..
...
في جهة النجيلة ..
كمال كان قاعد قبل ما تجيهو رنا وتقعد معاهو..
ابتسمت وهي بتقول ليهو : كدا يادوب إتأكدت انك مجنون
عاين ليها جوااا عيونها وبإبتسامة قال ليها : مجنون بيك
سكتت..بدون ما تقول اي شيء
مسك إيدها وقال ليها : بحبك موت ..والله بحبك يا رنا
وهي من الخجل ردت بإبتسامة بدون ما تقول اي شيء..

==========================

* مر اسبوعين *

اتحسنت فيهم نفسيات هالة كتير..اما ناس وائل خلصو الامتحانااات وكداا

==========================

*الجامعة *

وائل : هوي يا شباب رأيكم شنو نطلع بعدين
عامر : طواالي ياخ ورانا شنو واخيرا خلصنا من زفت الجامعة دي
هدى : خلاص تماام
اروى : وانا م عندي اي مشكلة
كمال وهو بحك في راسو : ممكن اجيب رنا🌚
وائل : طواالي اي يلا ما مشكلة اي زول يجي مع زولتو وخلوني انا براي كويس
وبقو بضحكو واتونسو شوية قبل ما اي واحد فيهم يمشي بيتو على اساس المساء يطلعو سوى..

==========================

#نهاية_الحلقة_{ 30 }