OMG! (mashikyu/mashihoon)

OMG 16 (unicode)

ပန်းစည်းပေးပြီးဓာတ်ပုံအတူတူရိုက်ပြီးတဲ့နောက် ဆိုင်ကိုပြန်လာခဲ့သည်။

မှိုင်တွေငေးနေသော ဂျီဟွန်းကိုဆိုင်က ကိုယ်တော်လေးများက ရည်းစားပူမိနေတယ်လို့ထင်ချင်ထင်နေနိုင်သည်။

အမှန်တော့သူကိုယ်တိုင်လည်းပြတ်ပြတ်သားသားမဖြစ်သေး။

 ရည်းစားကောင်မလေးတကယ်ရှိတာလည်းမဟုတ်ပါဘဲနဲ့ ရှိတယ်လို့လိမ်ပြောထားရသေးသည်။ 

အချစ်ကိုလည်းလိမ်ထားရသည်။ ဘဝကိုလည်းလိမ်ထားရသည်။

 ညီ့ကိုလည်းလိမ်ထားရသည်။ ကိုယ်ချစ်ရတဲ့သူကိုလည်းလိမ်ထားရသည်။

မြန်နိုင်သလောက်မြန်မြန်ထွက်နိုင်ဖို့ပြင်ရင်းကနေ ၃ လကျော် ၄ လစွန်းစွန်းထဲရောက်တော့ ၂ ပတ်ကြိုစောသွားဖို့ပြင်နိုင်ခဲ့သည်။

သေချာတာကတော့ ဒီတစ်ပတ်ပြီး နောက်တစ်ပတ်ဆို ဂျပန်နိုင်ငံမှာ တစ်ကိုယ်တည်းအလုပ်လုပ်ရင်းဘဝဆက်ရတော့မည်။

ဒါပေမယ့် ဒီနေ့မှ ဘဝထဲမှာလေပြင်းမုန်တိုင်းတိုက်နေသယောင်။ လေဆင်နှာမောင်းဝင်မွှေထားပြီးနောက် ပြန့်ကျဲနေတဲ့အပိုင်းအစတွေကို လိုက်ကောက်ချင်စိတ်မရှိတော့တဲ့ လူတစ်ယောက်ကိုယောင်ချာချာလုပ်နေမိသည်။

ဒီလိုလုပ်ပေးနေမိတာ ညီလေးအတွက်ကြောင့်လား?

ဒါမှမဟုတ် ကိုယ့်အကျိုးအတွက်ပဲလား?

ဒါမှမဟုတ် ချစ်ရတဲ့သူအတွက်လား?

ဒါမှမဟုတ် ဒါတွေအကုန်လုံးကဆင်ခြေတွေပဲလား?

'ဟူး...'

'သက်ပြင်းတွေချလိုက်တာအစ်ကိုရာ'

ဂျောင်ဟွမ်းက စားပွဲပေါ်ကော်ဖီခွက်လာတင်ပေးရင်း ပြောလိုက်သည်။

'ကျယ်သွားလား'