⚜️✨ الأسيرة و المتدين ✨⚜️
🔸 بقلم : ليلوشة 🔸
🔅حصريا على كرونيكات اوبال🔅
〰️〰️〰️〰️〰️〰️〰️〰️〰️〰️〰️
|| الحلقة 01 ||
واقفة مصدومة .. طلقت ساشيات الكل لي كانو فيدها .. خاصة بعد متركزت عنيه عليها .. نظرتو الحادة المخيفة .. فهاديك الظلمة الكل يبان غير بياض عينيه .. للحظة بدنها عرش من نظرتو .. نسمة باردة حست بيها .. دقات قلبها تسارعو لدرجة رجعت تسمعهم .. بدات ترجع للور بلعقل و تهز براسها بمعنى لالا .. فجأة دارت تجري على قد متقدر ..
بعد لي شافتو رجعت تجري بلا متحس .. طاحت دمعة .. زوج .. ثلاثة حتا رجعو شلال .. تجري و تلتفت موراها تشوف الا راهم يتبعو فيها .. نظرتو محبتش تتمحا من ذاكرتها .. فكل مرة تتفكرها بدنها يرعش ..
~~ فلاش باك ~~
دخلت لدارها الصغيرة تعبانة بعد ما خدمت يووم طويل .. كل يوم نفس الروتين تخدم اكثر من ثلث خدمات فالنهار باش تقدر تعيش وحدها و باش قدرت تكري دار فيها شومبرة و كوزينة و حمام .. اييه هادي هي حياة وحدة جات لدنيا من علاقة محرمة و غلطة داروها عشاق و رماوها فدار اليتامى بإسم لقيطة بإسم بنت لحرام .. حطت صاكها فوق سريرها و ترمات فوقو هكاك بحوايجها .. و هدرت بصوت شبه مسموع ..
لينة : اه ظهري ..
بدات تتحرك بلعقل فبلاصتها تعبانة حابة ترقد اما كرشها محبتش تسكت مالصباح مكلات والو ..
و هي هكاك حلت عينها على وسعهم و تقعدت فبلاصتها و خبطت جبهتها بيدها ..
لينة : لالالا نسيت مشريتش سباڤيتي يا ربي دك واش نطيب فهاد ليل سوور لحوانت كامل غلقو ..
قعدت تخمم معا روحها شوية .. بعدها قررت تخرج تحوس حانوت بالاك تلقا لي مفتوح لهاد الوقت ..
ناضت مبلاصتها قابلت مرايتها تشوف فروحها .. ركزت معا عينها للحظة .. اما تمتم حبطت وجها متقدرش تخزر فروحها تحس بالاشمئزاز هي لقيطة و راح تبقى لقيطة مهما صرا فالدنيا .. ( لقيطة معناها جات من علاقة محرمة و رماوها والديها من نهار لي زادت فيه .. )
رفدت شعرها الطويل الاسود طمطومة اسفل راسها حطت خيمار فوق راسها .. لبست روبة طويلة لونها كحل .. رفدت مفاتح الدار و خرجت ..
غير غلقت لباب و قابلت حومتها برا فهاديك الظلمة قلبها نغزها .. خافت كانت راح تتراجع و تبقا هكاك بلا اكل .. اما مقدرتش .. تجاهلت احساسها و خوفها خرجت ..
تمشي و تزرب فهاديك الظلمة و تخزر موراها .. زادت مشات شوية .. لقات حانوت مفتوح دخلت شرات سباڤيتي و قرعة ما و خرجت بسرعة راجعة لدار .. و هي تمشي شافت كلب فالطريق لي جات منها خافت تجوز عليه .. بدلت طريقها و راحت من حومة وحدوخرا .. و هي تمشي سمعت صوت على جنبها ..
دارت بلعقل تحاول متعملش صوت .. نفسها منتظم .. تركزو عينها على المكان لي خارج منو الصوت .. تقدمت بخطوات ثقيلة .. تشوف فزوج رجال واقفين رافدين راجل يبان دايخ .. و مقابلهم راجل واقف رافد فيدو مسدسو حاط فيه كاتم الصوت .. و اووب تيرا على الراجل شي خمس رصاصات ..
تسارعت نبضات قلبها .. تسارع نفسها .. حطت يدها على فمها تكتم فصوت تنفسها .. عينها تحلو على وسعهم .. رجعو يدها يرعشو .. رعشة سرات فبدنها كامل لدرجة حست انو جسمها بارد علخر ..
