(( امرأة العُقاب ))
_ الفصل الثاني والعشرون _
شعر بتسارع أنفاسها بعد أن كانت منتظمة وهادئة ، فأدرك أنها تتصنع النوم وسمعت ما قاله .. تنهد الصعداء بابتسامة ثم رفع جسده قليلًا عنها ومد أنامله يزيح خصلات شعرها عن وجهها وعيناها ، ودقق النظر في وجهها فلاحظ ارتجافة رموشها فتأكد حينها أنها بالفعل مستيقظة .
أخذ يعبث بأنامله في خصلاتها برقة وانفاسه الدافئة تلفح رقبتها ونصف وجهها ، وبعد لحظات من الصمت بينهم هو مستمر في تمرير أنامله فوق خصلاتها ويغلغلها داخلهم وهي لا تزال تتصنع النوم ، أصدر تنهيدة حارة ورأى أنه لا بأس من بعض الاعترافات البسيطة التي لا تعرفها .. عاد يتحدث من جديد بصوت رخيم ولكن هذه المرة هو يعرف أنها تسمعه :
_ لما وافقت على الطلاق كنت مضطر لما ملقتش حل معاكي تاني .. وتقدري تقولي كانت غلطة مني والحمدلله ادركتها قبل فوات الآوان .. أنا متفقتش مع نشأت إني اطلقك وآخد هنا منك ، أنا مش قذر للدرجة اللي تخليني احرم بنتي من أمها .. لو كان في اتفاق بيني وبينه فكان اتفاق إننا نفهمك إني هاخد هنا منك لو أطلقنا على أمل إنك تتراجعي عن اللي في دماغك .. وبرضوا ده تصرف غلط معترف بكدا بس ملقتش طريقة غير دي ولو كنتي برضوا صممتي على الطلاق مكنتش هاخدها منك أكيد
سكت للحظة ثم أخذ نفسًا عميقًا واسترسل كلامه بلهجة باتت أكثر قوة :
_ لغاية ما خدتيها وهربتي بيها .. مش عارف كان تفكيرك إزاي وقتها ، كنتي بتحاولي تحميها مني عشان مخدهاش .. أو عملتي كدا قصد عشان تحرقي قلبي على فراقها لإنك عارفة أنا روحي متعلقة بيها إزاي .. ولو كان هروبك ده عشان الاحتمال التاني فأحب اقولك إنك نجحتي في كدا ، كنتي السبب في إني عيشت شهرين في ألم ورعب وقلق .. من كتر خوفي واحساسي بالعجز بقيت افكر إنكم ممكن يكون حصلكم حاجة ، شوقي وخوفي على بنتي كان مش بيخليني عارف أنام حتى ، كنتي بتقوليلي هنتقم منك بس إنتي انتقمتي شر انتقام لما حرمتيني من هنا .. كنت في حالة غضب لا يمكن تتخيلها ومن كتر غضبي كنت متوعدلك إني هندمك على اللي عملتيه ده ؛ لأن وسط خوفي وقلقي على بنتي كنت قلقان والشك هيقتلني وأنا بفكر بتعملي إيه ورحتي فين وقاعدة مع مين .. ولما عرفت إنك قاعدة مع اللي اسمه حاتم ده اتجننت وحجزت على أول طيارة وسافرت ، وطول الطريق كنت منتظر اشوفك بس عشان اخد روحك بإيدي من كتر عصبيتي .
لحظة أخرى مرت وهو يتنهد بعمق ويعود ويكمل بنبرة رخيمة عادت لسابقها :
_ بس لما شوفتك معرفش ايه اللي حصل هديت 50 درجة ومعرفتش انفذ اللي كنت ناوي اعمله أول ما اشوفك .. بعترف إنك وحشتيني ويمكن عشان كدا ضعفت لما شوفتك .. كنت غيران أه وإنتي عارفة إني بغير ورغم كدا بتتعمدي تجيبي سيرة حاتم قدامي ولما بتعصب بتزعلي ! .. يعني في الآخر الشهرين دول علموني حجات كتير أولهم إن قرار الطلاق كان غلطة ولا يمكن أكررها
توقف أخيرًا عن الكلام ونظر لوجهها يتابع تعبيراتها .. لا تزال رموشها ترتجف لكن أنفاسها هدأت قليلًا فانحنى وطبع قبلة على وجنتها ثم رجع بشفتيه للخلف إلى أذنها وهمس :
_ كنت ناوي اقولك الكلام ده من بدري وأعتقد إن ده انسب وقت .. بما إنك مش فاهمة سبب رفضي للطلاق فيمكن دلوقتي تكوني لقيتي إجابة سؤالك .. تصبحي على خير يا رمانتي
أنت تقرأ
امرأة العُقاب .. للكاتبة ندى محمود توفيق
Romanceجميع الحقوق محفوظة للكاتبة استشاط غيظًا وصرخ بها مغتاظًا : _ جيبي الزفت التلفون ده على وشك مش بكلم نفسي أنا عدلت الهاتف ووجهت الكاميرا على وجهها لتصيح به في وجه أحمر من فرط الغيظ : _ متزعقليش فاهم ولا لا تمعن للحظات في صورة وجهها الظاهرة أمامه...
