♪•••••••••••••••••••••••••••••••••••••••••••••♪
الساعة 11 مساء..
كانت نايمة قبل ما تصحا بصوت باب غرفتها وهو بيدق..فتحت عيونا وعاينت حوليها مسافة قبل ما تقوم وتفتح الباب..
داليا : هالة دا كلو نوم من متين بتنومي كدا اجي
ركزت ف عيونها لقتها مورمة وظاهر عليها بتبكي..دخلت وقفلت الباب وراها
قبل ما تقول ليها بإستغراب : هالة مالك !
ردت وهي بتحاول تدس الجواها : ااا لا ولا شيء
داليا : عيونك دي مورمة كدا كنتي بتبكي ولا حاجة ؟
هالة : داليا ي بت انا كويسة بس عشان طولت ف النومة..
وضحكت ضحكة خفيفة كدا
داليا عاينت ليها جوا عيونا قبل ما تخت يدها على كتف هالة وتقول ليها : وريني كنتي بتبكي لي
هنا هالة ما قدرت تمسك نفسها وبدت تبكي وختت راسا ف حضن داليا وهي من البكا لمن بتشهق..
داليا وهي بتحاوط هالة بيدينها : بسم الله بسم الله عليك في شنو ي هالة احكي لي م تخوفيني
ما قدرت ترد وتقول اي شيء بس فضلت بتبكي مساافة..بعد ما راقت
داليا : يلا برواقة وبراحة كدا احكي لي ف شنو
هالة عاينت ليها مسافة وبدت تحكي وصوتها مبحوح شديد من البكا..
اما داليا كانت بتسمع فيها ما بين مصدقة وما مصدقة : هالة طيب يمكن بجد كان مشغول وما بتهرب منك ف شيء الحاجة دي عادية جدا بتحصل
هالة :
طيب فرضا انو كان مشغول زي ما بتقولي وهو بجد م خاتي ف راسو شيء ،، ليه ما حاول يوقفني او يقول لي شيء لمن قابلتو قبيل وقلتا ليهو كل كلامي دا !! انا ح اوريك ليه !! لانو كلامي صاح ف هو م قدر ينكر اي حرف منو
داليا م عرفت تقول ليها شنو لانو فعلا هالة كلامها صح : ع العموم ي ستي كلو لخير م معروف لقدام مكتوب شنو ،، هسي قومي غسلي وشك وصلي واكلي ليكي حاجة ما اكلتي شيء من الصباح
هالة : ما عايزة انا والله ما نفسي في شيء
داليا م حبت تضغط عليها فخلتها على راحتا..وطلعت من الغرفة
اما هالة قامت تصلي .. قبل ما تتحرك زحت البطانية وشالت التلفون من تحتها..فتحتو وهي بتعاين فيهو مسافة..انكسرت شديييد لمن ما لقت لا اتصال ولا رسالة من وائل..قعدت ف السرير تاني واستسلمت لدموعها النزلت من سكات..
♪•••••••••••••••••••••••••••••••••••••••••••••♪