رجال هادوك طلقو راجل هاداك خلاوه تما مرمي غارق فدمو و كانو رايحين .. اما الشخص لي قتلو حس انو عبد قاعد يخزر فيهم .. حس انو كاين لي نظراتو مثبة عليهم .. لتفت موراه بكل هدوء .. يشوف فيها جامدة فبلاصتها .. ركز عينو فعينها .. حس بخوفها و رعشتها .. صوت نفسها المتسارع يتسمع من بعيد ..
شافها كيفاش طلقت ساشيات لي فيدها و رجعت تجري .. تبسم على جنب باستهزاء .. دار بكل هدوء لعند رجالو و هدر معاهم ..
عزيز : جيبوها .. نسحقها حية ..
راحو تبعوها يجرو موراها .. و هو طلع فسيارتو الكحلة .. امر رجالو يرفدو الجثة و ينظفو المكان .. اما هو .. طار بطونوبيلتو ل دار ..
~~ العودة للحاضر ~~
كملت تجري هكاك بدون وجهة .. خيمارها طارلها و هي تجري مقدرتش ترجع تهزو .. كملت تجري هكاك .. بعدما ما عيات حبست فبلاصتها تخمم فحاجة تقدر ديرها باش تتخبا ولا ترجع لدارها .. راقبت المكان كامل بعينها .. لمحة شجرة كبيرة قدام دار من ديور لي لتما .. لتفت موراها تشوف الا مكاين حتا واحد يراقب فيها .. و توجهت تجري لهاديك شجرة لي كانت فبلاصة مظلمة متقدر تشوف والو ..
تخبات موراها .. و قعدت فلرض .. دموعها محبوش يحسبو .. مصدومة مالمنظر لي شافتو .. و من هادوك العينين .. اما تمتم فاقت معا روحها .. الهدوء كان يعم المكان .. صوت نفسها و شهقتها يتسمع .. عليها قررت تهدي روحها ..
قعدت مدة طويلة تما و مرة على مرة تخزر لطريق .. عيات فهاديك لبلاصة .. و تأكدت انو ضيعتهم و مشافوهاش .. قررت تخرج ملتما و ترجع لدار .. خرجت بلعقل من ورا شجرة .. تمشات بهدوء بخطوات رزان .. وصلت لطريق .. كانت راح تبدا تجري .. اما حست نفس سخون يضرب فرقبتها .. تحلو عينها على وسعهم و غرغرو بدموع .. كانت راح دور تشوف وجهو اما حست بضربة قوية اسفل راسها ظلامو عينيها .. حاولت تمشي اما جسمها تخدر .. طاحت فلرض نفسها ثقال و عينها تغمضو ..
خزر فيها متفاجأ بزينها .. الخيمار كان مغطي شعرها لي زايد فيها النص .. بشرتها البيضة .. جسمها لي كان مستور اما مغري.. لعب على تخمامو شيطان و قدم ليها و حط يدو على .....
〰️〰️〰️〰️〰️〰️〰️〰️〰️〰️〰️
اوبالاتي ✨ ..
واش رايكم فالحلقة الاولى 😁 .. و قولولي الا اسلوبي قدرت نطورو شوية ولا مزالو كيما كاان 🙄🤔 و وااش توقعاتكم من خلال العنوان و احداث الحلقة لولة زعما المتدين هادا هو لي خطفها ؟؟ و واش راح يكون مصيرها ؟ و فبالكم الراجل هادا راح يغتصبها ؟؟
خلولي توقعاتكم طواال عراض تعرفوني نحب كي نشوفكم منسجمين معا الاحداث و تشاركوني بافكار مخيلتكم 🔥✨
جمجمو كاااامل الحلقات عميراتي 🦚
#ليلوشة
أنت تقرأ
⚜️ الأسيرة و المتدين ⚜️
Acción⚜️✨ الأسيرة و المتدين ✨⚜️ 🔸 حصريا على كرونيكات اوبال 🔸 بقلم : Leila Ouaras ( ليلوشة ) •.............................................• اوبالات 🔥 رجعتلكم ليلوشة بكرونيك جديدة بعد ما عشقتو فكرونيك #عشقت_سَلَفِي 🧡 رجعتلكم بكرونيك...
