............................................
اول ما دخل الغرفة لقاها قاعدة ف الكنبة وتاكلة راسها على يدها..
وائل : امي !!
منيرة رفعت راسها وعاينت ليهو قبل ما تقول : والله اسفة يا ولدي
وائل : لا ولا يهمك اصلا كنت عارف حيحصل كدا (( وابتسم ليها ابتسامة حاول يخبي بيها ضيقو وظهر في عيونو الزعل )) باين ماف نصيب بيني وبين هالة..
طلع غرفتو استحمى وصلى قبل ما ينوم..
بليل صحا وشاف الساعة لقاها 3 ونص وكانت هالة متصلة عليهو كتير..وما كان قادر يرجع ليها ولا يتكلم معاها..
مشا اتوضى وصلى ركعتين ودعى مسافة قبل ما يقول امين يا رب بصوت مكسور ويمسح وشو بيدينو..
وبعدها رجع نام
..................................
كانت بتصلي ودموعها بتنزل..دعت مسافة وفضلت تكرر (( يا رب احفظ وائل من كل شر وما توريني فيهو حاجة توجعني )) وهي فاكرة انو حاصلة معاهو مشكلة او كدا..ما حست بنفسها ونامت..وصحت زي الساعة 7 وربع
#هالة
...................................
صحا الساعة 7 ونص..قام ومشا على دولابو..تلفونو ضرب عاين لقا هالة المتصلة..اتردد مسافة قبل ما يشيل التلفون ويرد..
هالة بصوت باين فيهو القلق والخوف : الو وائل
وائل : صباح الخير
هالة : وائل وين انت معقولة يومين بتصل عليك وما بترد حاصل عليك شنو
وائل : لا بس كنت مشغول وكدا الايام دي مضغوط شديد ،، معليش
هالة : يعني انت كويس اكيد مش !!؟
وائل : ااي الحمدلله ،، يلا انا طالع بعد دا ،، سلام
هالة : طيب سلام..
وقفل طوالي..صوتها خلا قلبو يوجعو الف مرة وهو ما عارف يتصرف كيف او يعمل شنو..اما هالة خوفها كلو اتحول لزعل..كانت بتفكر هو مالو ومن متين بقا بتجاهلها وحتى ما فكر يسألها هي كيف
....................................
طلع ومشا الشركة..كان قاعد في مكتبو قبل ما يجيهو سامي ويتكلم معاهو بخصوص انو عندهم مشروع جديد ومهم ومربح للشركة..و وائل كان مركز معاهو شديد ..
وائل : ظريف جدا خلاص انا م عندي مشكلة بس لسا م وريتني حنعملو وين يعني ؟
سامي : توتي
